1 तिन्‍नां धैल़ै हुअ इहअ कि पलिश्ती लोग हुऐ इज़राईली संघै जुधा लै कठा। शमूएल गूरै दैनअ इज़राईली लै समाद अर तिंयां बी निखल़ै पलिश्ती संघै जुधा लै, तिन्‍नैं पाऐ एबीनेज़र आपणैं डेरै अर पलिश्ती तै अपेक नाओंए ज़ैगा आपणैं डेरै पाऐ दै। 2 पलिश्ती आऐ दल बणाईं इज़राईली संघै जुधा लै। अर तिधी हुअ खास्सअ घणअ जुध अर पलिश्ती पाऐ च़ार हज़ार इज़राईली मारी। 3 ज़ांऊं इज़राईली सैना आपणैं डेरै बापस पुजी, इज़राईली सैणैं लागै इहअ बोल्दै, "आझ़ बिधाता पलिश्ती हाम्हां का किल्है दैनअ ज़ितणैं? डेओआ, बिधातो करारो मणशू आणा शिलोह का इधा लै ताकि बिधाता हाम्हां संघै रहे अर सह हाम्हां म्हारै दुशमणा का बच़ाऊए।"

4 तिन्‍नैं छ़ाडै समाद लई शिलोह लै दूत कि करारो मणशू आणा शिलोह का इधा लै। किल्हैकि स्वर्गे सारी सैने मालक बिधाता ज़हा का सारअ बल आसा, तेऊओ आसन थिअ करारे मणशू प्रैंदै फैंखा आल़ै करूब स्वर्ग दूता प्रैंदै। एली प्रोहते दूई शोहरू हुपनी अर पिनहास बी आऐ बिधाते करारे मणशू संघै।✝

5 ज़ांऊं बिधाते करारो मणशू तिधी पुजअ, इज़राईली किअ खुशी दी इहअ ज़ोरै ज़ै-ज़ैकार कि तिधी लागी धरती बी च़ुक्‍कदी। 6 पलिश्ती लागै तेता शूणीं इहअ बोल्दै, "इना इब्रानीए डेरै शूणां केही लैल़ा लाई! एतो किज़ै मतलब होए?" तेखअ खोज़अ तिन्‍नां का कुंणी कि इनो आसा बिधाते करारो एक मणशू सह पुजअ इब्रानी सैने दला दी।

7 पलिश्ती पल़अ हैल़अ अर तिंयां लागै इहअ बोल्दै, "तिन्‍नें दला दी आअ ऐबै तिन्‍नों देअ बी! ऐबै हारै हाम्हैं! आईओ! इहअ निं आझ़ा का पैहलै कधि हुअ! 8 आईओ! इने महान देअआ का निं हाम्हां कोहै बच़ाऊई सकदअ, अह आसा सह ई बेघै बलबान देअ ज़ुंणीं मिसरी लोगा लै खास्सी आफ़ता पाई सज़ा दैनी ती! 9 भाईओ, हिम्मत करा! असली मर्धा ज़िहअ जुध करै, इहअ निं हआ कि हाम्हैं इब्रानी लोगे गलाम होए ज़िहै तिंयां म्हारै गलाम थिऐ। ऐबै करा जुध ज़बर ज़ोर लाई!"

10 तेखअ चुटै पलिश्ती जुधा लै इहै कि तिंयां ज़ितै इज़राईली का भिई, जुधा दी हुई घोर काट-फणाटी अर पलिश्ती पाऐ इज़राईली सैना मांझ़ै कोऐ तिह हज़ार मारी! बाकी बच़ै दै इज़राईली ठुर्है जुधा का हारी आपणैं डेरै लै बापस। 11 बिधातो करारो मणशू बी निंयं पलिश्ती इज़राईली का लुटी आप्पू संघै अर एली प्रोहते दूई शोहरू हुपनी अर पिनहास बी पाए मारी।

12 एक सपाही ज़ुंण बिन्यामीन गोत्रो थिअ, सह ठुर्हअ जुधे ज़ैगा का, संघा पुजअ तैहा ई धैल़ी शिलोह। शोग प्रगट करना लै धेल़ै तेऊ आपणैं झिकल़ै अर मुंडै पाअ माट्टअ-गट्टअ। 13 सह डेऊअ नगरी दी संघा खोज़अ तेऊ जुधो हाल कि किज़ै हुअ, तेता शूणीं लागै सोभ लेरा लांदै। एली प्रोहता गअ फिकर पल़ी कि करारे मणशू लै हुअ हणअ किज़ै! सह थिअ बाते बाढै आपणैं आसना दी बेठअ द अर न्हैल़अ लागअ द। 14 लोगो हाल्‍लअ शूणीं बोलअ एली इहअ, "लोगै इहअ हाल्‍लअ अर लैल़ा-पकारा किल्है आसा लाई दी?" सह सपाही आअ झ़टपटै एली सेटा लै संघा खोज़ी तेऊ का सारी गल्‍ला।

15 एली प्रोहते अमर ती ठैनुऐं साल गई दी हई अर आछी का निं तेऊए ऐबै किछ़ शुझदअ त! 16 तेऊ सपाही बोलअ इहअ, "हुंह आअ जुधे ज़ैगा का आझ़ ई किहअ करै बच़ी संघा पुजअ इधी।"

एली पुछ़अ तेऊ का इहअ, "बेटैआ, ओर्ही खोज़ तेथ हुअ किज़ै?"

17 तेऊ सपाही दैनअ ज़बाब, "इज़राईली ठुर्है पलिश्ती सेटा का पिछ़ू, म्हारै पाऐ खास्सै आदमी मारी! तेरै दूई शोहरू हुपनी अर पिनहास बी पाऐ मारी अर बिधाते करारे मणशू बी किअ पलिश्ती आपणैं कबज़ै दी!"

18 ज़िहअ ई एली बिधाते करारे मणशूए बारै शूणअ, एली बुल़्हअ पिछ़ू बाखा लै धाक्‍कअ संघा पल़अ धरनीं। सह थिअ प्रऊल़ी सेटा दुआली पिछ़ू आपणीं गाद्दी बेठअ द। सह थिअ प्रोढअ अर मोट्टअ बी खास्सअ, सह बधल़ुअ मुंडे बलै धरनीं, तिहअ करै चुटअ तेऊओ कैल़अ अर सह हुअ तिधी मरी हक्‍क। सह थिअ च़ाल़्ही साला तैणीं इज़राईलीओ पांच़।

19 एली प्रोहते नुश ज़ुंण पिनहास प्रोहते लाल़ी थिई, सह थिई सुंदी अर तेसे तै सूंणें धैल़ै सिक्‍कै दै। ज़ांऊं तैहा शूणअ कि बिधाते करारो मणशू किअ पलिश्ती आपणैं कबज़ै दी अर तेसो शौहरअ अर मर्ध बी गऐ मरी, तैहा उझ़ुई हेरा-हेरी सूंणें दाह संघा सूई। 20 ज़ांऊं तैहा प्राण लाऐ तै शोटी, तैहा फेर खल़्हुई दी बेटल़ी लागी तैहा लै इहअ हैअ दैंदी, "हैअ डाह, भाल़ तेरै हुअ भाऊ।" तैहा नां ज़बाब दैनअ अर नां तिन्‍नां बेटल़ीए गल्‍ला दी धैन दैनअ। 21,22 पर सह रही इहअ सोठदी लागी कि तेसो मर्ध अर तेसो शौहरअ गऐ मरी, तैही बोलअ तैहा, "मेरै शोहरू नाअं हणअ इकबोद, किल्हैकि बिधाते करारे मणशू दी किअ दुशमणै कबज़अ, ऐबै निं इज़राईला दी बिधातो जश रहअ।"