1 Melketsedeqii kunni Saalemike moyanjonna Lumoke Magenike qeesichchomman; isinna Abirihaami moyanjuwwa injifate higaa'naa afemeexxi isoo eebbise. 2 Abirihaaminna duuchchiinxe yaanenaa'n tommitte aadheexxi iso'n uwwe; isike summixxi taakkaxxi tika «Qullummatike moyanjo» langaxxi «Saalemike moyanjo» hiyyaten; Saalemike moyanjo hiyya nage'iinke moyanjo hiyyaten 3 Melketsedeqi kunni anna ama yookaan ilatika daalo afebaan; baro isikee ke'it, isixxe hedho'aanna muuxami hedheba'a; yaane kinni isi Mageniinke Beltike fakkeenna kadeexxi duuchchi woddi'a qeesichcho kadee hedhaan.

4 Kunni manji isi hittee qico lumoke kadeexxa hedde! Ayihudiinxe gosake hundaayyeti anna kadeek Abirihaami midde booji'oti eettene alfeexxe yaanenaa'n tommitte fulcheexxi iso'n uwween. 5 Iitti qeesummi insa'ne'a uwwemeemmaxxi Leewwixxi oose fedhee qiconna midde insa'nek dayyuwwi Abirihaamixxe horte kadoolenna, ardakenaa'ni kunninna ifike dayyuwwanaa'n tommitte aa'naashsha seeri insa'ne ajajaan. 6 Melketsedeqii kunni, kinni isixxe ilenshak daali Leewwixxe gosanaa'nitebaan; kaddo maalee isi Abirihaaminaa'n tommitte aadhe; ookkonee addachchiisatik hiyyichchi isi'a uwweme'eemmaka Abirhaamiinna eebbise. 7 Maa'nii angafakenaa'n eebba adhdhaaxxa mama affeexxe yaaneba'a. 8 Mitte orinni tommitte aaxxaaxxi Leewwixxi oose wele manjishshanni rertaaxxen; weli orinni kinni tommitte aadhaak hedhoke kadeexxi hedhaaxxa isixxee dhugaa kulendeeke Melketsedeqiten. 9 Wele waalin iikki tommitte aadhaammak Leewwi, ifinge uminninni Abirihaami darree'n tommitte uwwe'een hiyya dandeessissaan. 10 Tinninna kaddaachchi Melketsedeqi Abirihaaminni afemeemmaxxa yanna, Leewwi ookkone wodda, hundaayyetika ifika anna Abirihaamike gudeedi giddo hedheemman hiyyaten.

11 Iikki seeri ardakee uwwemeemmak Leewwixxe qeesummaxxe hundaayyeshshatemman; yoona Leewwixxe qeessuma'ni silaan wo'munte afende'eechcho kaddeele Aaroonikishshate kaddebaak Melketsedeqixxe qeesumake baalloomishsha hedheek weli qeesichchi daga mayee hassissamma'a? 12 Qeesumatixxi jijjiirensha hexxaa wodda seerikinna jijjiirema hassissaaxxen. 13 Tinni yaane duuchchi isixxee haaso'endeek qeessichchi isi wele gosati minena'niten; ookkone gosati mininaa'n ookkone tolchimalchibaa shiqeexxi ergatemeek ayyinna hedhebaan. 14 Tinninna Gootti no'ok Yessuusii Yihudake gosati mininaa'n dageexxa ege'nedeexxen; Muuse qeese uuddaaxxenni haaso'ee wodda Yihudaka gosati mine uuddaaxxenni haaso'eexxi mitte yaannenna hexxebaan.

15 Tinni yaane hara ifake kaddeexxi leellitaak Melketsedeqishsha hedheeki weli qeesichchi dagaaxxe yannan. 16 Isi qeesichchoke kadeek baxxabaaxxe hedhoxxe hunna qicishshate malee'e isi ilenshati dageexxe sannek seerishshanna aadashshatebaan. 17 «Melketsedeqike qeesomike baalloomishsha ati duuchchi woddi'a qeesichchoken» hiyyendee borreessende'een. 18 Iikki ediki ajaji goofakenna woyi fulabaake kadeemmaxxee gate'een. 19 Kunni Muusek seeri ayyeenna wo'make assa dande'a gophaammaxxee Magniinbaa shinqannoxxi wele eldaaxxi adde dagge'een.

20 Tenne'ninni hana tinni qeesumma Mageniinxe kako belo kaddeexxebaan; weli konne edi darre qeesete kadeemmaakiir kako beltemman. 21 Yessuusi kinni qeesichcho kadeek Mageniinxe kakoniten; tinninna kaddeechchi Mageni isixxee,

«Mageni ‹Ati duuchchi woddi'a qeesichchoken› hiyyee kakate'een;

ifika yaadanna jijjiirabaan» hiyyendeexxi isixxe kulendeemma qicishshaten.

22 Tennee kakonaa'n kexxeexxinni Yessuusi eettene woyya hiyyendaaxxe kako aaggo'a waasete kade'een. 23 Ifixxe ergatenshanni me'inabaashsha reyo insa'nee hoyyiteemmaxxee eettene edixxe qeesek laakkossi heddokemman. 24 Yessuusi kinni duuchchii woddi'a hedhaake kadeemmaxxe qeesumma isixxi jijjiirendabaaxxen. 25 Tennexxee insa'nexxee soodata'ni duuchchi wodda hedhoti hedhaammaxxee isi darree'ni Magniinbaa dagaakaara woma qicinni anjira dande'aan.

26 Yoona no'aa hasisaak, woyyichchi ci'memabaak, luqqichchi cubbaleeyyetenaa'n gargar higeekenna iimuwwati iimi darree xalli hiyye ulfaateeke iitta hedheek umo qeesichchoni. 27 Isinna wele umo qeesehsha ediseexxi ifixxe cubboxxee ookkoneechchi uduma ardiinxe cubboxxee barra barra'ni tolcha shiqishsha isoo hassissaba'a; yaane kinn ifi tolchake asseexxi shiqisheexxa yanna, tennee yaane lebabaa qicinni muuxedheen. 28 Iikki Muusek seeri ifi gopheeka manna umo qeese asseexxi baallonsedheen; seeri uduma daggeexxi kako aaga kinni duuchchii woddi'a wo'make kadeeka Belto baalloonse'een.