1 राज़अ शाऊल गअ त ऐबै मरी, दाबेद त गअ द अमोलकी का जुध ज़िती सकाल़ग नगरी एछी अर तिधी गऐ तै तेऊ एछी दूई धैल़ै हई। 2 दुजै धैल़ै आअ राज़ै शाऊले सैना मांझ़ा का एक ज़ुआन मणछ बच़ी। तेऊ धेल़ै शोग रहैऊंणा लै आपणैं झिकल़ै संघा पाअ आपणैं मुंडै धूल़अ-माट्टअ। सह पुजअ दाबेदा सेटा संघा टेक्‍कअ धरनीं उटी बाखा माथअ। 3 दाबेदै पुछ़अ तेऊ का, "तूह किधा का आअ?"

तेऊ बोलअ इहअ, "हुंह आअ इज़राईली सैने दला जैंदरा का बच़ी।"

4 दाबेदै पुछ़अ सह, "ओर्ही खोज़ मुखा किज़ै हुअ?"

तेऊ दैनअ ज़बाब, "म्हारी सैना ठुर्ही जुधा का पिछ़ू अर म्हारै पाऐ खास्सै मणछ मारी। राज़अ शाऊल अर तेऊओ शोहरू जोनातान बी पाऐ मारी!"

5 दाबेदै पुछ़अ तेऊ का, "तूह किहअ करै सका बोली कि राज़अ शाऊल अर तेऊओ शोहरू जोनातान गऐ मरी?"

6 ✝तेऊ दैनअ ज़बाब, "मालक, हुंह त कुदरती तिधी गिलबा धारा, मंऐं भाल़अ कि शाऊल आसा आपणैं बर्छ़ै दी नील़ लाअ द। दुशमणे रथ अर शुंआर तै तेऊ पिछ़ू पल़ै दै अर सह थिअ तेतरी ठिमकी आणअ द। 7 तेऊ भाल़अ फेर, तेथ शुझुअ तेऊ का हुंह संघा लाई तेऊ मुल्है हाक्‍का अर मंऐं बोलअ, ‘माहा राज़अ किज़ै हुकम आसा?’

8 "तेऊ पुछ़अ हुंह, ‘तूह कुंण आसा?’ मंऐं बोलअ इहअ, ‘हुंह आसा अमोलकी।’

9 "तेखअ बोलअ शाऊल राज़ै मुल्है, ‘ओर्ही एछ मुंह सेटा छ़ेक्‍कै, संघा मार मुंह! हुंह आसा खास्सअ ज़खमी हुअ द, अह दाह निस्सी मेरै ज़िर्हुई!’ 10 तेखअ पाअ मंऐं सह इहअ सोठी मारी कि धरनीं बधल़ूई करै निं ऐबै अह केही बी बच़दअ आथी, तेता का पाऊं हुंह एऊ आपणैं हाथै मारी। तेखअ आअ हुंह तेऊओ मुगट अर बाहे सनांगणूं लई इधी ताह आपणैं मालका सेटा लै।"

11 दाबेद हुअ खास्सअ दुखी अर तेऊ धेल़ै दुखै आपणैं झिकल़ै अर तिन्‍नैं होरी सोभी मणछै बी किअ तिहअ ई शोग। 12 तिंयां रहै सारी धैल़ी हिक्‍का पटाक्‍की लेरा लाई शोग मनाऊंदै अर शाऊल, जोनातान रहै बिधाते परज़ा इज़राईली लै उडै तैणीं कहतू, किल्हैकि जुधा दी पाऐ तै खास्सै इज़राईली मारी।

13 दाबेदै पुछ़अ खबर पजैल़णैं आल़ै तेऊ खारकै मणछा का, "तूह किधो आसा?"

तेऊ दैनअ ज़बाब, "हुंह आसा अमोलकी, हुंह आसा परदेसी, पर हुंह रहा थारै देशै।"

14 दाबेदै पुछ़अ तेऊ का, "ताह किधा का आई एतरी हिम्मत कि तंऐं मारअ सह राज़अ ज़सरअ अभिषेक बिधाता आसा किअ द! ताह धख बी डअर निं लागी? 15,16 इहअ करै आणी तंऐं आप्पू लै आप्पै मौत! तंऐं बोलअ इधी आप्पै कि तंऐं मारअ सह मणछ आपणैं हाथै ज़ुंण बिधाता आप्पै अभिषेक करी राज़अ आसा बणाअं द!"

तेखअ बोलअ दाबेदै आपणैं एकी आदमी लै, "मार एऊ!" तेऊ आदमी बाही तेऊ अमोलकी मणछा लै एही कि सह हुअ तिधी मरी हक्‍क।

17 दाबेदै गांठी शाऊल अर तेऊए शोहरू जोनाताना लै शोगे एक गिह। 18 ✝संघा किअ हुकम कि ऐहा गिहा शखैल़ा यहूदा मुल्खे सोभी लोगा का। तैहा गिहा नाअं डाहअ, "कबाणे गिह" अर अह गिह आसा जशार नाओंए कताबा दी लिखी दी। गिहे बोल आसा इहै,

19 "हे इज़राईल, तेरअ मशूर प्रधान पाअ तेरी उछ़टी धारा मारी!

म्हारै शूरबीर बदल़ै धरनीं!

20 गात नगरी निं खोज़ी,

अशकलोन नगरीए बाता निं ऐहा खबरा फणाऊंई,

पलिश्ती ज़ुंण बिधाता निं मंदै अर ज़ुंण खतैर निं करदै,

तिन्‍नें बेटल़ी अर शोहरी हणीं नाच़णै जोगी खुश!

21 गिलबा धारा प्रैंदै निं लोल़ी सरग हुअ नां ओश लोल़ी पल़ी,

तेथ निं खेचै कधि किछ़ लोल़ी पज़अ कि बिधाता लै भैंट आणे!

किल्हैकि तैहा ज़ैगा हुई महान जोधे ढाल़ा नकदरी,

राज़ै शाऊले ढाल़ रही तिधी च़िक्‍करै जैंदरी पल़ी,

तधा बाद निं तेथ कधि तेल लेस्सअ!

22 जोनाताने कबाणा का निखल़ै दै कतीरा करै हआ तै जोधै च़ित्त,

अर शाऊले तलबार करा ती शूरबीर दुशमणे धुआल़!

23 शाऊल अर जोनातान तै आपणीं अमरा

लोग झ़ूरा तै शाऊल अर जोनाताना लै खास्सै,

ज़िन्दगी बी ज़िऊई तिन्‍नैं संघा अर

मूंऐं बी दुहै संघा,

तेज़ तै तिंयां मुक्षरलै का बी खास्सै अर ज़ोर त तिन्‍नां सिहा ज़िहअ।

24 इज़राईली बेटल़ीओ, शाऊले तैणीं लाआ सोभै लेरा!

तेऊ बन्हैऊंऐं तै तम्हां का बाछे लाल किम्मती झिकल़ै,

अर तेऊ बन्हैऊंऐं तै तम्हां लै सुन्‍नें हार-शंगार।

25 आईओ! बडै जुधा दी भाल़ महान जोधै किहै डाहै धरनीं बदल़ी,

तिंयां भाल़ दुशमणै किहै पाऐ मारी,

जोनातान डाहअ गिलबा धारा धरनीं बदल़ी!

26 जोनातान, मेरै भाईआ! आझ़ भाल़ तंऐं मुल्है केही दाह लाई!

मुंह गम्मा त सिधअ तूह ई!

तूह भाल़ मुल्है किहअ खास्सअ झ़ूरा त,

एतरी निं कुंण बेटल़ी बी झ़ूरदी आथी।

27 आईओ, शूरबीर जोधै डाहै धरनीं बदल़ी!

तिन्‍नें अस्त्र-शस्त्र डाहै शोटी! तिंयां हुऐ बृथा।"