1 Lariñaga Aburemei nun:

2 —Liráü wügüri, badimureha lidan niri kóntüra profetagu Ísüraelina, ha adimurehabaña hámagiñegua, bariñagame houn: "Aganba huméi le lariñagubei Aburemei: 3 Fugiabugu profetagu ibidiougua tau ha adügübalin le habusenrubei ani mewenedütiña le inarüniti! 4 Ísüraeli, ítara haña profetagu kei ounli áraabuna ha aganóubaña lidan günringuaü. 5 Madügüntiña ni kata luéigiñe lufulesein Ísüraeli, lun gayara lan lawandun wuriburugu danme le lachülürün luéyuri Aburemei. 6 Iyeeni burí hawenedü luma hani profesía. Hariñahare luagu luéigiñe lan nóubadina hadimureha, gama lumoun mama au óunahabaliña ani agurabatiña lagunfulirun le hariñagubei! 7 Iyeeni huénedü, iyeeni hani profesía! Ariñagatün luagu luéigiñe lan nóubadina hadimureha, gama lumoun hiyeeni. 8 Ligía nariñagunbei hun, au, le Aburemei: Kei iyeeni lubéi hariñagubei ani iyeeni giñe huénedü, kóntürañadina huagu, au le Aburemei ariñagubalin. 9 Nabeichubaña profetagu ha gewenedübaña le iyeeniti ani iyeeni ligía hani profesía. Siñabei gadan lániña hóundaragun numutuniña ha Ísüraelina; mabürüdǘnbei hiri tidan gárada to ñein lubéi bürüwañu lan hiri Ísüraelina, mebelubaña giñe lumúanrugun Ísüraeli. Hasubudirubeiti luagu au lan Aburemeibei".

10 —Yeegua hamutiña numutuniña lau hariñagun houn luagu buidu lan lidin sun katei, ani mama liña. Ítara haña kei le adügübei aban touba muna le machourunti, lárigiñe aban háhurudaguni lau sebi. 11 Ariñagabá houn ha áharuhagüdübaña touba muna luagu léiguaduba lan touba muna ligía. Láhuyuba huya gárati, lábürühaba lúbara huya dereguati kei lábürühan dübü, láfuruba garabali heriginiauti, 12 ábame léiguadun touba muna. Ábameti hálügüdüniwa: "Kagia suserebei lun sebi le híchugubei luagu?" 13 Ligía nariñagunbei au, le Aburemei: Lidan nigañi, náfuragüdüba aban garabali heriginiauti; náhuyagüdüba huya gárati, lábürühaba lúbara huya dereguati kei dübü lun lagünrinchaguni sun katei lau lanarime igañi. 14 Ábame naguluduni touba muna le háharudagüdübei, nábürügüdübei múarugun, ábame lerederun lebu furangu. Lábürühaba touba muna, ábame hóunwegun lábugiñe. Ábameti hasubudiruni luagu au lan Aburemeibei. 15 Narariragüdübei sun nigañi luagun touba muna ligía luma hawagun ha áharudagüdübalin, ábame hariñagun gürigia: "Meredeti ni kata lídangiñe touba muna ni ha áharudagüdübalin, 16 lani Ísüraeli profetagu ha, ha burí meha gewenedübaña le iyeeniti, ariñaga hagía lun Herusalén luagu buidu lan lidin sun katei, ani mama liña". Au, le Aburemei ariñagubalin.

17 —Guentoti, badimureha houn würiña ha lílana bageira, ha adimurehabaña lidan niri lau hani houngua, 18 bariñagame houn: "Anihán lariñagubei Aburemei: Fugiabugu huguya ha éibaahabaña gürigia; huguya le áhüchagubei mafu lun arünaü, luma burí belu lun híchugunu gürigia hábulugu! Haritaguatün san luagu hárügüdübaña lan gürigia lun gayaraabei lan hágüdahani hibagari guánarügü ítara? 19 Huguya, ǘnabugüda humutina hagibugiñe numutuniña tuagu murusun sewada tuma murusun fein; áfaragua humutiña gürigia ha yebe moun lubéi hóunwegun, aba hígiruniña ha yebe moun lubéi habagaridun abagarida. Ítara liña hariñagun iyeeni houn numutuniña, ani aba hafiñerun hun. 20 Ligía nariñagunbei au, le Aburemei: Gáganiguatina luma sun burí katei le hadügübei, le aubei hárügüdaña gürigia kamá dunuru. Nesefurubaña gürigia húhaburugugiñe, ábame nígiruniña lun háhamahan kei habusenrun; 21 nesefurubaña numutuniña lábugiñegiñe hubafu, luma tuéi belu to híchuguboun hawagu, ani márügüdündigia humaañame. Ábameti hasubudiruni luagu au lan Aburemeibei. 22 Huguya, hanufudeguagüda humaaña ha buídubaña lau hiyeeni, katei le yebe mabusenrun nubéi nadügün, ani rúhadün gurasu houn ha wuribabaña lun hasigirun lidan hariban, lun míchubadina lan ibagari houn. 23 Mibihindigiaadün uénedü iyeeniti kéiñaha, madimurehan huguyame profesía le iyeeniti. Nesefurubaña numutuniña lábugiñegiñe hubafu, ábame hasubudiruni luagu au lan Aburemeibei".