1 Aba ladimurehan Aburemei nun, lariñaga:

2 —Liráü wügüri, gararaguabéi bigibu guentó ariheina luagun Magogu, badimurehame lidan niri kóntüra Gogu, le liñun-agei ábuti Mesekü luma Tubali. 3 Bariñagame lun: «Lariñahare Aburemei: "Gogu, liñun-agei lábuti Mesekü luma Tubali, báganihadina guentó. 4 Nagiribudagüdübadibu, níchuguba günwi luagu biyuma, nasagarubadibu hau sun bisudaran ha hawagubaña gabayu, ha táubaña daüguaü wéndetu, gürigia gíbetiña ha, ha táubaña eféin, luma ámuñegueinarügü luwuyeri idaüdinaü. 5 Hóudiba úara hama gürigia Pérüsiana, Etiopíana hama Líwiana, sun hagía lau idaüdinaü luma bunidi lánina wuribu, 6 luma giñe hama súdara Gómerüna hama Betogárümana, ha dísetimabaña libiti nórute, gürigia gíbetiña ha bumadagu. 7 Aransebá, buguya hama sun súdaragu ha búmabaña; barübaña lábugiñe bugumadin. 8 Danme sügühali saragu dan, bibihubei gumadi lun bebelurun lau erei lidoun aban ageiraü le buga wuriburugubei, gama lumoun gálumaali; gürigia ha meha chagagubaña, haganagua saragu néchanigu, gama lumoun óundaraguayaaña luagu burí luwübüri Ísüraeli. Lídanme dan ligía, giribuhañame lídangiñe saragu ageiraü, añaheinhañame sun hagía abagarida darangilu. 9 Bachülürüba kei aban dúeri lun badouragun lau fulasu ábame bebelurun lau erei kei aban herigini hau sun bisudaranigu hama saragu gürigia" ».

10 «Nariñahare au le Aburemei: Lídanme dan ligía, baritaguba badügün wuribani. 11 Bariñaguba: "Nebelura lau nere lidoun aban ageiraü le úatiña kaba lan ageindagua numa ñein, le ñein hamuti gürigia darangilutiña, hemenigi, lidan burí uburugu le mabarieirúnti, mebenari. 12 Nasagarahabei, íweruha aume; nageindaguba luma burí uburugu le aranserúaali le haburugute gürigia ha óundaragutiña ha lílana saragu néchani, ha galügüniñutiña bágasu luma burí amu umegeni ha aganóutiña lamidangua ubóu. 13 Hálügüdübadibu lílana Sabá, Dedán, hama lílana Tárüsisi ha agañeihabaña aluguraha hagía luma líbiri burí uburugu, hariñagame bun: Biábiña san íweruha? Óundaragua bumutiña bisudaranigu lun basagarahan luma lun banügüni golu, pülata, bágasu luma burí amu umegeni, luma lun banügün aban irisini wéiriti?" »

14 «Kei ítara liña lubéi, badimureha lidan niri lun Gogu, bariñagame lun: Lariñahare Aburemei: "Danme habagaridun Ísüraelina ha numutuniña darangilu, biábinba 15 bageiragiñe hau súdaragu héretiña ani gíbetiña, hama agalufehatiña gabayu, 16 ábame hábürühan hawagun Ísüraelina ha numutuniña. Buguya Gogu, badouraguba lau fulasu kei aban dúeri. Lídounme lagumuhóun burí dan ligía, nadügüba lun biabin kóntüra numúan, lun lau lan lira, ábame hasubudirunina néchanigu danme narufuduni hagibugiñe luagu sandu nan" ».

17 —Nariñahare au le Aburemei: "Buagu meha nadimureha lidan dan le sügühalibei, dan meha le nadimurehanbei hádangiñe nani profetagu ha Ísüraelina; ariñagatiña lidan dan ligía luagu nadügüba lan lun biabin lun bábürühan luagun Ísüraeli".

18 —Nariñahare au le Aburemei: "Danme lebelurun Gogu lageiroun Ísüraeli lau lere, hanarimebei ladunragun nigañi. 19 Lidan lanarime nigañi, fiñutina luagu ñeinbei lan aban hárabaganali Ísüraeli lidan dan ligía. 20 Hadadagaruba úduraü ha baranahabaña, dunuru ha siélubaña, animaalugu áraabuna ha gáñitiña, hama gürigia ha ubouagubaña nigibugiñe. Lábürühaba burí wübü, léiguahaba dübü luma sun baríeiru. 21,22 Nanügüba sun luwuyeri wuribani luagun Gogu lun labuinchun lau anufudei. Nabeichubei lau burí sandi luma óunweni hanarimeti. Nadügüba lun lábürühan huya gárati, lúbara huya dereguati, watu gemeti luma súfuru luagun luma hawagun lisudaranigu luma hawagun saragu gürigia ha úarabaña luma. Hageindaguba luwügüriñanigu hámagua tau eféin. Au le Aburemei ariñagubalin. 23 Ítara luba narufuduni nuéirigun luma sandu nan houn saragu gürigia. Narufudaguba nungua houn, ábame hasubudiruni luagu au lan Aburemeibei".