1 Lárigiñe aba narihin lasaliragun aban katei kamá hamuga aban lálana arúeihani lóugiñe dúeri le hábulugubei kátaña garünatiña hagía, kamá lauti safiru lálana arúeihani ligía. 2 Aba lariñagun Aburemei lun wügüri le taubei daüguaü tautu linu:

—Beluba labadinaguóun tubalaba karü, hábugiñe kátaña garünatiña, banügame fiu leñegura watu le durungu umuti, lídangiñe le hamidanguabei kátaña garünatiña hagía, ábame bachagaruni luagun uburugu.

Aba narihin lebelurun wügüri ligía. 3 Lidan oura ligía, luéigiñeñanu suru tibiti ténpulu kátaña garünatiña hagía, buin liña tibürürün ténpulu le múnadagiñebei lau aban dúeri. 4 Ábati liñuragun luéirigun Aburemei lungua hóugiñe kátaña garünatiña hagía, aba lidin luagun tubenari ténpulu, aba tabuinchun ténpulu lau dúeri ligía aba larugoungadun bürürü lau larugoungadüna luéirigun Aburemei. 5 Aganbúati lamuri harüna kátaña garünatiña hagía lidoun bürürü le bóugudigiñebei. Ítara liña kamá hamuga ladimurehaña Bungiu Suntigabafu. 6 Ábati lariñagun Aburemei lun wügüri le taubei daüguaü tautu linu lun lanügün watu gemeti labadinaguagiñe tubalaba karü hamidanguagiñe kátaña garünatiña hagía, aba lidin wügüri ligía aba lararamun lurugabu aban lídangiñe ubalabaü. 7,8 Ñeinñein aban katei kamá hamuga lúhabu wügüri lábugiñe harüna kátaña garünatiña hagía. Aba látuleruni aban hádangiñe lúhabu lidoun watu gemeti le amidanibei, aba lanügün murusun lídangiñe, aba líchuguni lúhaburugun wügüri le taubei daüguaü tautu linu, aba lanügüni, aba lidin. 9 Aba narihin gádürü ubalabaü harugabu kátaña garünatiña hagía, aban lurugabu kada aban. Mirí buriti ubalabaü ligía kamá hamuga lauti topasiu. 10 Aban labu gádürügubei ubalabaü ligía, kamá hamuga lídanguañein aban le aban. 11 Dan le hawanserun gádürü kátaña hagía lidoun aban lídangiñe gádürü oubaü, magararagúntiña, héibugun le ñeinhin lubéi lidin le habá habaabei. 12 Hágubu, hanagan, háhabu luma harüna buin liña lau larugounga luéigiñe sun oubaü, ítara kei gádürügubei ubalabaü. 13 Aba naganbun lariñawagún lun ubalabaü «karü». 14 Kada aban hádangiñe kátaña garünatiña hagía, gádürüñein ligibu: Le furumiñeti ligibu, ligibu aban bágasu; le libiaman, hagibu gürigia; le lǘrüwan, ligibu liñún; le ligadürün, tigibu ágila. 15 Kátaña hagía, hagiaméme ha buga narihubaña lubadu duna Kebarü.

Aba hiñuragun kátaña hagía houngua, 16 dan le hawanserun, aba giñe lawanserun ubalabaü; dan le hiñuruni harüna lun hiñuragun houngua múarugugiñe, mafanreinragunti ubalabaü hawéi; 17 dan le herederagun, aba giñe lerederagun ubalabaü; dan le hiñuragun houngua, aba giñe liñuragun ubalabaü lungua, lugundun ábanmeme úgubu kátaña hagía luma ubalabaü ligía.

18 Ábati liñuragun luéirigun Aburemei lungua tóugiñegiñe ténpulu aba lararamun hóugiñe kátaña garünatiña hagía. 19 Aba hiñuruni harüna aba hiñuragun houngua múarugugiñe. Ariha numuti hiñuragun houngua, lau ubalabaü hóubagiñe, aba hararamagun luéigiñe bena le luéigiñebei oubaü le ñéingiñe lubéi laboucha weyu tibiti litenpulun Aburemei, ñeinñein luéirigun Lubungiute Ísüraeli hóugiñe. 20 Hagiaméme buga kátaña garünatiña ha narihubaña lábugiñe Lubungiute Ísüraeli lurugabu duna Kebarü. Ábati nasubudiruni kátaña lan. 21 Gádürüñein ligibu kada aban hádangiñe, gádürü larüna, ñeinñein aban katei lábugiñe harüna kamá hamuga háhabu gürigia. 22 Genegeguati igibu ligía luma hagibu kátaña garünatiña ha buga narihubaña lurugabu duna Kebarü. Lubaruaguóun kada aban hádangiñe lawansera.