2 शमूएल 3

1 शाऊले खिंबे पक्षे लोगा अर दाबेदे पक्षे लोगा मांझ़ै रहअ अह झ़गल़अ खास्सी साला तैणीं पल़ी। दाबेद रहअ बलबान हंदअ लागी अर शाऊले खिंबो बल रहअ धैल़ी-धैल़ी उंधै घटदअ लागी।

दाबेदे शोहरू

2 हेब्रोन नगरी रहंदी हुऐ दाबेदे खास्सै शोहरू, तेऊओ सोभी का ज़ेठअ शोहरू त तेऊए जज्रेला का आणी दी बेटल़ी आहीनोमा का हुअ द, तेऊ नाअं त अमनोन। 3 तेऊ कान्हअ त कर्मेल नगरी का आणी दी नबाले बिधबा अबीगेला का हुअ द, तेऊ नाअं त किलाब। दाबेदै ती गशूर नगरीए राज़ै तलमाईए शोहरी माकाहा बी आणी दी, चिऊथअ शोहरू त तैहा का हुअ द। तेऊ नाअं त अबशलोम। 4 च़ौथअ शोहरू हुअ तेऊए हागीता नाओंए बेटल़ी का, तेऊ नाअं त अदोनियाह। पांज़ूऐ शोहरू नाअं त शपताह अर तेऊए ईज थिई अबीताल। 5 छ़हुअ शोहरू त ईतराम अर तेऊए ईजा नाअं त एगला। हेब्रोन नगरी हुऐ दाबेदे ईंयां छ़ह शोहरू।

शाऊलो सैनापति अबनेर फिरअ दाबेदा बाखा

6 शाऊल अर दाबेदे खिंबा त आप्पू मांझ़ै झ़गल़अ लागअ ई द। शाऊले पक्षे लोगा मांझ़ै त अबनेर होर बी बलबान हंदअ लागअ द।

7 शाऊले ती एक डाही दी बेटल़ी, तैहा नाअं त रिज़पा अर सह थिई अईयाहे शोहरी। अबनेर रहअ-बस्सअ तैहा संघै अर शाऊले शोहरू इशबशेतै बोलअ अबनेरा लै, "तूह मेरै बाबे डाही दी बेटल़ी संघै किल्है सुत्तअ?" 8 ऐहा गल्‍ला पिछ़ू आई अबनेरा इशबशेता लै रोश्शै संघा लागअ इहअ बोल्दअ, "तेरअ कै मतलब? मंऐं कै इहअ करै शाऊला लै धोखअ दैनअ? तंऐं कै हुंह कुक्‍कर समझ़अ कि हुंह आसा यहूदा मुल्खा आल़ेए टुकरै खांदअ लागअ द? आझ़ तैणीं रहअ हुंह तेरै बाब शाऊल, तेऊए भाई अर तेऊए सोभी साथी लै शुचअ-पाक्‍कअ! ताह निं मंऐं दाबेदे हाथै पल़णै दैनअ। तूह आसा लागअ द आझ़ धख ज़ेही गल्‍ला लै ऐहा बेटल़ी पिछ़ू मुंह दी खोट लोल़अ! 9 ✝3:9 1 शमू. 15:18बिधाता लोल़ी तै मुल्है घोर आफ़त पाई! कि लोल़ी हुंह पठी मारअ ज़ै हुंह दाबेदा लै तिन्‍नां सोभी गल्‍ला पूरी हणां लै मज़त निं करूं ज़ेते बिधाता तेऊ लै करार आसा किई दी। 10 बिधाता आसा बोलअ द कि शाऊले खिंबा का निं आजू तेऊ ऐबै भिई राज़अ बणाणअं अर तेऊए ज़ैगा बेशणअ आजू दाबेद इज़राईल अर यहूदा दुही मुल्खो राज़अ। तेऊओ हणअ उतरा बाखा दान अर दखण बेर्शेबा तैणीं राज़। 11 इना गल्‍ला शूणीं डरअ अबनेरा का इशबशेत खास्सअ अर तेऊ निं तेता आजू एक बैण बी बोलअ।"

12 अबनेरै छ़ाडै दाबेदा सेटा हेब्रोन नगरी लै दूत, तिन्‍नां का दैनअ तेऊ इहअ समाद, "सारै देशा प्रैंदै लोल़ी तूह एक्‍कै राज़अ हुअ, ज़ै तूह मुंह संघै करार करे, तै फरेऊंणै मुंह सारै इज़राईली ताह बाखा कि तूह आसा सोभिओ राज़अ।"

13 दाबेदै दैनअ तेऊ लै ज़बाब, "राम्बल़ी गल्‍ल आसा! हुंह करूं ताह संघै करार पर तेता लै हुई ताह एक गल्‍ल करनी कि ज़ेभै तूह मुंह सेटा लै मिलदअ एछे, तेभै लोल़ी तंऐं शाऊले शोहरी मिकल आप्पू संघै मुंह सेटा लै ज़रूर आणी।" 14 राज़ै शाऊले शोहरू इशबशेता सेटा लै बी छ़ाडै दाबेदै दूत इहअ समाद पजैल़ै, "मेरी लाल़ी मिकला दैऐ मुल्है बापस, तैहा संघै बैह करनै पिछ़ू आसा मंऐं एक शौ पलिश्ती मर्धे खतैर करी एक शौ खलेफ़ल़ी मोल दैनी दी।"✝3:14 1 शमू. 18:27 15 इशबशेतै छ़ाडै आपणैं आदमी लैशे शोहरू पलतीएला सेटा संघा आणी तेऊ का मिकल बापस छ़ड़ैऊई।

16 पलतीएल आअ लेरा लांदी-लांदी तैहा पिछ़ू बहूरीम नगरी तैणीं। तेखअ बोलअ अबनेरै तेऊ लै, "घअरा लै डेऊ फिरी," इहअ करै फिरअ सह तेखअ आपणैं घअरा लै बापस।

17 अबनेर डेऊअ इज़राईली सैणैं सेटा संघा किई तिन्‍नां संघै एही गल्‍ला, "कधू ओर्ही आसा तम्हैं इहअ बोल्दै लागै दै कि दाबेद लोल़ी तम्हां प्रैंदै राज़अ हुअ। 18 ऐबै आसा तम्हां लै मोक्‍कअ, आद करा कि बिधाता आसा दाबेदे बारै इहअ बोलअ द, ‘आपणैं दास दाबेदा करै छ़ड़ैऊंणी मुंह आपणीं इज़राईली परज़ा पलिश्ती अर तिन्‍नें सोभी दुशमणा का।’" 19 अबनेरै किई बिन्यामीन गोत्रा आल़ै संघै बी गल्‍ला, संघा डेऊअ सह हेब्रोन नगरी लै दाबेदा सेटा इहअ खोज़दअ कि बिन्यामीन गोत्रा आल़ै अर सोभै इज़राईली आसा राज्ज़ी।

20 ज़ांऊं अबनेर आपणैं खास बिह आदमी संघा निंईं दाबेदा सेटा हेब्रोन नगरी पुजअ, दाबेदै दैनी तिन्‍नां लै धाम। 21 अबनेरै खोज़अ दाबेदा का, "माहा राज़अ, मेरै मालक, ऐबै दै मुंह एभी डेऊणैं, मुंह करनअ ताल्है सोभी इज़राईलीओ झाल़अ, ताकि तिंयां ताह संघै करार करे। तूह हणअ तेखअ सोभी इज़राईली प्रैंदै राज़अ ज़िहअ तूह च़ाहा बी।" तेखअ दैनअ दाबेदै अबनेर इहअ बोली सबाही कि ताह निं हुंह किछ़ हणैं दैंदअ अर सह बी डेऊअ राज्ज़ी-राम्बल़अ बापस फिरी।

अबनेरे हत्या

22 अबनेर गअ त हेब्रोन नगरी का राज्ज़ी-राम्बल़अ बापस फिरी, जोआब अर दाबेदे सैनो एक दल पुजअ दुशमणे गराऊंआं खास्सै लुटी बापस। 23 जोआबा का हेरअ पुजदी कुंणी खोज़ी, "नेरीओ शोहरू अबनेर आअ त राज़ै सेटा अर राज़ै छ़ाडअ सह राज्ज़ी-राम्बल़अ बापस कि तेऊ निं सह किछ़ हणैं दैंदअ।"

24 जोआब डेऊअ राज़ै दाबेदा सेटा संघा बोलअ इहअ, "तंऐं अह कै किअ? अबनेर आअ ताह सेटा अर तंऐं दैनअ तेऊ डेऊणैं! ऐबै गअ सह खास्सअ दूर निखल़ी! 25 ताखा नेरीए शोहरू अबनेरो थोघ बी आसा? तेऊ किअ ताह संघै धोखअ! सह आअ ताह सेटा इहअ भाल़अ कि तूह किज़ै करा अर तेरी सैना दी केचल़अ बल आसा।"

26 ज़ांऊं जोआब दाबेदा सेटा का निखल़अ, तेऊ छ़ाडै अबनेरा सेटा लै दूत अर तिन्‍नैं आणअ सह सीरा नाओंए कुहै सेटा का बापस फरेऊई, पर दाबेदा का निं इना गल्‍लो थोघ आथी त। 27 ज़ांऊं अबनेर हेब्रोन नगरी पुजअ, जोआबै निंयं सह नगरीए प्रऊल़ी सेटा का पोर्ही ज़िहअ कांगनरांगै गल्‍ला करना लै। तिधी बाही तेऊए पेटै एही कि सह मूंअ तिधी। सह मारअ तेऊ एता पिछ़ू कि अबनेरै थिअ जोआबो भाई असाहेल मारअ द। 28 ज़ांऊं दाबेदा का ऐहा गल्‍लो थोघ लागअ, तेऊ बोलअ, "ऐहा गल्‍लो शाजत आसा बिधाता आप्पै कि नेरीए शोहरू अबनेरे हत्या करनै पिछ़ू निं मेरअ धख ज़िहअ दोश बी आथी। 29 एते सज़ा लोल़ी जोआब अर तेऊए टबरा भेटी! जोआबे लोल़ी आजू हर पोस्ती दी कहा नां कहा मणछा कोहल़ निखल़ी, धात रोग हुअ, लाट्टअ हुअ, कुंण लोल़ी तलबारा करै मारअ अर कहा लोल़ी भुखै ब्रत लागै!" 30 इहअ करै लअ जोआब अर तेऊए भाऊ अबीशै अबनेरा मारी आपणैं भाई असाहेला मारनैओ बदल़अ ज़ुंण गबोन जुधा लै मारअ द।

अबनेरा लै किअ शोग

31 तेखअ बोलअ दाबेदै जोआब अर तेऊ संघै सोभी लोगा लै, "आपणैं झिकल़ै धेल़ी अर कुछी खिंथल़ै बान्हीं करा अबनेरा लै शोग।" आप्पू लागअ राज़अ दाबेद अबनेरे ल्हासा पिछ़ू-पिछ़ू हांढदअ। 32 तेखअ डाहअ तिन्‍नें अबनेर हेब्रोन नगरी एकी ज़ैगा दाबी। राज़अ दाबेद लागअ तिधी ज़ोरै-ज़ोरै लेरा लांदअ अर तिधी आऐ दै होरी सोभी लोगै बी लाई खास्सी लेरा। 33 राज़ै दाबदै गांठी अबनेरे बारै शोग प्रगट करना लै एही गिह,

"अबनेर इहअ ऐडै ज़िहअ किल्है मूंअ आरो?

34 नां तेऊए हाथ तै बान्हैं दै,

नां तेऊए पिल्‍ली शांघल़ी-लोहै आथी तै लाऐ दै!

सह मारअ इहअ ज़िहै ज़ुल्म करनै आल़ै मारा!"

तेखअ लागै भिई तिधी सोभ लोग लेरा लांदै।

35 दाबेद रहअ भुखअ अर होर लागै तेऊ लै बोल्दै कि धख रोटी ता खा, पर दाबेदै खाऐ इहै सोह, "ज़ै हुंह धैल़अ उडणैं का आजी रोटीओ म्हार बी खाऊं तै लोल़ी बिधाता मुल्है इहअ ई बूरअ किअ, मुल्है लोल़ी मौत ई आई!" 36 तेखअ दैनअ सोभी राज़ै दाबेदे तैहा गल्‍ला दी धैन अर संघा मनै सोभै, ज़िहै तिंयां हर बगत तेऊए गल्‍ला मना तै। 37 तेखअ गअ यहूदा अर इज़राईल सोभी लोगा का थोघ लागी कि नेरीए शोहरू अबनेरे हत्या करनै पिछ़ू निं राज़अ दाबेद धख बी आथी। 38 तेखअ बोलअ राज़ै दाबेदै आपणैं कार-करिंदै लै, "तम्हां निं ज़ाण्हुंअ कि आझ़ मूंअ इज़राईला जैंदरी एक महान प्रधान अर जोधअ? 39 एही ता आसा हुंह बिधाता अभिषेक करी राज़अ बणाअं द, पर मुखा ज़ाण्हिंआं कि आझ़ घटअ मेरअ बल। ईंयां सरूयाहे दूई शोहरू जोआब अर अबीशै आसा काबू करनै मेरै बशा का बागै। बिधाता लए ऐबै इना का ऐहा हत्या करनैओ बदल़अ आप्पै ज़िहअ बूरअ इनै किअ तिहअ ई।"