1 Yoona hano iimika ye'injo qoodendineek woyyoole dayyuwwaa, no'oxxe amanake ergamallonna umo qeesichcho kadeeka Yessuusii'i hedde. 2 Muuse Mageniinke mine duuchcha'ni xuurameesake kadeemmashshanni Yessusinna isoo baallonseeke Mageni'a xuurameesakemman. 3 Mine ijaadhak ookkone mine caalaaka ulfinna afe'eemmashshanni Yessuusinna Muusenaa'n caalaaka ulfinna afa hassissaake kade'een. 4 Mitti mittingi mini ifi ifike ijaarallo afe'en; yaane kinni duuchchiinxa yaane ijaareek Magenoken. 5 Muuse edi'a haaso'endaaxxe yaanexxee dhugaa kula'n Mageniinke mine duuchcha'ni mitte erganjishsha xuurameessakemman. 6 Kiristoosi kinni Mageniinke mine'n xuurameessa beltishshaten; no'onna addantannoxxa yaanenna ifi saandannoxxa adde jabaante abixinonnole isike minen.

7 Tennexxee Woyyichchi Hafuuri hiyya'nee qici

«Techcho haaso'a isika laqqinoole

8 Qiilla gammoojje'n hega anee uudinemmaxxa barra

Xaqarot assitinemmashsha

qalbe ha'nooxxa jabeesexxinoqqe'e.

9 Annuwwi ha'nook anee ookko hega undeen;

anee qore qo'niseen; assennexxa duuchchanna shoole tomme wogga'a uunde.

10 Tennexxe eettene ila'ninna mufatennexxi,

‹Qalbe insa'neexxi duuchchi wodda dedhake'n ibbaan;

anka oranna egennebaan› hiyyenne.

11 Tennexxee mufatennexxi

‹Anxe hafuura addhdhabaa haranga e'yinabaan› hiyye kakateenne.»

12 Anke dayyuwwa ha'nonaa'ni ayyinna hedhaake Mageninaa'ni uduma hissitaaxxi cubbitenna amandabaaxxi qalbe hexxabaasha xexxe'ate. 13 Yaane kinni ha'nonaa'ni ayyinna cubbotte'ni sobeme'naa qalbe isixxi dillotabaashsha «Techcho» hiyyendaaxxi barra hexxe'naanni barra barra'n weli weli gorse. 14 Sirete'n anfeennaxxa amana muuxamii qico'ni jabeessine abixxinonnole Kiristoosinni welti qoodeemmannoke kandannon. 15 Tinninna

«Techcho haaso'a isika laqqinaa wodda

xaqaroti assinemmashsha

ta'anna qalbe ha'nooxanna jabeessexxinoqqe'e» hiyyende haaso'endemmashshaten.

16 Haaso'a isika laqeexxi xaqartichchake kade'eemmakiir ayyeerama? Ookkone Muuse akeeka'ni Gibtsee'n fulchemmake mannammabaata? 17 Shoole tomme wogga Mageni itti mufateemmaki ayyeera'nitemma? Cubbo hujee'naa renshi insa'neek qiilla gamoojje giddo ibee gateemmake ookkone mannammabaata? 18 Iittanni ookkone ajajema gibeemmake manna kadoole malee, «Anxe hafuura adhdhabaa ee'yitinaba'a» hiyyeexxi insa'neexxee kakateemmak ayyeeramma'a? 19 Yoona insa'ne e'ya dande'a gonpheemmaxxi buuto amana gopha insa'nexxe kaddeexxa uundeennen.