1 Aba liñurunina lubafu Bungiu, aba lanügünina luagun tubenari litenpulun le luéigiñebei oubaü le ñéingiñe lubéi laboucha weyu. Ñéinñanu wein-seingü wügüriña bénabu. Ariha numuti Hasaníasi le liráü Asuru hadan luma Pelatíasi le liráü Benaíasi, ha ábutigu fulasurugu. 2 Aba lariñagun Aburemei nun:

—Liráü wügüri, añahán ha aransehabaña lun háfarahan, adaagua hagía sun luwuyeri wuribani ya uburugu. 3 Ariñagatiña: "Málügili lúmagiñe waransehanu muna. Séfuñuwaba ya, kei úi lidan sóudieru". 4 Badimureha lubeiti houn lidan niri.

5 Aba liabin lani Aburemei Sífiri nuagun, aba lariñagun nun lun nariñagun:

—Anihán lariñagubei Aburemei: "Ligía le haritagubei, huguya Ísüraelina. Subudi numuti hisaminan. 6 Gíbeeli háfarahan lidan uburugu le, buíngüda humaali üma hau hilaguaaña. 7 Ligía nariñagunbei hun lau achoururuni: Ítara luba Herusalén kei aban sóudieru, gama lumoun mámaba huguya úi, hilaguaaña ha háfaragubaña, hagíaba úi, huguya, nasagarubadün lídangiñe sóudieru. 8 Hanufudetün san luéi wuribu? Nanügüba wuribu huagun. Au le Aburemei ariñagubalin. 9 Nadügübei nisiadin kóntüra huguya, nasagarubadün yáagiñe, ábame nederegerunün houn terencha. 10 Háfarawaguba tau eféin. Naguseragüdübadün lidan lébeha Ísüraeli, ábame hasubudiruni luagu au lan Aburemeibei. 11 Meseriwidunbei uburugu hun sóudierume, mámaba giñe huguya úi. Naguseragüdübadün lidan láfadaragun Ísüraeli, 12 ábameti hasubudiruni luagu au lan Aburemeibei. Mabagariduntün úaragua luma nugumadin, madügün huméi le nubeibei, falá humuti hagaburi gürigia ha geyegubaña hau".

13 Dan le anaha lubéi adimureha houn lidan liri Aburemei, aba lounwen Pelatíasi le liráü Benaíasi. Aba nabuluchagun dagá nerebe múarugu, aba nagúaragun here, nariñaga:

—Nabureme! Bagumucha san hau fiuraü ha erederubaña lídangiñe Ísüraeli?

14 Aba lariñagun Aburemei nun:

15 —Liráü wügüri, hariñahare gürigia ha aganóubaña Herusalén hawagu Ísüraelina ha bupaisanungu: "Hagía dísetiña luéi Aburemei. Ánhawati wagía, ru lumuti ageiraü woun, lun wagíaba lan laburiña".

16 Ariñagabá lubeiti houn:

—Lariñahare Aburemei: Sagá numutiña hageiragiñe aba nachagaraguniña hadan gürigia lidan burí ageiraü terencha, gama lumoun luágurügü murusun dan. Guentó, au guánarügüba aban sanduariu houn lidan ageiraü le ñein hamuti.

17 Ariñagabá giñe houn:

—Lariñahare Aburemei: Nagiribudagüdübaña lídangiñe burí fulasu le ñeinhin lubéi buga nachagaraña, ábame nóundaraguagüdüniña, ábame níchuguni ageiraü le Ísüraeli houn. 18 Hagiribuduba hageiroun, ábame hagumuchaguagüdüni lagübüri igaburi le ñeinbei. 19 Nagidaruboun anigi deretu kei dübü to hawaguboun, ábame níchugun aban iseri anigi luma iseri sífiri houn. 20 Ábameti habagaridun úaragua luma nilurudun, ábame hadügüni le nubeibei. Hagíaba numutuniña, aume Habungiute. 21 Ánhañati ha abagaridubaña lidan lagübüri igaburi le, naguseragüdübaña luagu hóuserun. Au, le Aburemei ariñagubalin.

22 Aba háhamarun kátaña garünatiña hagía, lau sun ubalabaü hama. Leti buga luéirigun Bungiu le buga hóugiñebei, 23 aba liñuragun lungua aba lidin eredera lóugiñe wübü le luéigiñebei oubaü le ñéingiñe lubéi laboucha weyu libiti uburugu. 24 Lárigiñe aba liñurunina lubafu Bungiu aba lagiribudagüdünina Babilónioun, le ñein habéi ha híbiri ha asagarúbaña hageiragiñe. Lidan aban uénedü le larihagüdübei Bungiu nun lasusereda le. Lárigiñe aba lagumuchagun uénedü ligía, 25 aba nabahüdaguni sun le larufudubei Aburemei nun houn ha asagarúbaña hageiragiñe.