1 Lárigiñe aba naganbun lagúaragun aban umalali héreti narigeirugun, lariñaga:

—Chülühaña ha lúnbaña habeichuni uburugu, kada aban tau lárumate lánina günringuaü lúhaburugu!

2 Ábati narihin hebelurun sisi wügüriña luéigiñe bena le íñugiñebei, le luágunbei nórute, kada aban tau lárumate lúhaburugu. Hamidangua, ñeinñein aban wügüri tautu linu ladaüragun, barüina liña ílagu le lánina abürühani liranaagua. Aba hebelurun, aba hararamagun ligibugiñe latarü lauti buronse. 3 Ábati liñuragun luéirigun Aburemei lungua hóugiñe kátaña garünatiña hagía, le buga ñein lubéi, aba lidin tubenarin ténpulu. Aba lagúarun Aburemei lun buga wügüri le taubei daüguaü tautu linu, le laubei burí katei lánina abürühani liranaagua, 4 aba lariñagun lun:

—Éibugabei sun uburugu Herusalén, ábame bíchugun aban seini hereberugu sun ha hírubaña luagu burí katei wuribati le adügǘbei ñein uburugu.

5,6 Aba naganbun lariñagun houn ha híbiri wügüriña:

—Heiba lárigi lárigi éibugei uburugu, hagumeserame túmagiñe nitenpulun áfaragua wéiyaaña mutu, wügüriña, nibureingiña, irahüñü hama würiña. Gama lumoun maguura humá luagu ni aban le gawaguti seini lereberugu.

Ábati hagumeserun hámagiñe wéiyaaña mutu ha tigibugiñebaña ténpulu.

7 Lárigiñe aba lariñagun Aburemei houn:

—Heiba awiyedoun ténpulu; buíngüda huméi tibürürün hau hilaaña.

Aba háfuridun, aba hagumeserun áfaraha gürigia uburugu.

8 Sunti añaha lan áfaraha, aba nerederun nábugua. Ábati nabuluchagun dagá nerebe múarugu, aba nagúaragun ariñaga buin lau igarigu:

—Nabureme, bóunahaali san bigañi luagun Herusalén darime bagünrinchaguni murusunraü le erederubei lídangiñe Ísüraeli?

9 Lariñaga Aburemei nun:

—Wéiriti hafigoun lílana Ísüraeli hama lílana Hudá. Buin liña fulasu lau áfarahani. Buin liña uburugu lau múarani. Haritaguatiña luagu ígira naali lan fulasu, ani marihin nani le hadügübei. 10 Magudemehabubadina lubeiti houn, naguseragüdübaña luagu hóuserun.

11 Ábati liabin buga wügüri le taubei daüguaü tautu linu luma burí katei lánina abürühani liranaagua, aba lariñagun:

—Gúnfulihadina lau le bariñagubei nun.