Arca da aliança

Samkakbung

10 Penui acacia tsing le samkakbung ge teizie. Pe tie cubit kena eh pempie maisia; pe di cubit ket eh pempie zie; nah pe hu cubit ket eh pempie zie.* 11 Nang cide pe lungle nah hegwale kemci kecak le kezuilu maisia, nah nang pe reuga kecak le petu tei twagwalu maisia. 12 Cide ziemne kecak ringgoi mdai teilu maisia, nah cidungde pwa samkakkelu bung pi mdai gage kailu, ringgoi kena tuge lam, nah ringgoi kena keda lam. 13 Acacia tsing le petiedung teilu nah cidungde kecakle keniaklu. 14 Petiedung de samkakkelu bung mbie ga kebam ringgoidung gage za gailu, samkakbung de pwalu kerane. 15 Petiedung de samkakbung ringgoi ga bamlu maisia; cikade cide keudi kerabe ma. 16 Ih ncu samkakkelu hezaidung peulai eh kebamde samkakbung gage kailu maisia. 17 Nang pegum kemci kecakle teilu maisia. Petie cubit kena eh pempie maisia, nah pedi cubit ket eh pempie maisia.* 18 Nang pegum tu kenade ziemne kecak hedeu kelube le cherubim* kena teilu maisia. 19 Cherub ket pegum tuge lam ziemne teilu, nah cherub kedage keda tu ziemne. Cipaukena de pegum gage tei ncütlu eh kang ge nzwa teilu. 20 Cherub kenade peu penai hesiu hwapet lu nah pe gum reu gumlu. Cherub kenade ketket depeu kezumoklu nah pe gum sum ga pielu. 21 Nang pe gum de samkakbung reu gage kailu maisia, nah Ih ncu samkakkelu hezaidung peu kebamde samkakbung gage kailu maisia.

22 Samkakkelu bung gade Ih ncu redau luzie. Pegum reu a bam gade Ih ncu ngngwa resiu zie. Cide samkakkelu samkakbung reuga cherubim kena kak gade zie ciu eh Ih ncu resiu zie ajadung leune ha Israelme ziemne Ih ncu peuzie.

Samkakbung

1 Bezalel acacia tsing pwa samkakbung teilu. Pe tie cai cubit kena eh pempie; pe di cai cubit ket eh pempie; nah pe hu cai cubit ket eh pempie.

Paiki kelim

1 Cidau Rampaube Moses dage rangdi, 2 "Mmi keheci hekeizie raitu benai nang recapaiki de limlu maisia, kengkwa paiki de. 3 Cika ge zierang samkakbung de kailu maisia nah nang cipau dwa gage kehezupai le samkakbung de limlu maisia.

20 Cipaucai pa samkakkelu hezaidung de pwalu delwe paiki gage kailu. Pa samkakbung ringgoidung gage pe pakdung kailu delwe pe gum gumlu. 21 Pa samkakbung de recapaiki gage pwa nlütlu. Pa kehezupai le samkakbung de lim kaplu cide sunglu kerane, Rampaube pecu aja kai kebeunzwa.

89 Moses kengkwa paiki ga Pecu mpau kera lüt kecudau, pa makwa ge siu pecu mpau eh kezuyi bam reu gade zierang ketei samkakbung kebam gade, cherubim kena kakgade, cine pa pecu mpau.

33 Penui RAMPAUBE lamlwatu ga langcumne beuhzie tei eh tet. RAMPAUBE samkakbung penui dwa langcumne tet nswa di penui mtaklu kera ni peei lu kerane. 34 Tingba pet gaige penui mbeuh kela cika RAMPAUBE gu hemwa penui reu bamdi. 35 Keheidaude samkakbung tetgai kecudau, Moses rangla, "Cuhlu, RAMPAUBO. N ngauraumedung de tei zangra di. Ncu ngaunghet kelame de n dade pakti kera teibeu lo." 36 Keheidaude liembe mtakdi kecudau, Moses rangla, "Cailigwanglo, RAMPAUBO, Israelme cangcang kekiee ge kebam ga."

Aaron Tui Bwakedi

1 RAMPAUBE Moses de mpau, rang eh, 2 "Israelme de rang beulo nah hetuitiedung penui dade keulu, pautsa leuhme ziemne ketket ramcau, hetuitie kereiehkena. Petui ramcau gage mina zi be raulu. 3 Nang Levime tui gage Aaron zi raulu maisia. Cika pe pautsa leuhme gade muiteume ziemne hetuitie ketket ramcau bam maisia. 4 Nang hetui cidungde Ih ncu redau kela paiki ga, samkakkelu zai dwa gage kailu. 5 Ih mina kedet kelube gu tuitie de peu bwapet kera teibeu zie. Ih tei mtak dizie Israelme ncam kebamdungde, penui nnuide rangmsia kebamdung de." 6 Cide ziemne Moses Israelme dage rang kecu tei. Heleuhdung muiteume leune Moses de tuitiedung peu, muiteu ge tuitie ketket, pautsa leuhdung gade kedetkelu tuitie ge, peciakne ge kereiehkena. Aaron gu tuitie de cipaumedung kakga bam. 7 Pecai Moses hetuitiedung de RAMPAUBE dwaga samkak kelu bung paiki gage kaibeu di.

8 Pecia benai Moses samkakkelu bung paiki ga nlüt nah, ainie, Aaron gu petui Levi leuhme ziemne bwabam dida. Cide bwa luge pepa palu nah almond tsi meu eh bui lu! 9 Moses RAMPAUBE dwa gade hetuitiedung pelane pwa mpetlu eh Israelme pelane petui riep peu pwalu. 10 RAMPAUBE Moses dage rang, "Aaron tui de pwalu eh samkak bung dwa gage kai lulo. Renia kelame ziemne peu cet caililu kera marengei de cika ge kainzeu gailu ciu eh nnui acu ncam kecu bam tadi lu kerane, mecai penui tsai dizie."✝ 11 RAMPAUBE aja kaikebeu nzwa eh Moses teicanglu.

14 Cine cipaucai minadung penui ramzeukidung gade mpet lwe Jordan kahpet lu kera Cingkume samkakbung pung kelame ne penui dwa rai eh. 15 Samkakbung pung kelame Jordan ga gwang canglu herizi nah cingkume samkakbung pung kelame pi duikung penli ga hi gai herizi (cu Jordan reu kungdung pelane dui puipet di lulwet ting kecang), 16 dui nreule de lwa nghung kebamdung de piage gage lwacaili daidi, Adam namdi dei süt kecu gade, Zarethan taiga namdi kebam de, nah Arabah duidi ga lwamie kebamdungde ga, Ketsai Jaaidi de dangdi eh minadung Jericho nam taiga kahpet lu. 17 Nah Cingkume RAMPAUBE samkakbung pung kelame Jordan reu deucang sumga sap mtip bamdi nah Israel leuhme pelane Jordan kahpet deucang ga canglu kemaktane.

18 Ge cingkume RAMPAUBE samkakbung pung kelame Jordan sum gade tet nghang lwe cingkume penui pideu hangdeu kecang gage kai kedicai Jordan kereuki duidung lwacaili pebam ga gwangdi pedwa lwakebam nzwa eh pekungdungde pelane puipet daidi.

1 Cu Jericho namdi kirie de kadi, Israel namedung ziemne. Migede hegwale mpet nah migede helungle nlüt ma. 2 RAMPAUBE Joshua dage rangdi, "Pielo, Ih Jericho, pe hegwang nah pe kengkieng reugwame de n ba gage kaibeula. 3 Nang nah n reugwame Jericho namdi tet twagwa maisia, reugwame pelane namdi de piage tet twagwalu. Aide lang herokne tei maisia. 4 Cingkumedung hanghena meurünseu kii teluidung hena pwalwe samkakbung dwaga tet maisia. Pecai lang henane benai, nang namdi de pia hena tet twagwa maisia, nah cingkumedung telui kwa ngkiengsüt maisia. 5 Pecai ainzwa zie penui meurünseu kii de kwa ngkieng nah kwa tiesüt gailu de, nnui telui kwa siu kegai dau, mina pelane sahbak eh sahgai maisia, ciciude namdi rie kau mie dizie. Minadung, keheibe de nzuizang eh nghang dizie." 6 Cine Nun napei Joshua cingkumedung de qulu delwe penui dade rangdi, "Samkak bung de pwalu, nah peu cingkumedung hang hena de meurünseu kii teluidung hena RAMPAUBE samkak bung dwa ga pwalu." 7 Pecai pa minadung dade rangdi, "Mie delwe namdibe ga tet twagwalu, nah reugwame RAMPAUBE samkakbung dwaga tet zie."

20 Cine minadung sahgai nah penui teluidung kwagai. Cinzwa eh minadung telui kwa siulu ge, penui sahbak eh sahgai, ge namdi kirie de kau miedi, nah minadung namdi ga nghangdi, mileune de penui dwaga nzui jüja, nah penui namdi de tuilu.✝

2 Philistinme, Israel de ngngwa hereu tei kera sap bialu. Hereu teicuh ge, Philistinme Israel reu ngamlu, nah mipei cang mdai gede reutakbam gade teitsetdi. 3 Reugwame ramzeuki ga gwang luge, Israel muiteume rangdi, "Daitei RAMPAUBE henai peu Philistinme de anuide ngamdi no? Anui RAMPAUBE samkakbung de Shiloh gade aika pwa gwang lugo, iciu eh cide aika anui taiga bamlu nah cide anui ngauraume ba gade anuide kelilu kerane." 4 Cine penui mipeidung de Shiloh gage langgai; cikade penui Reugwame reu RAMPAUBE samkakbung de pwalu, cherubim kena kakga kebam de. Eli napei kena, Hophni penai Phinehas cika Tinggwang samkakbung de taiga bam. 5 RAMPAUBE samkakbung de ramzeuki ga gwang luge, Israelme pelane penui suiyi kwa sahbak gai, ge hangdeube nlaidi. 6 Sah kebam kwade Philistinme siu luge, penui rangdi, "Hebrewme ramzeuki ga sah kebam kwade pekie daino?" Cidau penui RAMPAUBE samkakbung de ramzeuki ga gwangbam kedi cilu. 7 Philistinme ngngidi eh penui rangdi, "Rabe ge ramzeuki ga gwang luda." Penui rangdi, "Ainei, anui da keherei gwang zieda! Pedwa aikenzwa madau gede teima!" 8 Ainei, anui da keherei gwang zieda! Caune anuide cipau kengkieng rabedung de ba gade kelibeu lai? Cidungde Egyptme de hetaideu gade keherei ketsamtsam le ngkap kecu rabedung de da. 9 Kuulu, nah mipei nzwalu, nnui Philistinmedung, mecai nnui Hebrewme baang tei zie, penui nnui baang tei kecu nzwa. Mipei nzwa regilu. 10 Philistinmedung regi eh Israelme de ngamlu. Mipei leune penui ki gage pak gaidi, nah kekiee gede daptsetdi; Israel hepi reugwame cang camrei ge kaudi. 11 Tinggwang samkakbung de tui teudi, nah Eli napei kena Hophni penai Phinehas tsaidi.

6 Ashdod nam ga minadungde RAMPAUBE saja peu sütgai. Pa Ashdodme nah penuide twagwa kebam namdung de ngkapdi nah penuide keteeizam le teikeherei sütgai. 7 Ashdod ga minadung cide tei kedi ngau luge, penui rangdi, "Israel Tinggwang samkakbung anui taiga bam dau lakta, kedanemene pa anuide nah anui rabe Dagon de saja peu zeu kecune." 8 Cine Ashdodme Philistia ga hegwang pelane de Ashdod gage qugai lu; penui penui dage rangdi, "Israel Tinggwang samkakbung de teu anui daitei laino?" Penui keligai, "Peu Israel Tinggwang samkakbung de Gath namdi ga pwagwang lu." Cine penui Israel Tinggwang samkakbung de cika pwa miedi. 9 Dede penui cika pwagwang luge, RAMPAUBE namdibe de saja peugai, iciu eh penui peusui tei kegwak sütdi. Pa keteeizam le pwa Gath namdi ga minadung hena gade kecing kecang de teikeherei sütgai. 10 Cine penui Tinggwang samkakbung de Ekron nam gage langgai di. Dede Tinggwang samkakbung Ekron nam ga gwanglu herizi, Ekronme sah cuhdi, "Penui Israel Tinggwang samkakbung de anui nah anui minadung de teitsetdi kerane anuida pwagwang gaida." 11 Cine penui Philistiame gwangdung leune de qugai; penui penui dage rangdi, "Israel Tinggwang samkakbung de langgi dilu, nah peu cide pe deudi ga cailigwang dilu, iciude cide anuide nah anui minadung de teitsetdi melu kerane." Tinggwang saja peu süt kegaine namdi leune ga kengngi bamdi.

Samkakbung Israel da cailikegwang

1 RAMPAUBE samkakbung de Philistinme deudi ga kei hena ge bamdi. 2 Cidau Philistin ga minadung cingkumedung nah rekamedung de qugai; penui penui dage rangdi, "RAMPAUBE samkakbung de teu anui daitei laino? Anui dainzwa cide pe deudi gage langcaili gai maisia bi ranglia lo." 3 Cingkumedung nah rekamedung keligai, "Nnui Israel Tinggwang samkakbung de langcaili dizie cai, mtamapeu gede si mene langgai so; kehei teide pecu kemau reca langgai beulu. Iciude nnui mateei yilu zie, nah daitei pa cu kecang nnuide saja peu bambi kecu nnui cilu zie."

10 Mipeidung penuide rang kebeunzwa teilu; penui nciu pwa kebam ketumpui kenade hekwen gari gage keu gailu, nah penai na kenade hekaune ki gage bangdi. 11 Penui RAMPAUBE samkakbung de hekwen gari de gage kailu, nah kecak za nah penui keteeizam rehi teikelude kaipwa kebam tsingbung de si eh. 12 Ketumpui kena Beth Shemesh gage mzuizang eh tet gaidi. Penai puidiki gega mrung jüja tet nghang, nah penai zetle mede hile nreu pie ma. Philistinme reu kedimedung Beth Shemesh deurai kecang penai cai suimie. 13 Cu Beth Shemesh langkie ga minadung wheat luhlüt la, nah penui ngang cuh pie samkakbung de ngau luge, penui suiyi sütdi. 14 Hekwen gari de Beth Shemesh mepei Joshua luh ga gwanglu nah cika mtakdi. Cika tsurakang disüt ge bam, nah penui gari de gade tsing bi kecaidi delwe ketumpui kenade RAMPAUBE dage keru reca teigai beudi. 15 Levime RAMPAUBE samkakbung de pwa nghunglu, kecak miedung kebam tsingbung de si eh, delwe cidungde tsurakang disüt kecude reu gage kailu. Cipaunai Beth Shemesh ga mipeidung keru recadung nah ratakdung RAMPAUBE dage teigai beu.

1 Cine Kiriath Jearim ga minadung gwang RAMPAUBE samkakbung de pwalu, delwe lamlwatu ga lungh kebambe Abinadab ki gage pwa gwang gaidi. Penui pe napei Eleazar depeu RAMPAUBE samkakbung de rengei kerane tei mcilu.

Samuel ne Philistinme de Mizpah gade ngamkelu

2 Samkakbung Kiriath Jearim ga peting ketie ge bamdi, mmi ngkai ge. Israelme pelane hei eh hapdi nah RAMPAUBE da nreugwang neudi.

12 Cu hegwangpei David da sam gwangdi, "RAMPAUBE ne Obed Edom ki nah peda kebam mapelane samlam beu Tinggwang samkakbung de ziemne." Cine David mielu nah Obed Edom ki gade Tinggwang samkakbung de David namdi ga pung gwanglu pe suiyi eh. 13 RAMPAUBE samkakbung pung kelame pikiet herok tetpet kedi cai, pa hetumseu nah hetumna pelui keyi ge ratak teigai. 14 David pe kengking pelane teu RAMPAUBE dwa gade helim lim; pa linen hekeutupai nage rünne bahla. 15 Iciu eh David nah Israel leuhme pelane sah eh telui kwa eh RAMPAUBE samkakbung de pung gwanglu.

Samkakbung kerecaki ga teugwang kelu

1 Pecai Solomon Israel ga hangkiame, pautsa peumedung pelane, nah Israelme kelak muiteudung de Jerusalem ga pe dwa gage qu hekwa gailu, RAMPAUBE samkakbung de David namdi, zion gade pung gwanglu kerane.✝ 2 Israelme peidung pelane Ethanim bekei cide kei hena bekei, hengyi kecu ga Hegwangpei Solomon dwa ga gwang ngkwalu. 3 Israel ga hangkiame pelane de gwanglu, delwe cingkume samkakbung de pwalu. 4 Penui RAMPAUBE gu samkakbung de pwa gwang lu, nah ngkwa kera paiki nah paiki ga kebam kemci niadung pelane de. Cingkume nah Levime ne aidung de pwa gwang lu. 5 Hegwangpei Solomon nah Israelme ngkwa kebamme pelane samkakbung dwa ga gwang ngkwalu, meurün nah hetumseu peikap gai kelak ge ratak teigai eh. 6 Cingkume RAMPAUBE samkakbung de pebam ga, ge ki helungbe bung de ga, mci tube ni de gage pwa gwang gailu, Cherubim hesiu kang gage.✝ 7 Kedanemene cherub kena de penai hesiu samkakbung kai kebam ni ga kecang kezang pet, delwe samkakbung de nah samkakbung kepwa pakdung de halu. 8 Kepwa pakdung de au tie zu kecune petündung helungbe bung kemci ni gade ngaula, dede hegwale de au ngaula ma. Henai kecang de cidungde cika bamla. 9 Samkakbung de ga au Israelme Egypt gade kempet dau RAMPAUBE penui de ngngwa samkak kelu dau Moses ne Horeb gade tangtsukang kena cikage kekai de gwale magede gah. 10 Cinzwa eh cingkume kemci ni de gade mpet kedi dau, hemwa RAMPAUBE kerecaki de puidi. 11 Cingkume hemwa de ziemne penui ta teigai lakdi, kedanemene RAMPAUBE kendu de pe ki pui kedine.✝

14 A da cailigwanglo, masang kemak minadung!—aide RAMPAUBE ne ndu kegai—Ih n nahpei!

Ih nnuide renam ramsang gade hangge nah paupak ramsang gade hangna de ngngwa luzie, nah Ih nnuide Zion deutu gage ngngwa cailigwang zie! 15 Ih nnuide a samzai ketei hegwangme peu zie, nah penui maci nah kecikecet teu eh nnuide teu zie. 16 Cidau nnui lungh hing luzie nah hangdeu be ga petsi bui luzie—aide RAMPAUBE ne ndu kegai, mina "RAMPAUBE samkak bung!" ha de rang silak. ‘Ma aide penui mlung ga gwang silak mede penui nsungta dizie; cide teu maisia ta kedi kecang dizie mede penui keda gede tei lak.’

Kideube paiki gade kereca

1 Samkakkelu keraibe de kereca ziemne nah kideu gu heni kemci ge ziemne hezaidung bam. 2 Recapaiki ge teilu. Keraibe bung ga, mitaubam, taktyeibam, nah tei mci kelu tangku bam, cide de kemci ni lie qula.✝ 3 Kehezu pai pe kenabe caiga kibung kedage bam, cide de kemci nidung kakgade mcitube lie qula.✝ 4 Cika marim kehengui keru ziemne kecak recabam ge bam. Samkakbung kecak le cumkelu bung gede bam. Cipau lungga manna kai kenzeu kecakbung de, Aaron tuitie penei bwapet kedide, nah samkakkelu tangtsu kwak de bam. 5 Samkakbung peuga cherubim kendu ne ratak tei kebeude gumpwa bam. Cipaude ha cu rangsiakte kera peting mereu.✝

19 Pecai Tinggwang kerecaki tinggim ga kebam de ngkeigai nah samkakbung de cika kebam Ih ngau. Cika tinghepik, tingceu kengyim, nnuihteu, nah tangheukei sütdi.✝