1 Aba ladimurehan Aburemei nun, lariñaga:

2 —Buguya liráü wügüri, hadan gürigia mabuchahatiña baganawa. Gágutiña lun harihin, gama lumoun marihintiña; garigeirugutiña lun haganbun, gama lumoun maganbuntiña, ladüga mabuchahatiña. 3 Liráü wügüri, aransebéi lubeiti le lunbei banügüni lidoun adaürǘni, ábame báfuridun búbiñegiñe wéyuagu, bídinme lidoun amu fulasu, fagua ítara luba harihini luagu gürigia lan mabuchahatiña hagía. 4 Sagabei bílagu wéyuagu, aríagu hagía bun kamá hamuga béibuga lidoun adaürǘni. Lárigiñe ábame báfuridun rábounweyu kéinaba hamuga basagarúña bageiragiñe lidoun adaürǘni aríagu hagíame bun. 5 Lárigiñe ábame badügün aban hunrenti luagu baríeiru, aríagu hagíame bun, ábame báfuridun lau bílagu lídangiñe hunrenti ligía. 6 Danme laburigadun, ábame bíchuguni bílagu bégewagun, ábame báfuridun lau aríagume sun hagía bun. Badouraguame lau bigibu lun marihin bani fulasu. Busentina lun ábanbadibu lan seini houn lílana Ísüraeli.

7 Aba naranseruni nílagu kei lariñaguni Aburemei nun, aba náfuridun lau wéyuagu kamá nasagarúña nageiragiñe adaürǘwa lidan amu fulasu. Rábounweyu, aba nadügün aban hunrenti lau núhabu luagu baríeiru, dan le laburigadúnbei, aba níchuguni nílagu négewagun aríagu sun hagía nun, aba náfuridun lau.

8 Larugan binaafin, aba lariñagun Aburemei nun:

9 —Liráü wügüri, háfuga álügüda hamanibu Ísüraelina, gürigia mabuchahatiña ha, ka lan badügübei. 10 Ariñagabá lubeiti houn luéigiñe nóubadina luagu aban lan uganu le lun lurúeite Herusalén luma houn sun Ísüraelina ha aganóubaña ñein. 11 Ariñagabá houn luagu aban lan seini buguya houn, ani lunti lan giñe hadügüni le badügübei lugundun hasagarúba lan adaürǘwa bóugudi luéi hageira. 12 Gasu líchuguni hábuti lílagu légewagun, danme le laburigadun, ábame láfuridun lau luéigiñe hunrenti le lunbei hadügüni luagu baríeiru. Lídiba darugu lau ligibu, marihin láamugei ni aban, siñá láamuga giñe larihini fulasu. 13 Nachüürüboun nisenin luagun, ábame nárügüdüni, ábame nanügüni Babilónioun, hageira Kalüdéana, lidoun fulasu le lunbei marihin lani, ábame lounwen ñein. 14 Nachagaragubaña súdaragu ha geyegubaña lau lidoun gádürügubei larigei ubóu, hama ha híbiri lisudaranigu, ábame néibaahaniña tau nefeinte núhaburugu. 15 Danme chagagua naaña lidoun amu burí ageiraü luma hadoun amu néchanigu, ligíaba hasubudiruni luagu au lan Aburemeibei. 16 Gama lumoun nadügüba lun hesefurun átiri hádangiñe wuriburugugiñe, lídangiñe ilamaü luma lídangiñe sandi, lun habahüdaguni lagübüri burí katei le buga hadügübei hadan néchanigu le ñéinhinba lubéi houdin, subudi hamaamugei giñe luagu au lan Aburemeibei.

17 Ábaya ladimurehan Aburemei nun, lariñaga:

18 —Liráü wügüri, badadagara danme le beigin, hírugua buguyame dan le batun. 19 Bariñagame houn lílana fulasu luma houn lílana Herusalén luma houn sun Ísüraelina: "Anihán lariñagubei Aburemei: Héigibei heigin lau íruni, gurá humeime huniñe lau anufudei. Lerederuba ageiraü málouga, günringuañu ladüga hanarime lílana. 20 Lagünrinchawaguba sun uburugu le ñein hamuti gürigia aganóua; lerederuba fulasu keisi aban fulasu mageirawati. Ligíabati hasubudiruni luagu au lan Aburemeibei".

21 Lariñaga Aburemei nun:

22 —Liráü wügüri, ka san mini habéi Ísüraelina dan le hariñagun: "Lásügürüña dan ani magunfulirunti le lariñagubei profeta". 23 Ariñagabá houn: "Anihán lariñagubei Aburemei: Nadügüba lun mariñawagúnhali lan dimurei le Ísüraeli". Ariñagabá giñe houn luagu yarafaali lan weyu lun lasuseredun sun le ariñawagúbei lidan uénedü. 24 Úadigiaalime uénedü ni profesía le iyeeniti, 25 Lugundun nadimurehaba au le Aburemei, ani lagunfuliruba le nariñagubei furese. Harihubei, gürigia deretiña huguya le, nadimurehaba, ani lagunfuliruba le nariñagubei. Au, le Aburemei ariñagubalin.

26 Aba lariñagun Aburemei nun:

27 —Liráü wügüri, hariñahare Ísüraelina luagu mámaba lan guentó lagunfulira buénedü luma bani profesía. 28 Ariñagabá lubeiti houn: "Anihán lariñagubei Aburemei: Málübei anhein gúnfuli nererun; le ariñaga náalibei, lagunfuliruba. Au, le Aburemei ariñagubalin".