1 Aba líchuguni Aburemei lúhabu nuagu aba lasagarunina lau lubafu, aba líchugunina lidan aban fulasu wayati le buin umuti lau abun. 2 Aba ladügün Aburemei lun néibuguni fulasu ligía luéigiñe sun oubaü; saragu liña burí abun ñein múarugu, gíbeti, ani mábeihali buidu buidu. 3 Ábati lariñagun Aburemei nun:

—Liráü wügüri, afiñetibu san gayara lan labagaridúnya abun burí le? Aba nariñagun lun:

—Nabureme buguyarügüñein asubudirei.

4 Ábati lariñagun Aburemei nun:

«Badimureha lun abun burí le lidan niri, bariñagame lun: Aganbabéi luganute Aburemei: Abun burí mábeihali, aganbabéi luganute Aburemei. 5 Lariñahare Aburemei hun: "Níchiga awaraguni lánina ibagari hidoun lun háguyugun. 6 Níchuguba ílagülaü luagu, nabuinchagüdübei lau ǘgürügü, nafurarubei lau uraü, ábame níchugun ibagari lun lun láguyugun. Ábameti hasubudiruni luagu au lan Aburemeibei" ».

7 Aba nadimurehan lun burí abun ligía kei le aubei lariñagei Aburemei nun. Sunti anaha lan adimureha lun, aba naganbun aban areinchuni: Aban hárabaganali, aba lagumeserun abun ligía adunragua lúmagua. 8 Aba narihin lasaliragun ílagülaü luma ǘgürügü luagu, adouragueina ligía uraü lau. Gama lumoun mabagarimemeti.

9 Ábati lariñagun Aburemei nun:

—Badimureha lun awaraguni lánina ibagari lidan niri, bariñagame lun: «Lariñahare Aburemei: "Awaraguni lánina ibagari, ñǘbuinba lídangiñe gádürü larigei ubóu, ruba ibagari lun úgubu burí hilaali le" ».

10 Aba nadimurehan lidan liri Aburemei kei lariñaguni nun, aba liabin awaraguni lánina ibagari, aba lebelurun lidoun burí úgubu ligía, aba háguyugun, aba hararamun. Saragu haña gürigia hagía kei aban gúlunu súdaragu.

11 Ábati lariñagun Aburemei nun:

—Liráü wügüri, ítara haña lánigu Ísüraeli kei abun burí le. Hariñahare: "Mábeihali burí wabu, úaali ni murusun emenigini wawagu, féridiguaadiwa". 12 Badimureha lubeiti houn lidan niri, bariñagame houn: "Lariñahare Aburemei: Numutuniña, nadaarubei humúaha; nasagarubadün lídangiñe lunya hagiribudun lumúanrugun Ísüraeli. 13 Danme nadaaruni humúaha ani saganáünme lídangiñe, hasubudirubei huguya numutuniña luagu au lan Aburemeibei. 14 Níchuguba ibagari hidoun, ábame háguyugun; ábame níchugunün lun haganóun hageira. Ábameti hasubudiruni luagu au lan le Aburemei ariñagubalin ani au lan giñe adügübalin. Au le Aburemei ariñagubalin".

15 Aba ladimurehan Aburemei nun, lariñaga:

16 —Liráü wügüri, barüba aban wewe, babürüdame luagu: "Hudá hama Ísüraelina ha lumadagu". Banügayame aban wewe, babürüdame luagu: "Lun Hosé le luewen Éfürain hama sun lumadagu ha híbiri Ísüraelina". 17 Lárigiñeme bóundaragueime biángubei búhaburugu lidan aban, lun larihíniwa kei ábanrügü. 18 Danme hariñagun lílana bageira bun: "Ariñagabéi woun ka lan mini lan le", 19 bariñagame houn: "Lariñahare Aburemei: Nanügübei luewen Hosé le lúhaburugubei Éfürain luma hama híbiri lani Ísüraeli türibu, ábame níchuguni lumoun luewen Hudá lun nadügüni ábanrügü wewe núhaburugu". 20 Rédeiba lau biángubei wewe le uágubei babürüha búhaburugu ligibugiñe harihin. 21 Bariñagameti houn lárigiñe: "Lariñahare Aburemei: Nasagarubaña Ísüraelina haganaguagiñe néchanigu ha ñéinhinbei hadagara; nóundaragubaña lídangiñe sun fulasu, ábame hagiribudun hageiroun. 22 Nadügüba ábanrügü néchani hádangiñe ya lidan ageiraü le, lidan luwübüri Ísüraeli, ani ábanmemeba urúei arúeihaña. Mafanreinragundigiaañame lidan bián néchani, ni lidan bián arúeihani. 23 Máhuduragunhañame giñe houn hagübüri búngiugu, madaagun hagíame sun luwuyeri figóu. Nesefurubaña lídangiñe sun hawiye le adüga hamaalibei, narumadagüdübaña lídangiñe hafigoun. Hagíaba numutuniña, aume Habungiute. 24 Nubúein Dawidi, ligíaba harúeite, ligíarügüba giñe hóuniri sun hagía. Hadügübei le nubeibei, hagunfulirubei nilurudun luma nererun. 25 Haganóuba lidan ageiraü le le níchugubei lun nubúein Hakobu, le meha giñe ñein lubéi haganawa hagüchagu. Ñeinba haganawa súnwandan hau sun harahüñü hama sun hadügawagun; nubúein Dawidi, ligíaba hábuti súnwandan. 26 Nadügüba aban daradu hama lun nachoururun aban ibagari darangilati houn. Ábanbei daradu le magumuchaditi. Nadügüba lun haganwoundun, níchuguboun nitenpulun to sánduboun haganagua lun sun dan. 27 Naganóuba haganagua, auba Habungiute, hagíame numutuniña. 28 Danme ñein tan nitenpulun to sánduboun haganagua, hasubudirubei híbiri néchanigu luagu anúadira naali lan Ísüraeli keisi numegen le sagüráuti".