1 Aba ladimurehan Aburemei nun, lariñaga:

2 «Liráü wügüri, badimureha lidan niri kóntüra hóuniri mudún ha lánigu Ísüraeli, bariñagame houn: Lariñahare Aburemei: "Fugiabugu hóuniri mudún Ísüraelina, ha óunigiragubaña hóunguarügü! Mudún lúnbaña hóunigiruniña óunigirutiña ha. 3 Huguya gurá humuti míligi, adüga huguya hadaüragun lau hara mudún, áfara humutiña mudún ha dibunetimabaña, gama lumoun móunigirun humutiña mudún. 4 Míderagun humutiña mudún ha débilibaña, magaranihan huguya houn ha sándibaña, magüragun humuti hagudi ha áhalachutiña ugudi, máluahan humaña ha acharagadutiña, ni ha eferidirutiña, óuserarügü humutiña lau iderei luma éreguni. 5 Rédeitiña nilügüniña mudún úouga kaba lan óunigiraña aba hacharagadun, darí lun héiginiña animaalugu áraabuna ha gáñitiña. 6 Aba hacharagadun lidoun burí wübü íñuti, aba hayuridagun, úati ni aban ebereseruti hau lun lidin áluahaña" ».

7 —Aganba huméi lubeiti nererun buidu, huguya le hóunirigu mudún. 8 Au le Aburemei, fiñú numuti luagu nibagari: "Íweruha hamaaña animaalugu áraabuna nilügüniña mudún, hou hamaña ladüga móuniri hamá. Mídintiña hóunirigu mudún áluahaña mudún. Óunigiraguatiña hóuniri mudún houngua, gama lumoun móunigirun hamutiña nilügüniña mudún. 9 Ligía lubeiti, hóunirigu mudún, aganba huméi dimurei burí 10 le nariñagubei au le Aburemei hun: Hóunirigu mudún, háganihadina, ani nálügüdagubadün hawagu nilügüniña mudún; nagidarubei wadagimanu le lánina hóunigiruniwa mudún huéi lun masigirun humá óunigiragua hungua; nesefurubaña nilügüniña mudún hawéi, hebé láamuga héiginiña".

11 —Nariñahare au, le Aburemei: "Au guánarügüba óunigiraña nilügüniña mudún. 12 Kei hóuniri mudún le beresebei hau mudún dan le hacharagadun, ítara luba nebereserun hau nilügüniña mudún; nasagarubaña lídangiñe fulasu le ñeinhin lubéi hacharagada lidan aban weyu búrigati laganagua guran. 13 Nasagarubaña lídangiñe ageiraü burí terencha, nóundaragubaña, ábame nanügüniña lidoun meni hageira. Nanügübaña eiga luagu burí luwübüri Ísüraeli, luagun burí lísensen duna, luma lidoun fulasu burí le ñein hamuti gürigia aganóutiña. 14 Nanügübaña eiga lubuidun-agei sagadi le luágubei burí áraabu íñuburiti le lani Ísüraeli. Gayaraabei hemeraagun ñein, hou hagíame sagadi le semeetimabei. 15 Au guánarügüba hóuniri nilügüniña mudún, au guánarügüba anügaña emeraagua. Au, le Aburemei ariñagubalin. 16 Náluahabaña mudún ha eferidirubaña, nanügübaña ha ayuridagubaña, nagüragubei hagudi ha áhalachubaña ugudi, níderagubaña ha débilibaña, nóunigirubaña ha dibunebaña, ha hérebaña. Nóunigirubaña keisi lubudubu".

17 —Nariñahare au le Aburemei: "Aganba humá nilügüniña mudún: Naguseragüda haganagua mudún hama gábara. 18 Memeniti san hun héigini lubuidun-agei sagadi, hadügüragunbalin le erederubei? Gurá humuti duna harumati, le líbiri, aba hagubudaguagüdüni. 19 Gásuti héigini nilügüniña mudún sagadi le dügügua humaalibei, gurá hameime duna le gubuguagüda humaalibei. 20 Ligía nariñagunbei hun au le Aburemei: Naguseragüda haganagua mudún ha dibunebaña hama ha dúreibaña. 21 Dagua humutiña ha débilibaña lun hadisedun, abugaha humaaña, aba hanuraagüdüniña. 22 Gama lumoun nasalbarubaña nilügüniña mudún. Mígirunbadina lun hasigirun íweruhaña. Naguseragüdüba haganagua mudún. 23 Nadügüba lun lagiribudun Dawidi le nubúein, ábame níchuguni lun ligíarügü lan hóuniri, ábame lóunigiruniña. Ligíaba hóuniri. 24 Auba le Aburemei Habungiute, Dawidi le nubúein, ligíaba hábuti. Au le Aburemei adimurehabei. 25 Nadügüba aban daradu hama, lun nachoururun aban ibagari darangilati houn. Nagumuchaguagüdübaña animaalugu gáñitiña fulasurugugiñe, lun gayara lan darangilu hamá nilügüniña mudún lidan áraabu wásati arumuga hagíame dabíararugu".

26 —Níchugubaña nilügüniña mudún geyegu lau nuwübüri le sándubei, ábame nabiniruniña; nóunahaba huya lánina abiniruni houn lidan lidaani. 27 Laginduba burí lídibu wewe le áraabubei, líchuguba múa alubahani. Danme nesefuruniña numutuniña hawéi ha anügübaliña keisi idamuni, ábame hasubudiruni luagu au lan Aburemeibei. 28 Manügündigia hamaañame terencha, méigindigia hamaañame giñe animaalugu gáñitiña. Habagariduba darangilu úouga ni aban alouchagüdütiña. 29 Níchuguba nadü le arandarati houn, masufurirúnhañame ilamaü, madügünhañame giñe híbiri néchanigu bula hau. 30 Ábameti hasubudiruni luagu anahein lan hama, au, le Aburemei le Habungiute, luma luagu numutuniña lan Ísüraeli. Au le Aburemei ariñagubalin. 31 Nilügüniña mudún huguya, mudún ha néigagüdün, gürigia huguya ani Hubungiute au. Au, le Aburemei ariñagubalin.