10 —Ariñagabá houn Ísüraelina lun hadügün aban bágüsi lautu akasia, to ábantu méturu diisi sentimeturu timigifen, ǘrüwa-wein-seingü sentimeturu tidabuberen, ǘrüwa-wein-seingü sentimeturu tiñun. 11 Hafurarounme lau golu dandu turageirugugiñe kei bóugudigiñe tibiti, ru huguyame aban riban golu geyegua tau. 12 Hadügame giñe gádürü bángüli golu bíchigeime luagu gádürü tugudi, biama luéigiñe aban oubaü, biama luéigiñe le aban. 13 Hadügame ebu lauti fulansu akasia, hafurareime lau golu, 14 háchareime lidoun bángüli le tóubawagubei bágüsi lun gayara lan tiñurawagun lau, 15 ábame magida baali lan; bígireime ñein lidan tubangülin bágüsi, 16 ábame bíchuguni lúrudu le lunbei níchuguni bun tidoun bágüsi.

17 —Hadügame giñe aban idáü lau golu le tímatimaati, aban méturu diisi sentimeturu limigifen, ǘrüwa-wein-seingü sentimeturu lidabuberen, 18 hau bián kátaña garünatiña láutiña golu le nadagimeinwati lau marüdiyu luéigiñe biángubei oubaü ligibuagu tidáü bágüsi. 19 Idáü hama bián kátaña garünatiña hagía ábanmemebaña pisi, luágubei aban oubaü ligibuagu idáü aban, le aban luagu le aban oubaü ligibuagu idáü, 20 gagibuguhaba gama lumoun lau hagibu luagun idaüni, lerederame harüna le ítarabei kei tarüna ágila tuleñu ligibuagu idaüni, lun hadouragun lau idaüni lau harüna. 21 Lárigiñe ábame bíchuguni idáü tuagu bágüsi, bíchigeime lúrudu le lunbei níchuguni bun tidoun bágüsi.

22 Ñeinba nadunragua buma, íñugiñe libiti idáü, habadinaguagiñe bián kátaña garünatiña hagía ábame nasubudiragüdüni nilurudun bun lun bíchuguni houn Ísüraelina.

1 Aba ladügünu Besaléli bágüsi lau akasia, aban méturu diisi sentimeturu timigifen, ǘrüwa-wein-seingü sentimeturu tidabuberen, ǘrüwa-wein-seingü sentimeturu tiñun.

1 Aba lariñagun Bungiu lun Moisesi:

2 —Weyu furumiñe lidan furumiñeti hati, lunti bafidiragunu sanduariu tuma kianpu lánina óundaruni luma Bungiu. 3 Bíchigounme lubagüsinina daradu tidoun, bayaraguame tau, tau belu.

20,21 Lárigiñe aba lanügüni Moisesi dübü le ñein lubéi bürüwañu lan lúrudu aba líchuguni tidoun lubagüsinina daradu: Lárigiñe aba líchuguni ebu tuagu bágüsi luma tidáü íñugiñe tibiti, aba lanügünu turageirugun sanduariu, aba ladibiragüdünu belu lun layaraagun tau bágüsi, ítara kei buga lariñaguni Bungiu lun.

89 Dan lebelurunbei Moisesi tidoun kianpu lánina óundaruni lun ladimurehan luma Wabureme, aba laganbun ladimurehan Wabureme lun tigibuagugiñe tidáü lubagüsina daradu habadinaguagiñe bián kátaña garünatiña.

33 Ítara liñati, aba houdin luéigiñe luwübüri Wabureme, aba héibugun luagu ǘrüwa weyu. Habá habaañoun lubagüsina lidaradun Wabureme áluaheina aban fulasu lun hemeraagun. 34 Wéyuaguha, ítara kei hagumeserun awansera aban giñeha lamufurun dúeri le lani Wabureme hóugiñe. 35 Dántiha le hagumeserun awansera tabu bágüsi, ábaha lariñagun Moisesi:

«Saraba, Wabureme!

Waraügua hamá báganiñu!

Lun lidan lanme harihinibu ha iyereehabúbaña bun lun héibaagun!»

36 Gama lumoun danha le tararamagun bágüsi, ábaha lariñagun Moisesi:

«Giribubá guentó, Wabureme,

houn lisudaranigu Ísüraeli

ha gíbebaña darí lun siñá lan habahüdǘn!»

1 Aba lariñagun Wabureme lun Moisesi:

2 —Ariñagabá houn Ísüraelina lun lanügün kada aban hádangiñe hábutigu türibu aban badun, so dúusubei badun hadan súngubei. Ábame babürüdüni liri kada aban luagu lubadun, 3 babürüdeime liri Aarón luagu habadun lani Lewí türibu, gasu ñeinbei lan aban badun luagu kada hábuti türibu. 4 Ábame badagaragüdüni tidan kianpu lánina óundaruni, tigibugiñe lubagüsina daradu, le ñein lubéi nóundaragua huma. 5 Nadügüba lun láhüchagun lubadun le nanúadirubei, ítara luba masigirun hamá Ísüraelina adimureha wuriba huagu nigibugiñe.

6 Aba lariñaguni Moisesi káteimeme le houn Ísüraelina, aba líchuguni kada aban hádangiñe hábutigu türibu lubadun lun, aba lóundarun duusu badun. Ñeinñein giñe lubadun Aarón laganagua. 7 Aba ladagaragüdüni Moisesi badun burí ligía ligibugiñe Wabureme tidan kianpu lánina daradu, 8 larugan dan le lidin ñein, aba larihin luagu hüchaguaali lan lubadun Aarón, le hani lani Lewí türibu, egelewehaali, ani gínhali alüméndüra to funaaru. 9 Ábati lasagaruni Moisesi sun badun liñúarürugugiñe Wabureme, aba larufuduni houn Ísüraelina. Lárigiñe harihini, aba lanügüni kada aban lubadun.

10 Ábati lariñagun Wabureme lun Moisesi:

—Ruyabéi lubadun Aarón tigibugiñoun lubagüsina daradu, ábame bareiduni ñein keisi aban eweridiruni houn gürigia mabuchahatiña ha. Ítara luba madimurehanhaña lanme wuriba nigibugiñe móunwegun hamaamuga.

11 Aba ladügüni Moisesi sun le, ítara kei lariñaguni Wabureme lun,

14-16 Aba háfuridun Ísüraelina tídangiñe hakianpun lun hánhiñuraguni duna, fádirigu ha táubaña lubagüsina daradu habá habá. Danti le hebelurunbei fádirigu dúnarugun, aba ladüdürün hagudi lau duna le lárurugubei, aba lerederun léibaagun duna le ñǘbuinbei íñugiñe aba lararamagun lun labuinchagun lidan aban, dise luéi Adamü, uburugu le lubadubei Saretán. Dúnati léñaha ararirubei lidoun barana hilaali, aba lasigirun éibaagua darí lagumuchun. Ítara liña lafanreinragun duna, aba hánhiñuraguni Ísüraelina ligibugiñe uburugu Herikó. 17 Hiñugua hamuti sun Ísüraelina Hordán mábeiñu, sun añaha lan fádirigu ha táubaña lubagüsina lidaradun Bungiu rara lamidan Hordán lidan fulasu mábeiti.

18 kei háfuridun fádirigu lídangiñe Hordán, aba híchuguni hagudi luagu fulasu mábeiti, ábaya lagumeserun duna éibaagua kéiñaha lubéi.

1 Anihein buga aban baríeiru lauti dübü geyegu lau Herikó ani siñati láfuridun ni aban Herikógiñe, ni lebelurun, ladüga darúagua buga lubenari baríeiru lun lesefurun hawéi Ísüraelina. 2 Gama lumoun aba lariñagun Wabureme lun Hosué:

—Derege naali Herikó bun lau sun lurúeite hama lisudaranigu. 3 Huguya súdara Ísüraelina, adüga humá aban geyeguaü lau uburugu sagü weyu luagu sisi weyu. 4 Ábame houdin sedü fádirigu tubá tubá lubagüsina daradu tau aban fidu lautu liganchun mudún luma kada aban, lémeti lisedün weyu, ábame hadügün sedü geyeguaü lau uburugu, añahame fádirigu íñaahoun hafidun. 5 Danme le haganbun tínwinrun fidu aban ínwinruni le migifeti; ábame hagúaragun lau sun here, ábame lábürühan baríeiru lauti dübü le geyegubei lau uburugu. Ábameti lawanserun kada aban hídangiñe lun uburugun.

6 Aba lagúarun Hosué houn fádirigu, aba lariñagun houn:

—Barǘ humóun lubagüsina lidaradun Wabureme, ábame houdin sedü hídangiñe tubá tubá bágüsi tau fidu to lautu liganchun mudún.

7 Lariñagati houn híbiri gürigia:

—Heiba, ábame hegeyedagun lau uburugu. Wügüriña ha lánina wuribu, heiba tigibugiñe lubagüsin Wabureme.

20 Aba hagúaragun gürigia, aba tínwinrun fidu. Dan haganbunbalin Ísüraelina tamuri fidu, aba hagumeserun agúaraha lau sun here, aba lábürühan lubarieirun uburugu. Ábati hawanserun uburugun, aba hárügüdüni.

2 aba hawaraüdagun lun hageindagun hama Ísüraelina, lárigiñe wuribu, aba hagañeiruniña Filistéana Ísüraelina aba háfarun gádürü-milu hádangiñe. 3 Dan hagiribudun Ísüraelina tidoun kianpu-agei, aba hariñagun hábutigu Ísüraelina:

—Ka uagu lígira Wabureme lun hagañeiruniwa Filistéana uguñe? Wanügaaru lubagüsina lidaradun Wabureme Silogiñe lun lidin Bungiu waganagua gayara láamuga lesefuruniwa hawéi wáganiñu!

4 Ábati hóunahan Ísüraelina wügüriña Siló, aba hanügünu lubagüsina lidaradun Wabureme Sunti gabafu ñéingiñe, le gámabalin lálana larúeihan hagibuagu kátaña garünatiña. Ñǘbuintiña giñe Ofuní luma Fineesi ha lirahüñü Elí úara tuma lubagüsina lidaradun Wabureme. 5 Dan tachülürünbei bágüsi tidoun kianpu-agei, aba hagúaragun Ísüraelina lau saragu ugundani darí lun lánhingichun múa.

6 Dan haganbunbalin Filistéana agúaraguni ligía aba hariñagun:

—Ka san lébubei saragu chagaguaü le tídanbei hakianpun-agei Ebüréana?

Gama lumoun dan hasubudirunbalin luagu chülüharu lan lubagüsina lidaradun Wabureme tidoun kianpu-agei 7 aba hanufudedagun aba hariñagun:

—Chülüha Habungiute tidoun kianpu-agei! Fugiabugu wagía lugundun mítaranñahati! 8 Fugiabugu wagía! Kaba esefurawa luéi wábürühan lúhaburugun Bungiu le wéiribei ubafu? Ligía le agünrinchagubaliña Ehiptuna lidan fulasu mageirawati hau sun hawuyeri igei! 9 Ragǘ humá lubeiti anigi súdara Filistéana, hageindagua here, miabin humaamuga lun hadamunme Ebüréana kei buga herederun wadamunme!

10 Ábati hábürühan Filistéana hawagun Ísüraelina, aba heferidiruni Ísüraelina wuribu, aba héibaagun tidoun hakianpun-agei. Hilatiña darandi-milu wügüriña ha eibu umutiña hádangiñe Ísüraelina. 11 Ragǘ hamutu giñe Filistéana lubagüsina lidaradun Wabungiute, áfara haméi Ofuní luma Fineesi ha lirahüñü Elí.

6 Lárigiñe aba labeichaguniña Wabungiute lílana Asüdódu saragu, aba labuinchagüdüniña lau anufudei lau lasandiragüdüniña lau tumoru. 7 Danti le harihinbalin lílana Asüdódu katei le, aba hariñagun:

—Moun lumuti terederun lubagüsin Lubungiute Ísüraeli wama, lugundun labeichuñadiwa Bungiu le héreti, dandu wagía, kei Dagón le wabungiute.

8 Aba lubeiti hóunahan ariñaga houn ábutigu Filistéana lun hóundaragun hama, aba hariñagun houn:

—Kaba wadüga tau lubagüsin Lubungiute Ísüraeli?

Hariñaga houn:

—Barǘ humóun uburugun Gatü.

Aba hanügünu Filistéana ñeinhin. 9 Gama lumoun lárigiñe hanügünu ñeinhin, aba ládarun Wabureme anufudei hadoun lílana uburugu ligía, aba lasandiragüdüniña lau tumoru dandu hawagu wéinamuhaña kei hawagu ñǘbürigiña. 10 Ábati hanügünu Filistéana bágüsi uburugun Ekürón; gama lumoun dan le tachülürünbei ñeinhin, aba hagúaragun lílana Ekürón:

—Barǘ hamá lubagüsin Lubungiute Ísüraeli wamoun lun háfaraguniwa sun wagía!

11 Keiti labuinchun uburugu ligía lau anufudei gáfarahati, aba hóunahan hawagu sun ábutigu Filistéana aba hariñagun houn:

—Giribugüda humóun lubagüsin Lubungiute Ísüraeli tárigoun áfaragua liñaliwa sun wagía.

1 Sédüñein hati tau lubagüsina lidaradun Wabureme hamúanrugu Filistéana. 2 Aba hóundaruniña Filistéana fádirigu hama garíaahatiña, hariñaga houn:

—Kaba funa san wadüga tau lubagüsina lidaradun Aburemei? Ariñaga huméi woun ida luba lan ligaburi wáguyugüdünu tárigoun.

3 Hariñaga houn:

—Anhoun háguyugüda lubagüsina lidaradun Lubungiute Ísüraeli, óunaha humá aban idewesei úara tuma keisi lafayeiruaha wuribati le hadügübei lun Aburemei. Ítara luba hareidagun, ábame gunfuranda humani ka lan lébubei labeichunün.

10 Aba hadügüni wügüriña hagía ítara. Aba hanügüniña bián bágasu garahüñütiña hagía, aba hádaruniña harahüñü lidoun hafarügan, ábati hadahirunu karü hawagu bágasu hagía; 11 lárigiñe aba híchugunu lubagüsina lidaradun Wabureme tidoun karü, tau sun gafu to ñein habéi hayawa garadun láutiña golu luma liyawa tumoru. 12 Lárigiñe aba hagumeserun bágasu hagía éibuga, aba hárügüdüni lémeri Betü-sémesi, amuuheina, afalareina aban üma suruti megeyedunga luagun ni aban oubaü. Éibugatiña Filistéana hárigi hárigi darí lumoun láfadaragun Betü-sémesi 13 Ñéinñanu Betü-sémesina lidan fulasu wayati alubaha türigu, dan le harihinbarun bágüsi, aba habuinchun lau ugundani. 14 Dan tachülürün karü licharirugu Hosué le Betü-sémesina, aba tararamun. Ñeinñein aban óunwenbu dübü. Ábati háfuragun Betü-sémesina watu lau tufulansuna karü, aba háfaruniña bágasu lun hadagaragüdün lun Wabureme. 15 Rarigüda hamaaruti buga Lewitagu bágüsi tuma gafu to lauboun ílagu golu, aba híchugunu luagu óunwenbu dübü ligia; aba hadagaragüdün Betü-sémesina lun Wabureme luagu weyu ligía.

1 Ábati houdin lílana Kiriatü-hearimü, aba hanügünu lubagüsina lidaradun Wabureme, aba hebelaagüdünu lúbiñoun Abinadábü, to luáguboun aban wübü; aba hanúadiruni Eleasárü le liráü lun lóunigirunu.

2 Sügüti wein irumu lúmagiñe tichugún bágüsi Kiriatü-hearimü, añahati sun Ísüraelina áluahei Wabureme tau sun hanigi.

12 Dan lariñawagúnbei lun urúei Dawidi luagu labiniruniña Wabureme liduheñu Owedi-edomu lau sun hamegen, ladüga anuhein tan lubagüsin Wabungiute hama, aba lidin Dawidi, aba lanügünu lubagüsin Wabureme lúbiñegiñe Owedi-edomu lun luburuguterugun lau óunwenbu ugundani. 13 Lárigiñe híchugun ha táubaña bágüsi sisi pasu, aba láfarun Dawidi aban bágasu wügüri luma aban gábara dibuneti lun ladagaragüdün.

14 Tauñein aban tidáü dúnigu lautu linu Dawidi, ábati labinahan lau sun lere ligibugiñe Wabureme, 15 dánduti ligía kei sun Ísüraelina, aba houdin tau lubagüsin Wabureme agúaraheina le hagundan, íñaaheina fidu.

1 Ábati lóundaraguagüdüniña Salomón sun ábutigu Ísüraelina Herusalén sun hábutigu türibu, hama sun ha wéirigubaña Ísüraeli, lun tásügüragüdüniwa lubagüsina daradu lúmagiñe Sióngiñe, le luburugute Dawidi. 2 Aba hóundaragun sun Ísüraelina laganagua tufedun dibasein, lidan hati le gíribei Etanímü, le lisedün hati. 3 Danbei hachülürün sun ábutigu, aba hanügünu fádirigu lubagüsina daradu. 4 Aba hanügünu úara tuma kianpu lánina óundaruni luma Bungiu luma sun burí umegeguni sagüráuti le tídanbei, le burí hanaagubei fádirigu hama Lewitagu. 5 Aba hóundarun sun Ísüraelina luma urúei Salomón tigibugiñe lubagüsina daradu, aba burí hadagaragüdün saragu mudún hama bágasu, gíbetiña darí lun siñá lan habahüdǘniwa. 6 Lárigiñe aba hanügünu fádirigu lubagüsina lidaradun Aburemei turageirugun ténpulu, lidoun Fulasu Sándutimati, lábugiñe harüna kátaña garünatiña, 7 ha burí tulegubaña arüna ligibuagu fulasu le ñein tubéi bágüsi, darugu liña tau bágüsi labu lau índanu le tanaahagüle. 8 Gama lumoun migifeti burí índanu le tanaahagüle darí lun arihúa lan lígirugu lúmagiñe lídangiñe Fulasu Sánduti, ligibugiñe Fulasu Sándutimati, lau sun marihin lan bóugudigiñe, ani ítara liña lerederun chülǘ lumoun weyu le uguñebei. 9 Turageirugu bágüsi biámarügüñein fulansu lauti dübü le líchugubei Moisesi tidoun, lidan wübü Orebü, fulansu lánina daradu le ladügübei Aburemei hama Ísüraelina danbei le háfuridun Ehiptugiñe.

10 Danbei le háfuridun fádirigu lídangiñe Fulasu Sánduti, aba tabuinchun litenpulun Aburemei lau dúeri, 11 ani lídangiñeti tabuinchun ténpulu lau huánriñu merede habéi fádirigu lun hadügüni kultu, ladüga buinha buga ténpulu lau luéirigun Aburemei.

14 Lariñahare Aburemei:

—Giribu humá nun isaanigu mabuchahatiña, lugundun au Haburemebei. Nanügüba aban lídangiñe kada uburugu, biámame hádangiñe kada iduheñu, ábame nagiribudagüdünün uburugun Sión. 15 Níchuguba arúeihatiña hun ha áutiña nagundaara, lun hadundehanün lau lichú aau luma gunfurandaü. 16 Danme le gíbeguaadün fulasurugu, danme gíbeeña hisaanigu, madimurehóunhalime tuagu lubagüsinina lidaradun Aburemei; masaminarúnwabei maritawagún ligíame tuagun; memegeirúnwaarume, madügǘniwa tuguyame teweñegua. Au le Aburemei ru numuti nererun.

1 Lidan meha furumiñeti daradu le ladügübei Bungiu hama wagüchagu, ru lumuti meha gumadi houn ida luba lan háhuduragun lun, gama lumoun tidan aban sanduariu ubouaguna. 2 Ítara liña ligaburi taranserún muna tuguya: Múnada, ñeinñein bián rumu; lidan furumiñeti rumu le gíribei Fulasu Sánduti, ñeinñein lebu sanudelu luma dábula le ñein tubéi fein to anuadirúaboun. 3 Ñeinñoun aban belu labadinagua bián rumu ligía, Fulasu le Sándutimabei líribei libiaman rumu. 4 Lidan rumu ligía, ñeinñein aban latarü golu lun lágudahoun kupali ñein, tuma bágüsi to lánina daradu, golu sun touba. Turageirugu bágüsi tuguya, ñeinñein aban ágeidinaü golu le gádanbalin éigini le gíribei maná, ñeinñein giñe lubadun Aarón le áhüchagubei, luma dübü le uágubei labürühóua diisi gumadi. 5 Tóugiñe bágüsi tuguya, ñeinñoun hayawa kátaña garünatiña ha lánina uéiriguni, ha adouragubaña tau bágüsi tuguya, le ñein lubéi ferudunawa lan figóu. Mabusenrúntiwa wadimurehan saragu luagu burí katei le guentó.

19 Ábati tadaarun litenpulun Bungiu to siéluboun, aba tarihín gafu to lagei lidaradun Bungiu hama lumutuniña ñein tidan litenpulun. Aba ñein lan labirihaniga, areinchuni, wayuhuru, aban hárabaganali, luma lábürühan lúbara huya dereguati le wéinamuti.