1 Yoona haasonaannexxe yaanuwwanaa'ni umo yaane tinni: iimuwwate'ni ookkone lumoke Mageniinxe mooteke midda'ni ofo'leeka iitta hedheeka umo qeesichcho anfe'eennen. 2 Isinna manjoke kadebaak ookkone Gootti kaaseeke dhugaatike duunkaana kade'eeke Galmike erganjon. 3 Mitti mittiingi umi qeesichchi baalloomaachchi uwwattanna tolcha shiqisho'aaten. Tennexxee kunni umi qeesichchinna shiqishaaxxi mitte yaane isi'a hedha hassissaan. 4 Isi buttate'n hedheechcho kadeele umo qeesichcho kadammabaan; tinninna kaddaachchi Muuseke seerike ajajishsha uwwa shiqishaak manni hedhemmaxxeeten. 5 Insa'ne ergattemeek duunkaani iima hedheeke Galmike fakkeennanna gaaddisa kadeek giddon. Muuse ookkonee duunkaana giissatee ke'ee wodda, «Eettene kooba hana ate'n ifisemeek fakkeennishsha duuchchiinxa yaane assitattoshsha xexxe'at» hiyyaak ajaji uwwemeemmachchi tennexxeetemman.

6 Yaane kinni Yessuusi oddichchake kade'eemmaxxi kako aaggo eettene edixxenaa'n caaldaammashshanni isi adhdheexxi iitti ergatensha insa'nexxenaa'n caaldaan; tinni kakonna kaasende'eek woyya afeexxe addachchiisatike hiyyichcho'niten. 7 Sirettixxi kako aaggo mitte xe'ya afa gophpheele langaxxee silaati boonchi hedhammabaan. 8 Yaane kinni Mageni aradake'n xe'ya afe'eemmaxxee,

«Isira'eelike ardi'a,

Yihudake ardi'aanna

Haaroxxa kako aagannoxxi

barra daggaan hiyya'neen Gootti.

9 Tinninna Gibtseeke boganaa'n

insa'nee fulchonnaa anga insa'neexxa abidennexxa yanna

Edike insa'neke annuwwi'a aagennaxxe kakoshshatebaan;

tinninna kaddeechchi insa'ne anxe kako'n ti'ni hineba'a;

Aninna insa'ne'n gagga'm hiyyenne

hiyya'neen Gootti.

10 Eettene yanna uduma

Isira'eelike ardi'a aagaannoxxi kako konneechchi butta hexxeexxen hiyya'neen Gootti;

Anka seera sammo insa'nexxi giddo uggannon,

insa'nexxe qalbe'ninna borreessannon.

Ani insa'neeke Mageno kadannon;

insa'nenna anke arda kandaan.

11 Ta'anni edi'a ayyinna ollalcho ifika,

yookaan dayyo ifika, ‹Mageno ege'ni!› hiyya'n barachchiisabaan;

Tinni kaddaachchinna shiixxokenaa'n lumoki qico'ni

insa'ne duuchchiing anee egennammaxxeeten.

12 Balleessa insa'neexxa gattoowwaali hiyyannon; insa'nexxa cubbonna

ta'anni edi'a qalli hiyyabe'non.»

13 Tennee kako aaggo «Haaroxxe» hiyyeexxi eettene edixxa kako dullattete asse'een; tennexxee dullattete kaddeexxinna woyi fuldabaaxxi yaane baxxaaxxi yanna shiqqe'een.