1 बिधाते करारो मणशू आपणैं कबज़ै करनै का बाद पजैल़अ पलिश्ती लोगै एबीनेज़र ज़ैगा का आपणीं नगरी अशदोद। 2 तिधी डाहअ पलिश्ती करारो मणशू आपणैं देअ दगोने देहुरै संघा डाहअ दगोन देअए काछ़ा बशैल़ी।

3 दुजै धैल़ै दोत्ती भाल़अ अशदोद नगरीए पज़ैरै कि तिन्‍नें दगोन देअए सह मुहुर्ती आसा बिधाते करारे मणशू सेटा धरनीं उटी बाखा पल़ी दी। तिन्‍नैं डाही तेखअ सह मुहुर्ती तिधी भिई तेही ई खल़ी करी। 4 पर चिऐ धैल़ै दोत्ती बी ज़ांऊं तिंयां उझ़ुऐ, तिन्‍नैं भाल़ी भिई सह मुहुर्ती तेही ई बिधाते करारे मणशू सेटा उटी बाखा पल़ी दी। ऐहा बारी थिई दगोन देअए मुहुर्तीए दुहै बाहा अर मूंड चुटी करै डेहल़ा सेटा पल़ै दै अर पिछ़ू ती सिधी घेर बच़ी दी। 5 तैही निं आझ़ तैणीं बी दगोन देअए पज़ैरै अर अशदोद नगरी ज़ुंण तेऊ देअए मानता करा, देहुरै डेऊई डेहल़ टपदै अर नां तेथ गंईं डाहंदै।

6 बिधाता पाई अशदोद नगरीए लोगा अर तिन्‍नां ओरी-पोरी रहणैं आल़ै लोगा लै घोर आफ़ता। तिन्‍नां निखल़ी घेरी बडी-बडी गिल्टी। 7 खिरी लागै अशदोद नगरीए लोग इहअ बोल्दै, "इज़राईलो देअ आसा हाम्हां अर म्हारै देअआ लै सज़ा दैंदअ लागअ द। एऊ मणशू निं इधी आप्पू जैंदरी डाहा, एऊ काढा पोर्ही।"

8 तेखअ शादै पलिश्ती सोभै पांज़ा राज़ै समाद दैई अशदोद नगरी लै, संघा पुछ़अ तिन्‍नां का इहअ, "इज़राईलीए देअए एऊ करारे मणशू लै ऐबै किज़ै करनअ?"

तिन्‍नैं बोलअ, "एऊ डाहा गात नगरी पजैल़ी।" ज़ांऊं तिन्‍नैं करारो मणशू पिछ़ू फिरी गात नगरी पजैल़अ, 9 तिधी पुजदी पाई बिधाता गात नगरीए लोगा लै बी घोर आफ़त। गात नगरी बी निखल़ी होछ़ै का प्रोढै तैणीं सोभी पलिश्ती गिल्टी। 10 तेखअ निंयं तिन्‍नैं तिधा का करारो मणशू अक्रोन नगरी लै। ज़ेतरी तिधी पुजअ निं, तैहा नगरी रहणैं आल़ै पलिश्ती गऐ लैल़ा-पकारा लाई इहअ बोल्दै लागी, "ऐबै हेरअ अह इज़राईलीए देअओ मणशू हाम्हां अर म्हारै लोगा मारना लै इधी पजैल़ी!"

11 तेखअ शादै अक्रोन नगरीए पलिश्ती सोभै राज़ै भिई संघा बोलअ तिन्‍नां लै, "इज़राईलीए देअए एऊ मणशू काढा एता का पोर्ही, संघा पजैल़ा एता तैहा नगरी ज़िधी एऊए ज़ैगा आसा, तिहअ करै जाणैं हाम्हैं अर म्हारै लोग मरनै का बच़ी।" सारी नगरी ती लेर-पकार मच़ी दी किल्हैकि बिधाता पाई तिन्‍नां लै घोर आफ़त। 12 ज़ुंण लोग ज़िऊंदै बी थिऐ बच़ै दै, तिंयां तै गिल्टी करै भरी धकदै लागै दै। तिंयां तै आपणैं देअआ लै लैल़ा-पकारा लाई मज़त मांगदै।