1 थोल़ै धैल़ै बाद छ़ेल़अ राज़ै दाबेदै पलिश्ती संघै भिई जुध अर तिंयां हारै दाबेदा का भिई। तिन्‍नों राज़ किअ इज़राईलीए तिन्‍नां ज़ैगा का बी पठी खतम ज़ेथ तिन्‍नों कबज़अ अज़ी बी थिअ।

2 तेखअ ज़ितअ दाबेद मोआबी का। तेऊ सताऊऐ तिन्‍नें सपाही धरनीं लाम्मी बाखा संघा नापै तिंयां राश्शी करै, ज़ेतरी लाम्मी राश्शी हआ ती तेते दुगणैं पाऐ तिंयां मारी अर एक राश्शी बराबर छ़ाडै तेऊ ज़िऊंदै। तेखअ किअ दाबेदै मोआबी प्रैंदै राज़ अर तिंयां दैआ तै तेऊ लै कारअ।

3 एता बाद छ़ेल़अ दाबेदै सिरीया देशे सोबा नगरीए राज़ै हदादेज़ेरा संघै हमात मुल्खा नेल़ जुध, किल्हैकि रहोबो शोहरू हदादेज़ेर त फरात दरैऊआ प्रैंधल़ै मुल्खै कबज़ै करदअ लागअ द। तेतरी हेरअ सह राज़ै दाबेदै जुधा दी हारी। 4 तेऊ जुधा दी किऐ दाबेदै हदादेज़ेरे एक हज़ार रथ, सात हज़ार घोल़े शुंआर, बिह हज़ार पैदल सपाही आपणैं कबज़ै दी। तेता का डाहै दाबेदै एक शौ रथा लै घोल़ै बच़ाऊई अर बाकी किऐ तेऊ ज़ान्हूं पिछ़ूए नस काटी बरैबाद।

5 ज़ांऊं दमिश्क नगरीए अरामी* लोगै आपणीं सैना सोबा नगरीए राज़ै हदादेज़ेरे मज़त करदी छ़ाडी, दाबेदे सैना पल़ी तिन्‍नां लै चुटी अर तिन्‍नां मांझ़ै पाऐ बाई हज़ार सपाही मारी। 6 तेखअ बशैल़ी दाबेदै अरामी मुल्खै आपणीं सैने च़ौकी, तिन्‍नां प्रैंदै बी हुअ दाबेदो राज़ संघा लागै तिंयां बी दाबेदा लै कारै दैंदै। ज़िधी बी दाबेद डेऊअ, बिधाता दैनी तेऊ लै ज़ीत। 7 हदादेज़ेर राज़ै का थिई सुन्‍नें ढाल़ा अर तिंयां किई राज़ै दाबेदै आपणैं कबज़ै दी संघा आणी एरुशलेम नगरी लै। 8 तेता संघै आणअ दाबेद राज़ै हदादेज़ेर राज़े तेबा अर बेरोताई नगरी का खास्सअ कांस्सअ बी।

9 हमात नगरीए राज़ै तोई का लागअ थोघ कि दाबेदे सैना का हारी हदादेज़ेर राज़े सारी सैना, 10 तेखअ छ़ाडअ तेऊ आपणअ शोहरू जोराम राज़ै दाबेदा सेटा राज्ज़ी-खुशी अर हदादेज़ेर राज़ै का ज़ितणें बधाई दैंदअ। किल्हैकि हदादेज़ेर राज़ै छ़ेल़अ त तोई संघै कई बारी जुध। जोरामै आणै दाबेदा लै भैंट दैणा लै सुन्‍नैं, च़ंदी अर कांस्से भांडै। 11 राज़ै दाबेदै डाहै तिंयां भांडै बिधाता लै मणसी ज़ुदै ज़िहै अर सह सुन्‍नअ, च़ंदी अर कांस्सअ बी डाहअ तेऊ बिधाता लै तिहअ ई ज़ुदअ ज़ुंण तेऊ 12 अराम, मोआब, अमोन, पलिश्ती अर अमोलकी ज़ाती का जुध ज़िती आणअ त अर रहोबे शोहरू सोबा नगरीए राज़ै हदादेज़ेरा का लुटी दी ज़ैदात बी डाही तेऊ बिधाता लै ज़ुदी।

13 ज़ांऊं दाबेद लूंणै खागा का ठारा हज़ार अरामी मारी बापस फिरअ, तेखअ हुअ सह होर बी मशूर। 14 दाबेदै बशैल़ी आपणीं सैना सारै एदोम अर तिंयां बी लागै दाबेदा लै कारै दैंदै। ज़िधी-ज़िधी बी दाबेद डेऊअ बिधाता दैनी तेऊ लै सोभी ज़ैगा ज़ीत।

15 दाबेदै किअ सारै इज़राईला प्रैंदै राज़ अर सह डाहा त धैन कि सारी परज़ा लोल़ी एकी रंगो बभार अर नसाफ भेटअ। 16 अबीशैओ भाई जोआब ज़सरी ईज सरूयाह थिई, सह थिअ राज़ै दाबेदो सैनापति। दाबेदो इतिहास लिखणैं आल़अ त आहीलूदो शोहरू जहोशापात, 17 आहीतूबो शोहरू सदोक अर अबतारो शोहरू आहीमोलक तै बडै प्रोहत। दाबेदो काईथ थिअ सरयाह, 18 जहोयादा प्रोहतो शोहरू बेनियाह थिअ राज़ै दाबेदे आपणीं फाज़त करनै आल़ै शूरबीरो प्रधान अर दाबेदे आपणैं शोहरू बी थिऐ बडी-बडी पदबी दी।