1 दाबेदै शादै एकी बारी भिई इज़राईला मांझ़ै खास-खास शूरबीर, तिंयां थिऐ पठी कोई तिह हज़ार मर्ध। 2 दाबेदै निंयैं तिंयां यहूदा मुल्खै बाला नगरी लै कि स्वर्गे सारी सैने मालक बिधाता ज़हा का सारअ बल आसा अर ज़सरअ आसन करूब नाओंए फैंखा आल़ै स्वर्ग दूता प्रैंदै आसा, तेऊओ करारो मणशू आणनअ एरुशलेम नगरी लै।✝ 3 तिन्‍नैं काढअ बिधाते करारो मणशू धारठी प्रैंदै अबीनादाबे घअरा का बागै संघा बशैल़अ सह कोरी बैल गाड्डी प्रैंदै। अबीनादाबे शोहरू उज्ज़ा, आहीऊ लागै बैल गाड्डी आजू नढैऊंदै,✝ 4 आहीऊ त करारे मणशू संघै आजू लागअ द हांढदअ। 5 दाबेद अर तिधी आऐ दै होर सोभ इज़राईली लागै बिधातो अदर करना लै गिहा बोल्दै अर नाच़दै। तिंयां थिऐ कैलीए काठा करै बणाऐं दै बींन, बशूरी, ढोल नगारै, गुझू अर डफाला बाज़ी नाच़दै लागै दै।

6 ज़ांऊं तिंयां नाकोन नाओंए मणछे खहल़ै पुजै, तिधी लागी बल्दा ठोहल़ अर उज्ज़ा दैनी बिधाते करारे मणशू आपणैं हाथा करै थम्हणीं कि ढूल़अ निं लोल़ी। 7 तेऊ लै पल़अ तेभी बिधातो कोप अर सह मूंअ तिधी हेरा-हेरी करारे मणशू सेटा किल्हैकि तेऊ लाअ त आपणअ हाथ करारे मणशू दी*। इहअ करै मूंअ उज्ज़ा तिधी बिधाता सम्हनै। 8 दाबेद हुअ खास्सअ नराज़ किल्हैकि बिधातो कोप पल़अ उज्ज़ा लै, तिधा का बोला तैहा ज़ैगा लै आझ़ तैणीं बी फिरिस-उज्ज़ा।

9 तधू डरअ दाबेद बिधाता का खास्सअ संघा लागअ इहअ बोल्दअ, "ऐबै मुंह बिधाते करारो मणशू आप्पू संघै किहअ करै निंणअ?" 10 तेखअ सोठअ दाबेदै इहअ कि अह बिधाते करारो मणशू निं एरुशलेम नगरी लै निंणअ ई आथी अर सह फिरअ तिधा का गात नगरीए ओबेद-एदोमे घअरा बाखा लै संघा पजैल़अ करारो मणशू तिधी। 11 तिधी रहअ बिधाते करारो मणशू चिई भिन्‍नैं तैणीं अर बिधाता दैनी ओबेद-एदोम अर तेऊए टबरा लै खास्सी बर्गत।✝

12 ज़ांऊं राज़ै दाबेदै शूणअ कि बिधाते करारे मणशू करै हुई ओबेद-एदोमे घअरै सोभी गल्‍ला दी खास्सी बर्गत। तेखअ डेऊअ दाबेद संघा आणअ करारो मणशू दाबेदपूर नगरी लै, तैहा खुशी मनाऊंईं तिन्‍नैं बडी जाच। 13 ज़ांऊं बिधाते करारे मणशू च़कणै आल़ै लेबी छ़ह गंईं आजू हांढै, दाबेदै किअ एक बल्द अर आपणअ आप्पै धाचअ द बाछ़ू बल़ीदान। 14 दाबेदै त घेरी बाछो च़ोल़अ अर गाची बान्हीं दी संघा त बिधाते अदर करना लै नाच़दअ लागअ द। 15 इहअ करै आणअ दाबेदै अर होरी सोभी इज़राईली बिधाते करारो मणशू एरुशलेम नगरी लै ज़ै-ज़ैकार करदी अर नर्शिंगै बाज़दी।

16 ज़ांऊं बिधाते करारो मणशू दाबेदपूर नगरी बाखा लै एछदअ त लागअ द, राज़ै शाऊले शोहरी मिकल ती तीरू बाती बागै दाबेदा नाच़दै भाल़ी लागी दी, तैहा समझ़अ दाबेदो सह तिहअ करनअ बृथा। 17 तिन्‍नैं आणअ बिधातो करारो मणशू तैहा ज़ैगा लै ज़िधी दाबेदै तेता लै खिम्भ त डाहअ द खल़अ करी। तेखअ किऐ दाबेदै तिधी बिधाता लै हूम अर मेल़-ज़ोल़े बल़ीदान। 18 ज़ांऊं दाबेद हूम अर मेल़-ज़ोल़े बल़ीदान दैई मुक्‍कअ, तेखअ दैनी तेऊ स्वर्गे सारी सैने मालक बिधाते नाओंऐं सारी परज़ा लै बर्गत ज़हा का सारअ बल आसा। 19 तेखअ बांडअ तेऊ इज़राईली सारी परज़ा लै मर्ध-बेटल़ी संघी एक-एक रोटी भोज़न, एक-एक शिखे टांक अर एक-एक दाखे टिक्‍की। संघा डेऊऐ सोभै आपणैं-आपणैं घअरा लै।✝

20 एता बाद ज़ांऊं दाबेद आपणैं नातै-रिश्तैदारा लै बर्गत दैंदअ फिरअ, तेखअ आई शाऊले शोहरी मिकल दाबेदा सेटा मिलदी संघा लागी एही टाभा बाहंदी, "इज़राईले राज़ै किई आपणीं आझ़ खास्सी मशूरी! तंऐं रहैऊई ऐडै-बेगरै ज़ेही आपणीं नांगी घेर आपणैं कार-करिंदै अर गलाम बेटल़ी का! तिहअ करै भाल़ तेरअ किहअ प्रतप्प शुझुअ!"

21 दाबेदै दैनअ मिकला लै ज़बाब, "हुंह त बिधातो अदर करना लै नाच़दअ लागअ द, ज़ुंणीं बिधाता हुंह तेरै बाबे अर तेऊए खिंबे बदल़ै इज़राईलीओ राज़अ बणाअं। मुंह रहणअ बिधातो अदर करना लै नाच़दै लागी। 22 मुंह बणनअ एता का बी खास्सै च़िल़्हखरै अर ज़हा गलाम शोहरीए तूह गल्‍ला करा, तिन्‍नां बी करनअ मेरअ अदर।"

23 शाऊले शोहरी मिकले निं कधि आद-लुआद हुई अर सह मूंईं बांढी ई।