Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
"किक्करे काठा करै बणाऐं एक मणशू, सह लोल़ी ढाई हाथ लाम्मअ, डेढ हाथ उछ़टअ अर डेढ हाथ बिरलअ बणअ। तेखअ महल़ै तेता बागा-भितरा का च़ोखै सुन्नैं करै अर मणशू प्रैंदै लाऐ च़ऊ बाखा सुन्नें काणस। सुन्नें च़ार कल़ोलै बणाईं लाऐ तिन्नां मणशूए च़ऊ पाऊआ दी। तेखअ बणाऐं किक्करे काठे दूई लोहल़ी अर तिन्नां बी महल़ै सुन्नैं करै। तिन्नां लोहल़ी पाऐ मणशू दी दुही बाखा लाऐ दै तिन्नां कल़ोलै दी, तेता करै हणअ सह मणशू कान्हा च़कणा लै। एकी बारी ज़ांऊं तिंयां लोहल़ी कल़ोलै दी लाई हेरी, तेखअ निं तिन्नां मणशू का पोर्ही काढी।
"ज़ुंण शिला मुंह ताखा दैणीं, तेथ हणअ मेरअ बधान अर हुकम लिखअ द, तिन्नां डाहै तेऊ मणशू भितरी।
"तेखअ बणाऐं तेऊ मणशू लै ढाई हाथ लाम्मअ अर डेढ हाथ बिरलअ ढक्कण, तेऊ बी महल़ै च़ोखै सुन्नैं करै।
"तेखअ बणाऐं सुन्नअ गल़ाऊई-ढल़ाऊई करै दूई फैंखा आल़ै करूब नाओंए स्वर्ग दूत, संघा लाऐ तिन्नां ओर्ही-पोर्ही ढक्कणे दोहरै मुंडै। तिन्नां करूबे फैंख बणाऐं मणशूए ढक्कणा प्रैंदै इहै कि तिन्नें फैंख लोल़ी मणशूए ढक्कणा प्रैंदै सारै दी फुआरुऐ दै हुऐ अर तिंयां करूब लोल़ी ढक्कणा बाखा स्मोहरै रहै। तेखअ तिंयां शिला ज़ेथ मंऐं हुकम आसा लिखै दै, तिंयां दैणीं मुंह ताखा, तिन्नां डाहै मणशू भितरी संघा लाऐ तेऊ ढक्कणा मणशू प्रैंदै।
तेखअ करनअ मुंह तेऊ करारे मणशू प्रैंदै तिन्नां दूई करूबा जैंदरी एछी, संघा खोज़णअ ताखा मुंह सारअ बधान कि मेरै इज़राईली मणछा किज़ै करनअ अर किज़ै निं करनअ।
तेखअ बणाअं बसलेलै किक्करे काठो ढाई हाथ लाम्मअ, डेढ हाथ बिरलअ अर डेढ हाथ उछ़टअ मणशू।
तेखअ बोलअ बिधाता मोसा लै इहअ, "तूह करै मेरै मेल़-ज़ोल़े खिम्भा साज़ै च़ैत्रै नऊंऐं संबते धैल़ी खल़अ। तेखअ डाहै करारो मणशू बधान लिखी दी शिला संघी खिम्भे मांझ़लै पल्दे नील़ै।
बधान लिखी दी तिंयां दूई शिला डाही करारे मणशू भितरी अर मणशू दी लोहल़ी लाई करै डाहअ तेथ प्रैंदै पापो प्राश्त करनैओ ढक्कण। तेखअ आणअ करारो मणशू पबित्र खिम्भा भितरा लै संघा डाहअ खास पबित्र ज़ैगा लागै दै पल्दै पिछ़ू तेते नील़ै। ईंयां गल्ला किई तिन्नैं तेही ई ज़िहअ बिधाता मोसा लै हुकम किअ त।
ज़ांऊं मोसा बिधाता संघै गल्ला करदअ मेल़-ज़ोल़े खिम्भा दी डेऊअ, तेऊ शूणैं शाजतीए मणशू प्रैंदै प्राश्ते ढक्कणा प्रैंदे दूई करूबा बाती बिधाते बोल ज़ुंण तेऊ संघै गल्ला करदअ थिअ लागअ द, मोसा शूणीं तिंयां सोभै गल्ला।
तेखअ ज़ांऊं तिंयां परमेशरे सीनाई नाओंए धारा का आजू डेऊऐ, तिंयां रहै पैदल चिई धैल़ी तैणीं आजू हांढदै लागी। इना चिई धैल़ै रहअ बिधातो करारो मणशू तिन्नां सोभी का आजू बशैघ करना लै ज़ैगा लोल़अ आजू हांढदअ लागी।
ज़ांऊं तिंयां बशैघा बाद खिम्भ खोल्ही आजू लागा तै हांढदै, बिधातो एक बादल़ रहा त तिन्नां प्रैंदै घोर्हुई।
ज़ेभै-ज़ेभै मणशू आजू हांढणा लै तैर्हिआ त, तेभै-तेभै बोला त मोसा इहअ, "हे बिधाता, उझ़ू, तेरै दुशमण लोल़ी ओर्ही-पोर्ही छिंघुई ज़िहै आऐ तिहै ई बापस ठुर्है।"
ज़ेभै करारो मणशू खल़्हिया त, तेभै-तेभै बोला त मोसा, "हे बिधाता, हज़ारो, लाखों इज़राईली मांझ़ा लै एछ फिरी।"
तेखअ बोलअ बिधाता मोसा लै, "इज़राईलीए बारा गोत्रो कर झाल़अ संघा मांग तिन्नें बारा सैणैं का बारा शोठी, तिन्नां शोठी दी लिखै हरेकी गोत्रे साबै तिन्नें मूल़ मणछो नाअं। पर लेबी गोत्रे शोठी दी लिखै हारणो नाअं, संघा झाल़ै तिन्नां सोभी शोठी ओर्ही, तेखअ डाहै तिन्नां मेल़-ज़ोल़े खिम्भा भितरी करारे मणशू आजू ज़िधी हुंह तम्हां संघै गल्ला करा। तेखअ ज़हा गोत्रे शोठी दी टिप्पा फुटे तेऊ गोत्रो मणछ छ़ांटणअ मुंह आप्पू लै प्रोहत। तेखअ ज़िहै ईंयां इज़राईली तम्हां लै बखर्दै हआ लागै दै, सह गल्ल बी हणीं आझ़ा बाद गोधी का खतम।"
ज़िहअ बिधाता हुकम किअ त, मोसा खोज़ी तिंयां गल्ला सोभी ई इज़राईली का, तिन्नें बारा सैणैं दैनी तेऊ का आपणैं-आपणैं गोत्रे मूल़ मणछो नाअं लिखी बारा शोठी अर हारणे शोठी बी थिई तिन्नां ई शोठी जैंदरी। मोसा निंईं तिंयां सोभै शोठी मेल़-ज़ोल़े खिम्भा भितरा लै, संघा डाही तिंयां तिधी करारे मणशू सेटा ज़िधी बिधाता प्रगट हआ त।
दुजै धैल़ै ज़ांऊं मोसा शाजतीए खिम्भा भितरी डेऊअ, हारणे शोठी ज़ुंण लेबी गोत्रे नाओंऐं थिई, तेथ थिई टिप्पा फुटी दी अर डोडी-पाची अर बदाम लागै दै।
मोसा आणी तिंयां सोभै बारा शोठी मेल़-ज़ोल़े खिम्भा भितरा का बागै संघा रहैऊई तिंयां सोभी इज़राईली का, तेखअ ढाकी आपणीं-आपणीं शोठी बछ़ैणीं करै पोर्ही।
पर बिधाता बोलअ मोसा लै, "हारणे शोठी ढाक ओर्ही अर एता डाह करारे मणशू आजू ताकि अह तिन्नां मणछा लै चतैनगीओ नछ़ैण होए ज़ुंणी मेरअ बरोध किअ। इना लै बोला हुंह कि ऐबै पाऐ आजू मेरै बारै बखर्ने छ़ाड़, इहअ निं हआ कि हुंह तम्हां पठी खतम करूं!"
ज़िहअ बिधाता हुकम किअ, मोसा किअ तिहअ ई।
सह थिई लऊंणींए रीत, अर भराल़ै ती जरदण नदी खास्सी भर्हुई दी। ज़ांऊं इज़राईली जरदण नदी पार टपणा लै आपणैं खिम्भ झाल़ै, प्रोहत डेऊऐ करारे मणशू च़की तिन्नां सोभी का आजू। ज़ेही ई तिन्नैं जरदण नदीए पाणीं दी गंईं डाही, जरदण नदीओ पाणीं खल़्हुअ तिधी तेथ बाझ़अ सारतान नाओंए ज़ैगा नेल़ आदम नगरी उंधै सारै पाणीं दी शाफल़। तिधा उंधै अराबा समुंदर ज़ेता लै खार समुंदर बी बोला, सह पाणीं शुक्कअ पठी अर सारी इज़राईली परज़ा टपी जरदण नदी पार जेरिहो नगरी नेल़ रेगीस्तानै। बिधाते प्रोहत रहै करारे मणशू च़की जरदण नदी मांझ़ा-मांझ़ी शुक्की ज़ैगा तेभै तैणीं खल़्हुई ज़ेभै तैणीं सोभै इज़राईली मणछ जरदण नदी पार टपी निं मुक्कै।
ज़ांऊं प्रोहत बिधाते करारे मणशू संघै पार बाखा बाढै पुजै, नढैऊऐ लागअ जरदण नदीओ पाणीं आजू बहूंदअ अर दरैऊए बाढ हुऐ भिई तलमल्लै।
इज़राईली डरै ती जेरिहो नगरीए प्रऊल़ी हूल़ी डाही दी, नां कुंण नगरी भितरी एछी सकदअ त अर नां बागै डेऊई सकदअ त। तेखअ बोलअ बिधाता ज़ैहसू लै, "जेरिहो नगरी लाई मंऐं राज़ै अर तेऊए सैना संघी तेरै बशै करी। तूह अर तेरी सैना करै छ़हा धैल़ी तैणीं धैल़ नगरी फेर धैल़ीए एक फेरी दैई। सात प्रोहत हांढै करारे मणशू आजू-आजू गाभे शगैठे नर्शिंगै लई। तेखअ दैऐ सातुई धैल़ी नगरी फेर सात फेरी अर तिंयां प्रोहत रहै नर्शिंगै बाज़दै लागी। ज़ांऊं प्रोहत खास्सी घल़ी तैणीं कोहरै शाहै नर्शिंगै बाज़े, तेता शूणीं करै सारी परज़ा ज़ोरै-ज़ोरै ज़ै-ज़ैकार अर तेभी ढुल़णीं नगरी फेर फिरदी दुआल गोधी का धरनीं। तेखअ सका तेरी सैना ज़िधी आसा तिधा ई का तिन्नां सम्हनै उझै उखल़ी नगरी भितरा लै ठुर्ही।"
नूने शोहरू ज़ैहसू शादै प्रोहत संघा किअ तिन्नां लै हुकम, "बिधाते करारो मणशू च़का अर तम्हां मांझ़ै हांढा सात ज़ण्हैं रिठे सात नर्शिंगै लई तेता आजू-आजू।" तेखअ किअ ज़ैहसू लोगा लै हुकम कि करारे मणशू पिछ़ू एछा नगरी फेर फेरी दैई अर अस्त्र-शस्त्रा आल़ै शूरबीर हांढा बिधाते करारे मणशू आजू।
प्रोहतै बाज़ै नर्शिंगै अर तेता शूणीं लागै सोभै लोग ज़ोरै-ज़ोरै ज़ै-ज़ैकार करदै अर नगरी फेर-फिरदी दुआल ढूल़ी गोधी का धरनीं अर इज़राईली सारी सैना पेठी फेरा-फेर ज़िधी तिंयां थिऐ, तिधी का नगरी भितरी संघा किअ तैहा सारी नगरी कबज़अ।
पलिश्ती आऐ दल बणाईं इज़राईली संघै जुधा लै। अर तिधी हुअ खास्सअ घणअ जुध अर पलिश्ती पाऐ च़ार हज़ार इज़राईली मारी। ज़ांऊं इज़राईली सैना आपणैं डेरै बापस पुजी, इज़राईली सैणैं लागै इहअ बोल्दै, "आझ़ बिधाता पलिश्ती हाम्हां का किल्है दैनअ ज़ितणैं? डेओआ, बिधातो करारो मणशू आणा शिलोह का इधा लै ताकि बिधाता हाम्हां संघै रहे अर सह हाम्हां म्हारै दुशमणा का बच़ाऊए।"
तिन्नैं छ़ाडै समाद लई शिलोह लै दूत कि करारो मणशू आणा शिलोह का इधा लै। किल्हैकि स्वर्गे सारी सैने मालक बिधाता ज़हा का सारअ बल आसा, तेऊओ आसन थिअ करारे मणशू प्रैंदै फैंखा आल़ै करूब स्वर्ग दूता प्रैंदै। एली प्रोहते दूई शोहरू हुपनी अर पिनहास बी आऐ बिधाते करारे मणशू संघै।
ज़ांऊं बिधाते करारो मणशू तिधी पुजअ, इज़राईली किअ खुशी दी इहअ ज़ोरै ज़ै-ज़ैकार कि तिधी लागी धरती बी च़ुक्कदी। पलिश्ती लागै तेता शूणीं इहअ बोल्दै, "इना इब्रानीए डेरै शूणां केही लैल़ा लाई! एतो किज़ै मतलब होए?" तेखअ खोज़अ तिन्नां का कुंणी कि इनो आसा बिधाते करारो एक मणशू सह पुजअ इब्रानी सैने दला दी।
पलिश्ती पल़अ हैल़अ अर तिंयां लागै इहअ बोल्दै, "तिन्नें दला दी आअ ऐबै तिन्नों देअ बी! ऐबै हारै हाम्हैं! आईओ! इहअ निं आझ़ा का पैहलै कधि हुअ! आईओ! इने महान देअआ का निं हाम्हां कोहै बच़ाऊई सकदअ, अह आसा सह ई बेघै बलबान देअ ज़ुंणीं मिसरी लोगा लै खास्सी आफ़ता पाई सज़ा दैनी ती! भाईओ, हिम्मत करा! असली मर्धा ज़िहअ जुध करै, इहअ निं हआ कि हाम्हैं इब्रानी लोगे गलाम होए ज़िहै तिंयां म्हारै गलाम थिऐ। ऐबै करा जुध ज़बर ज़ोर लाई!"
तेखअ चुटै पलिश्ती जुधा लै इहै कि तिंयां ज़ितै इज़राईली का भिई, जुधा दी हुई घोर काट-फणाटी अर पलिश्ती पाऐ इज़राईली सैना मांझ़ै कोऐ तिह हज़ार मारी! बाकी बच़ै दै इज़राईली ठुर्है जुधा का हारी आपणैं डेरै लै बापस। बिधातो करारो मणशू बी निंयं पलिश्ती इज़राईली का लुटी आप्पू संघै अर एली प्रोहते दूई शोहरू हुपनी अर पिनहास बी पाए मारी।
बिधाता पाई अशदोद नगरीए लोगा अर तिन्नां ओरी-पोरी रहणैं आल़ै लोगा लै घोर आफ़ता। तिन्नां निखल़ी घेरी बडी-बडी गिल्टी। खिरी लागै अशदोद नगरीए लोग इहअ बोल्दै, "इज़राईलो देअ आसा हाम्हां अर म्हारै देअआ लै सज़ा दैंदअ लागअ द। एऊ मणशू निं इधी आप्पू जैंदरी डाहा, एऊ काढा पोर्ही।"
तेखअ शादै पलिश्ती सोभै पांज़ा राज़ै समाद दैई अशदोद नगरी लै, संघा पुछ़अ तिन्नां का इहअ, "इज़राईलीए देअए एऊ करारे मणशू लै ऐबै किज़ै करनअ?"
तिन्नैं बोलअ, "एऊ डाहा गात नगरी पजैल़ी।" ज़ांऊं तिन्नैं करारो मणशू पिछ़ू फिरी गात नगरी पजैल़अ, तिधी पुजदी पाई बिधाता गात नगरीए लोगा लै बी घोर आफ़त। गात नगरी बी निखल़ी होछ़ै का प्रोढै तैणीं सोभी पलिश्ती गिल्टी। तेखअ निंयं तिन्नैं तिधा का करारो मणशू अक्रोन नगरी लै। ज़ेतरी तिधी पुजअ निं, तैहा नगरी रहणैं आल़ै पलिश्ती गऐ लैल़ा-पकारा लाई इहअ बोल्दै लागी, "ऐबै हेरअ अह इज़राईलीए देअओ मणशू हाम्हां अर म्हारै लोगा मारना लै इधी पजैल़ी!"
तेखअ शादै अक्रोन नगरीए पलिश्ती सोभै राज़ै भिई संघा बोलअ तिन्नां लै, "इज़राईलीए देअए एऊ मणशू काढा एता का पोर्ही, संघा पजैल़ा एता तैहा नगरी ज़िधी एऊए ज़ैगा आसा, तिहअ करै जाणैं हाम्हैं अर म्हारै लोग मरनै का बच़ी।" सारी नगरी ती लेर-पकार मच़ी दी किल्हैकि बिधाता पाई तिन्नां लै घोर आफ़त।
बिधाते करारो मणशू रहअ पलिश्ती देशै साता भिन्नैं तैणीं। तेखअ शादै पलिश्ती आपणैं देअए पज़ैरै अर मणशाण झ़ैऊंणै आल़ै संघा पुछ़अ तिन्नां का, "बिधाते करारे मणशूओ हाम्हां किज़ै करनअ? हाम्हां का खोज़ा कि अह एते आपणीं ज़ैगा केऊ साबै पजैल़णअ अर एते प्राश्त करना लै किज़ै लागणअ दैणअ?"
तिन्नैं बोलअ इहअ, "ज़ै तम्हैं इज़राईलीए देअओ करारो मणशू बापस छ़ाडे, तेता संघै लऐ मणशू इधा लै आणने पापो प्राश्त करना लै दोश बल़ी ज़रूर दैई। इहअ करै जाणैं तम्हैं बमारी का नरोगै हई। तेखअ जाणअ तम्हां का थोघ लागी कि इज़राईले देअऐ तम्हां लै एही घोर आफ़त किल्है पाई।"
ज़ेही तिन्नैं पज़ैरै अर मणशाण झ़ैऊंणै आल़ै सलाह दैनी, पलिश्ती किअ तिहअ ई। तिन्नैं आणी दूई लाहुदी सूई दी गाऊई संघा ज़ुंडी तैहा कोरी गाड्डी दी अर तिन्नें होछ़ै बाछ़ू डाहै खुढै हूल़ी। तेखअ बशैल़अ तिन्नैं बिधाते करारो मणशू तैहा गाड्डी दी अर तेथ संघै तिंयां सुन्नें पांज़ गिल्टी अर तेथ संघै तिंयां पांज़ मुश्शे मुहुर्ती बी डाही एकी होरी दरोठू भितरी गाड्डी दी। तेखअ छ़ेल़्ही सह गाड्डी बेथ-शमेश नगरीए बाता अर तिंयां गाऊई रही तैहा ई बाता आज़री हांढदी लागी अर तिंयां निं तैहा बाता का ओर्ही नां पोर्ही फिरी। तिंयां पांज़ पलिश्ती राज़ै डेऊऐ तैहा गाड्डी पिछ़ू-पिछ़ू बेथ-शमेश नगरीए सिऊंआं तैणीं भाल़ै।
बेथ-शमेश नगरीए लोग तै तेऊ खागै कणका लऊंदै लागै दै। ज़ांऊं तिंयां उझै बाखा भाल़अ, तिन्नां का शुझुअ करारो मणशू अर तेता भाल़ी हुऐ तिंयां खास्सै खुशी। सह गाड्डी आई बेथ-शमेश नगरीए ज़ैहसू नाओंए मणछे खेचा लै अर गाड्डी खल़्हुई तैहा ज़ैगा ज़िधी बडी टोल्ह आसा। तिधी झाल़्हुऐ नगरीए लोग अर तिन्नां संघै तै लेबी बी। लेबी डाहअ सह करारो मणशू गाड्डी का थुआल़ी तैहा बडी टोल्हा प्रैंदै अर तेता संघै ज़ुंण तिंयां सुन्नें गिल्टी अर सुन्नें मुश्शै बी डाही टोल्हा प्रैंदै। तिन्नां संघै थोल़ै आदमी फाल़ी सह गाड्डी झ़ुका लै अर तिंयां गाऊई किई बिधाता लै हूम बल़ी। तैहा ई धैल़ी किऐ बेथ-शमेश नगरीए लोगै बिधाता लै होर बी हूम अर मेल़-ज़ोल़े बल़ीदान।
तेखअ पुजै किर्यात-ज़रीम नगरी बस्सै दै इज़राईली बेथ-शमेश। तिधा का निंयं तिन्नैं बिधाते करारो मणशू उझै किर्यात-ज़रीम नगरी लै, संघा डाहअ अबीनादाब नाओंए मणछे घअरै, तेऊओ घअर त धारठी प्रैंदै। तिन्नैं किई अमीनादाबे शोहरू एलीआजरे शुधी संघा डाहअ करारो मणशू तेऊ का सभाल़ी।
बिधाते करारो मणशू रहअ खास्सी साला किर्यात-ज़रीम कोई बिहा साला तैणीं। एतरी साला रहै इज़राईली बिधाता का लेर-पकार पाई मज़त मांगदै लागी।
ज़ांऊं राज़ै दाबेदै शूणअ कि बिधाते करारे मणशू करै हुई ओबेद-एदोमे घअरै सोभी गल्ला दी खास्सी बर्गत। तेखअ डेऊअ दाबेद संघा आणअ करारो मणशू दाबेदपूर नगरी लै, तैहा खुशी मनाऊंईं तिन्नैं बडी जाच। ज़ांऊं बिधाते करारे मणशू च़कणै आल़ै लेबी छ़ह गंईं आजू हांढै, दाबेदै किअ एक बल्द अर आपणअ आप्पै धाचअ द बाछ़ू बल़ीदान। दाबेदै त घेरी बाछो च़ोल़अ अर गाची बान्हीं दी संघा त बिधाते अदर करना लै नाच़दअ लागअ द। इहअ करै आणअ दाबेदै अर होरी सोभी इज़राईली बिधाते करारो मणशू एरुशलेम नगरी लै ज़ै-ज़ैकार करदी अर नर्शिंगै बाज़दी।
तेखअ शादै राज़ै सुलैमानै सोभी गोत्र अर टोली का इज़राईली सैणैं एरुशलेम नगरी लै एही गल्ला करना लै कि बिधाते करारो मणशू निंणअ सियोन दाबेदपूर गहल़ा का बिधाता लै बणाऐं दै भबना लै। इज़राईली सोभ सैणैं हुऐ छ़ानींए थैरा बाती शऊजै राज़ै सुलैमाना सेटा कठा। ज़ांऊं तिधी सोभ इज़राईली सैणैं पुजै, प्रोहतै च़कअ बिधाते करारो मणशू संघा पजैल़अ बिधाते भबना भितरी। प्रोहतै अर लेबी निंयैं करारे मणशू संघा तिंयां सोभ पबित्र भांडै अर सारअ समान ज़ुंण मेल़-ज़ोल़े खिम्भा दी थिऐ। खिम्भ बी निंयं तिन्नैं खोल्ही करै उझै। राज़अ सुलैमान अर इज़राईली टोली का ज़ेतरै बी लोग तिधी तै आऐ दै, तिंयां लागै करारे मणशू आजू हांढदै अर बाता काटै तिन्नैं एतरै खास्सै रिठ अर होर पशूए हेल़्ही कि तिन्नां निं कुंण गणी सकदअ त। तेखअ पजैल़अ प्रोहतै सह करारो मणशू बिधाता लै बणाऐं दै भबना भितरी तैहा ज़ैगा ज़ेता लै खास पबित्र ज़ैगा बोला तै, संघा डाहअ तिन्नां करूब नाओंए स्वर्ग दूते फैंखा हेठै बशैल़ी। तिंयां करूबे फैंख तै इहै कि करारो मणशू आअ तेते लोहल़ी संघी तेथ हेठै। करारे मणशू दी लाई दी लोहल़ी ती एही लाम्मी कि तिंयां जाआ ती भितरी खास पबित्र ज़ैगा आजू सम्हनै का शुझुई पर होर्ता का निं तिंयां किधी का शुझदी ती। तिंयां लोहल़ी आसा आझ़ तैणीं बी तिधी। करारे मणशू भितरी निं तिन्नां दूई पात्थरे शिला सुआई होर किछ़ै आथी त ज़ुंण तेथ होरेब धारा का एछी मोसा गूरै तधू डाही ती ज़धू बिधाता इज़राईली संघै मिसर देशा का एछदी बारी करार किई ती।
ज़ांऊं प्रोहत खास पबित्र ज़ैगा का बागै निखल़ै, तिधी घोर्हुऐ बिधाते भबना फेर घणैं बादल़। तिन्नां बादल़ा करै निस्सअ बिधाते भबनै च़ाकरी करनै आल़ै प्रोहते खल़ै टेखुई किल्हैकि बिधाते भबनै लाई बादल़ा जैंदरी लागअ धुप्पै ज़िहअ झ़ामण अर बिज़ल़ीए झ़प्प-तल़प्पी।
विश्वास घाती लोगो, मुंह सेटा लै एछा फिरी,
तम्हैं आसा मेरै अर हुंह बिधाता आसा थारअ मालक।
मुंह छ़ांटणैं तम्हैं हर नगरी का एक-एक,
हर टोली का छ़ांटणैं मुंह तम्हां मांझ़ै दूई-दूई।
तम्हैं आणनैं मुंह सियोन धारा लै बापस फरेऊई।
तम्हां प्रैंदै राज़ करनै आल़ै डाहणैं मुंह इहै ज़ुंण मेरअ हुकम मना।
तिन्नां करनअ तम्हां प्रैंदै अक्ल अर समझ़ डाही राज़।’
"तेऊ ज़मानै हणैं तम्हैं एऊ देशै खास्सै, तेखअ निं लोगा मेरै करारे मणशूए बारै गल्ला करनी। तिन्नां निं एते बारै सोठणअ आथी अर नां तिन्नां एते आद डाहणीं, तिन्नां निं एते ज़रुरत ई पल़णीं अर नां तिन्नां इहअ होर बणाणअं।
पैहली करारा दी दैनी परमेशरै इज़राईली मणछा लै च़ाकरी करने बिधी अर तेऊ बोलअ तिन्नां लै पृथूई दी च़ाकरी करने पबित्र ज़ैगा बणाणां लै। मतलब तिन्नैं बणाअं एक खिम्भ अर तेथ ती दूई पांडा, बाघली पांडा त सदीअ अर च़ौकी अर भैंट दैनी दी रोटी, अर तेता लै बोला तै पबित्र ज़ैगा।
तेखअ त तिधी एक पल्दअ अर तेथ पिछ़ू ती दुजी पांड ज़ेता लै खास पबित्र ज़ैगा बोला तै।
तैहा पांडा ती सुन्नैं करै मल़्ही दी बेदी अर धनैरअ, अर च़ऊ बाखा का सुन्नैं करै महल़अ द काठो मणशू ज़हा लै करारो मणशू बोला तै, अर तेथ त खाण करै भरअ द एक सुन्नेंओ पटारू अर हारणे शोठी ज़ेथ नऊंईं टिरा बी थिई निखल़ी दी अर तिंयां करारे तगती।
तेता प्रैंदै तै प्रतप्पा आल़ै करूब, तिन्नें फैंख तै मणशूए ढक्कणा प्रैंदै फुआरुऐ दै ज़ेता लै प्राश्ते ज़ैगा बोला, इना गल्ला बाढै खोज़णेंओ बगत निं एभै आथी।
परमेशरो भबन ज़ुंण स्वर्गै आसा, सह पबित्र ज़ैगा खोल्ही अर तेऊए भबनै शुझुअ तेऊए करारे मणशू, बिज़ल़ी, बैण, गुल़ूबिज़ल़ू अर ज़ाज़री हुई संघा पल़ै बडै-बडै शरू।