1 —Nariñahare au le Aburemei: "Darugu luba lubenari bürürü le luéigiñebei oubaü le ñéingiñe lubéi laboucha weyu lidan sisi weyu le luéyuri wadagimanu, ladaarúame lidan luéyuri emeraaguni luma lidan luéyuri iseri hati. 2 Lebeluruba gumadimati luéigiñe bürürü le bóugudibei, ábame lararamun lurugabu aban lídangiñe luagaburi bena. Añahameti fádirigu águdahaña animaalugu ha lánina adagaragüdüni, adüga hameime adagaragüdüni le lánina arandaruni le lanügübei gumadimati, ábame labuluchagun gumadimati lurugabu bena, darí ladagarun lerebe múarugu, lárigiñeme ábame láfuridun. Madourúnhalime bena darí rábounweyu. 3 Lidan burí luéyuri emeraaguni luma iseri hati, háhuduraguba gürigia ligibugiñe Aburemei, ligibugiñememe bena ligía. 4 Animaalu ha lúnbaña lanügüniña gumadimati lidan luéyuri emeraaguni lun hagudún keisi idewesei lun Aburemei: Sisi mudún ñǘbürigiña luma aban mudún le wügüri ha úati ni kata mégeiti hawagu. 5 Úara luma kada mudún líchuguba ǘrüwa líturu dimí garaba. 6 Lidan luéyuri iseri hati, líchuguba aban bágasu wügüri, sisi mudún ñǘbürigiña luma aban mudún ñǘraügili ha úati ni kata mégeiti hawagu. 7 Úara luma kada bágasu, líchuguba wein líturu idewesei le fulúaruauti luma luagu kada mudún, ánhañati mudún ñǘbürigiña, ha labusenrun líchugun. Luagu kada wein líburu ilaü, ǘrüwa líturu dimí garaba".

8 —Danme lebelurun gumadimati, luéigiñeba lebelaagüle bena lebelura, ñéingiñeba giñe láfurida. 9 Lidan burí fedu, danme hebelurun gürigia áhuduragua lun Aburemei, ítara luba ligaburi hadügüni: Ha ebelurutiña luéigiñe bena le luágunbei nórute, luéigiñeba bena le luágunbei suru háfurida, ha ebelurutiña luéigiñe bena le luágunbei suru, luéigiñeba bena le luágunbei nórute háfurida. Máfuridunbaña lídangiñe bena le ídangiñebei hebelura, lídangiñeba le ligibugiñebei háfurida. 10 Lunti lebelurun gumadimati hama lílana fulasu, furí ligíame hama. 11 Lidan burí ámuñegueinarügü fedu, líchuguba wein líturu ilaü luagu kada bágasu luma luagu kada mudún; hawagu mudún, le habusenrun gürigia híchugun. Luagu kada wein líturu ilaü líchuguba giñe ǘrüwa líturu dimí garaba.

12 —Danme líchugun gumadimati aban idewesei lun Aburemei lau lugundan, kei burí aban animaalu lun adagaragüdüni le gudawarügüti aban lan adagaragüdüni lánina arandaruni, ladaarúba bena le luágunbei oubaü le ñéingiñe lubéi laboucha weyu, ábame ladügüni ítara kei ladügüni lidan burí luéyuri emeraaguni. Lárigiñeme láfuridun, ábame ladourúniwa bena.

13 —Sagü binaafin lederegerúaba aban mudún le ábanti irumu lau, le úati ni kata mégeiti luagu, lun lagudúniwa keisi adagaragüdüni lun Aburemei. 14 Lichugúba giñe aban idewesei lun Aburemei sagü binaafin: Sedü líburu fulúaruau, luma aban líturu garaba le lunbei lawiyurúniwa tuagun fulúaru. Gasu ladügün igaburi le súnwandan. 15 Adagaragüdüni gudawarügüti le lauti mudún ñǘraügili luma idewesei le fulúaruauti luma garaba, lunti ladügǘn súnwandan binaafin.

16 —Nariñahare au, le Aburemei: "Anhein edeweha gumadimati murusun lídangiñe lufulasun lun aban hádangiñe lirahüñü, liábinba fulasu ligía lun halaganteme ladügawagun. 17 Gama lumoun anhein edeweha gumadimati murusun lídangiñe lufulasun lun aban hádangiñe eseriwidutiña lun, dariba lumoun irumu le lufedun esefuruni lani lan eseriwiduti ligía fulasu ligía, ábayame lani lan gumadimati, lerederame keisi halagante lirahüñü. 18 Marichati gumadimati lun lagidaruni lumegen ni aban luéi. Le líchugubei houn lirahüñü keisi alagan, lídangiñeba le lani líchigei houn; ítara luba merede lan ni aban sin lumegen, machagaragun hagíame numutuniña".

19 Lárigiñe aba lanügünina wügüri ligía luéigiñe ebelaagülei le lóubagiñebei bena, tidoun burí rumu to luágunboun nórute, to adireirúaboun hóunrügü fádirigu. Aba larufudun aban ubaraü nun luagun oubaü le ñeinhin lubéi lálüda weyu, 20 aba lariñagun nun:

—Lídanba fulasu le háhuraagüdei fádirigu hágürügü animaalugu ha adagarubaña keisi adagaragüdüni luagu figóu, yaaba giñe hábouguei idewesei le fulúaruauti. Ítara luba mama lan mosu hasagaruni burí katei le lidoun bürürü le bóugudigiñebei, mebelu hagíame gürigia lun haguruhan luagu burí katei le adireirúbei.

21,22 Lárigiñe aba lanügünina luagun bürürü le bóugudigiñebei, aba léibugagüdüni gádürügubei larigei nun. Aba narihin luagu ñeinñein lan aban liraüraü bürürü lidan kada aban larigei bürürü. Aban labu súngubei, wein méturu luagu keinsi; 23 ñeinñein aban baríeiru lauti dübü geyegu tau burí rumu tuguya, ñeinñein burí régigi ǘnabu libiti baríeiru ligía. 24 Ábati lariñagun nun:

—Tídanba burí gusina to háhuraagüdaña ha eseriwidubaña ténpulurugu animaalugu ha híchugubaña gürigia lun adagaragüdüni.