मरनै का आजी दाबेदे बोल
1 ईशैईओ शोहरू दाबेद त सह मणछ ज़ुंण परमेशरै महान बणाअं, सह छ़ांटअ याकबे परमेशर बिधाता संघा बणाअं राज़अ। सह थिअ इज़राईला दी इहअ ज़ुंण दिला लोभणैं आल़ी गिहा गांठा त। मरनै का आजी बोलै दाबेदै ईंयां बोल:
2 बिधाते पबित्र आत्मां बोलअ मुंह बाती,
तेऊए पाऐ आपणैं बैण मेरै होठै।
3 इज़राईले परमेशर,
इज़राईले फाज़त करनै आल़ै बोलअ मुल्है इहअ,
"ज़ुंण राज़अ परमेशरे डरा हेठै रहा,
ज़ुंण शुचअ नसाफ करा,
4 सह आसा दोत्ती बिझै सरगै निखल़दै सुरज़ा ज़िहअ,
सह धुप्पअ ज़ेता करै पाणीं हणैं बाद घाह च़लकार छ़ाडा।"
5 तैही दैणीं परमेशरा मेरी आद-लुआदा लै बर्गत,
किल्हैकि तेऊ आसा मुंह संघै सदा लै करार किई दी,
सह करार निं कधि चुटदी आथी,
एही ज़बान ज़ेता का सह पिछ़ू निं हटदअ।
हुंह बी च़ाहा इहअ ई,
सह ई आसा मेरी ज़ीत अर
बिधाता करनअ सह ई ज़ेते मुंह आशा आसा।
6 कदुष्ट मणछ आसा कांडै-रिंडै ज़िहै ज़ुंण गोधी का पेच़ी शोटणै,
तिन्नां निं कुंण हाथा करै ढाकी सकदअ,
7 तिंयां लागा बर्छ़ै अर मिंहडी करै पेच़णैं
संघा लागा तिधी तेता दी आग चैल़ी पठी खतम करनै।
दाबेदे मशूर जोधै
(1 इतिहास 11:10-41)
8 राज़ै दाबेदे मशूर जोधै थिऐ ईंयां: एक जोधअ थिअ तकमोना का थिअ जोशेब-बाश-बेथ सह थिअ चिई दले सरदारा प्रैंदै प्रधान। तेऊ मारै तै एकी जुधा लै आपणैं बर्छ़ै करै दुशमणे आठ शौ शूरबीर एकी ज़ण्हैं। 9 दुजअ मशूर जोधअ थिअ दाबेदे चिई जोधै मांझ़ै अहोह टोली का दोदैओ शोहरू एलीआजर। एकी बारी तै पलिश्ती जुधा लै झाल़्हुऐ दै, दाबेदै बोलअ पलिश्ती लै ज़ै तम्हैं तिहै फिरा तै एछा हाम्हां संघै मकाबलै लै! ज़ै कि होर इज़राईली तै गऐ दै जुधा करनै का पिछ़ू ठुर्ही! 10 पर एलीआजर रहअ टेक्की, सह रहअ पलिश्ती मारदअ लागी ज़ेभै तैणीं तेऊ का थकी करै तलबार धरनीं निं छ़ुटी। तैहा धैल़ी दैनी ती बिधाता इज़राईला लै बडी ज़ीत। बादा का आऐ तिंयां पिछ़ू ठुर्है दै इज़राईली सिधै तिन्नां मारै दै सैने अस्त्र-शस्त्र अर होरी च़िज़ा लुटदै अर जुध ज़ताऊअ एकी एलीआजरे।
11 चिऊथअ त हरार नगरी का आगिहो शोहरू शमाह। पलिश्ती तै लेई ज़ैगा मसरे खेचै जुधा लै आपणीं लगैग लाई दी। तधू बी ठुर्है इज़राईली पलिश्ती डरै पिछ़ू। 12 पर शमाह रहअ खेचै मांझ़ा-मांझ़ी एक्कै खल़्हुई अर तेऊ मारै खास्सै पलिश्ती अर खिरी ज़ितअ सह! अर तधू बी दैनी बिधाता इज़राईली लै एक बडी ज़ीत।
13 एकी साला डेऊऐ ज़ेठै नाज़ा लऊंणे ऋता तिह जोधै मांझ़ै चअन जोधै राज़ै दाबेदा सेटा अदुलाम डुआरै। पलिश्ती तै रपाईम खागै जुधा लै डेरै पाऐ दै। 14 दाबेद त उझै धारा गहल़ै अर पलिश्ती त बेतलेम नगरी कबज़अ हेरअ द करी। 15 दाबेदा फिरी घरकी आद संघा बोलअ, "तै भाल़ किहअ हणअ त ज़ै कुंण बेतलेम नगरीए प्रऊल़ी सेटे कुहै का मुल्है झुटणा लै पाणीं दैंदअ आणी!" 16 तिंयां चअन जोधै पलिश्ती डेरै, संघा आणअ बेतलेम नगरीए प्रऊल़ी सेटे कुहै का पाणीं भरी राज़ै दाबेदा सेटा। पर तेऊ निं सह पाणीं झुटअ अर तेऊ दैनअ तेऊ पाणीं करै बिधाता लै अर्घअ, 17 संघा बोलअ इहअ, "हे बिधाता, अह निं एता झुटी सकदअ! अह हणअ तिन्नां मणछे लोहू झुटणैं ज़िहअ ज़ुंणीं एता मुल्है आणना लै आपणीं ज़िन्दगी बी पाई खातरै दी।" तेखअ निं दाबेदै सह पाणीं झुटअ।
इना चिई मशूर जोधे तै इहै हिम्मती आल़ै काम।
18 जोआबो भाई अबीशै, इने ईज थिई सरूयाह। अबीशै थिअ तिन्नां चिई जोधै मांझ़ै एक। एकी जुधा लै मारै तै तेऊ एकी ज़ण्हैं आपणैं बर्छ़ै करै चअन शौ दुशमण संघा हुअ तिहा जोधै मांझ़ै तेऊओ नाअं मशूर। 19 सह हुअ इहअ मशूर कि तेखअ बणाअं सह तिन्नां ई तिह मशूर जोधैओ दलपति। पर अज़ी बी निं सह खास चिई जोधै ज़िहअ मशूर हुअ त।
20 कबसेल नगरी का थिअ जहोयादो शोहरू बेनियाह मशूर सपाही, तेऊ किऐ बडै-बडै नुआहरै काम। एकी बारी पाऐ तै तेऊ मोआबीए दूई सोभी का तगल़ै जोधै मारी। सह होथअ हिंऊंदै उंधै एकी जुहल़ी लै संघा पाअ एक बडअ सिह मारी। 21 एकी बारी मारअ तेऊ मिसर देशो एक बडअ दैंत्तर जोधअ। मिसर देशे तेऊ जोधे हाथै थिअ बर्छ़अ, पर बेनियाह डेऊअ तेऊए मकाबलै करदअ शोठी पाई संघा छ़ड़ैऊअ तेऊए ई हाथा का बर्छ़अ संघा पाअ सह तेता ई करै मारी। 22,23 जहोयादे शोहरू बेनियाह किऐ इहै-इहै ज़बर काम। खास चिई जोधै मांझ़ै ता निं तेऊ ज़ैगा भेटी पर सह थिअ खास तिह जोधै जैंदरी मशूर। दाबेदै बणाअं सह तेखअ आपणीं फाज़त करनै आल़ै शूर-बीरो दलपति।
24 तिंयां तिह जोधै तै ईंयां:
जोआबो भाई असाहेल,
बेतलेम नगरीए दोदो शोहरू एलहान,
25 हरोदा का शमाह अर एलिका,
26 पलती का हेलेस,
तकोआ का इकेशो शोहरू ईरा,
27 अनातोता का एबीएजेर,
हुशाई नगरी का मबुनाई,
28 अहोहा का सलमोन,
नतपाह का महरै
29 नतपाह ई का एक होर हेलेबो शोहरू बानाह
बिन्यामीने गिबा नगरी का रिबैओ शोहरू ईताई
30 पिरातोना का बेनियाह,
गाश धारे गाडा नेल़ रहणैं आल़अ हिदाई,
31 बेथ-अराबा का एबी-अल्बोन
बहूरीमा का अज़मबेथ
32 एलीआबा का शालबोनी
याशेने खिंबा का जोनातान
33 हरार नगरी का शमाह,
शरारो शोहरू आहीआम,
34 मकात नगरी का आहसोबैओ शोहरू एलीपेलेत,
गीलो नगरी का आहीतपेलो शोहरू एलीआम
35 कर्मेल नगरी का हेस्रो,
अराबा का परेई
36 सोबा नगरी का नातानो शोहरू ईगाल,
गाद गोत्रा का बैनी
37 अमोन नगरी का सेलेक
बरोत नगरी का नहारी, सह थिअ सरूयाहे शोहरू जोआबे अस्त्र-शस्त्रा ढोणै आल़अ।
38 इतेरा का ईरा अर गारेब
हित्ती उरियाह।
39 ईंयां सोभै तै पठी गणी करै सैईंती ज़ण्हैं दाबेदे खास जोधै।