1 Aba ladimurehan Bungiu nun, lariñaga:

2 —Liráü wügüri, badimureha lidan niri, bariñagame:

«Wagua humá luagu weyu

3 le yarafaalibei:

Yarafaali luéyuri Aburemei!

Ábanbei weyu hamuñati,

aban weyu hanarimeti houn néchanigu!

4 Liábinba wuribu luagun Ehiptu.

Danme háfaragun saragu gürigia ñein,

íweruha hameime harisin,

günringua hameime Ehiptu sunsuinagubei,

ábame ladadagarun Etiopía.

5 Hábürühaba giñe lisudaranigu Etiopía wuriburugu,

lisudaranigu Liwia, Lidia, Arawia,

Kubu hama lisudaranigu amu burí fulasu,

hama lisudaranigu líbiri burí

ageiraü le íderagubalin wuriburugu».

6 «Lariñahare Aburemei:

Ha íderagubalin Ehiptu, hóunweguba wuriburugu,

lúmagiñe Migüdólu darí Asuán.

Lábürühaba lupantan lubafu Ehiptu.

Au, le Aburemei ariñagubalin».

7 —Ligíaba ageiraü le málatimabei lídangiñe súngubei, liábinme burí luburugute, létima günrinwaguabei. 8 Danme náguduni Ehiptu, günringuanáñame sun ha íderagubalin, ligíaba hasubudiruni luagu au lan Aburemeibei.

9 —Danme lachülürün luéyuri labeichún Ehiptu, nóunahaba nóunagülegu baranahagiñe alouchagüdaña gürigia ha meberesegúnbaña lau ni kata Etiopía, ábame habuinchun lau anufudei. Yarafaali weyu ligía.

10 —Nariñahare au le Aburemei: "Nayusurubei Nabukodonosoru le lurúeite Babilónia lun lagünrinchaguni lirisin Ehiptu. 11 Lídiba hau lisudaranigu ha fásitimabaña, agünrinchaguei fulasu. Hábürühaba luagun Ehiptu tau eféin, ábame hígiruni buin hau hilaguaaña. 12 Nadügüba lun lamabeidun duna le Nilu, níchugubei Ehiptu háhaburugun gürigia salufuritiña; hau terencha hagía nígirubei Ehiptu lidan günringuaü lau sun le lídanbei. Au le Aburemei ariñagubalin".

13 «Nariñahare au le Aburemei:

Nagünrinchagubaña guáriuagu,

gumú aume hau búngiugu iyeenitiña ha Ménfisibaña.

Úadigiaalime kaba lan agumadiha Ehiptu,

nabuinchagüdübei fulasu lau anufudei.

14 Nagünrinchagubei suru libiti Ehiptu,

nágudubei Soán,

adüganeime le aubei nasiadirei Tébasi».

15 —Nóunahabei nigañi luagun Sin, le lérebei Ehiptu, günringuaneime lirisin Tébasi. 16 Nágudubei Ehiptu, laguribihaba Sin lau gáriti; lánhunrenchuba burí huyu luagu lubarieirun Tébasi, ábürühoua ligíame luagun Ménfisi wéyuagu. 17 Hóunweguba nibureintiña ha lílana On luma Bubasütisi wuriburugu, hame híbiri lílana, hanaawaguba adaürawagúa. 18 Danme nagünrinchaguni lubafu Ehiptu, gumuguagüdaneime erei le aubei lapantaha, laburigaduba weyu uburugu Táfünesi, ladouraguba aban dúeri lau Ehiptu, hanaawaguba lílana burí fulasu adaürawagúa. 19 Nadügübei le aubei nasiadirei Ehiptu, ábame hasubudiruni luagu au lan Aburemeibei.

20 Weyu sedü lidan furumiñeti hati, lidan irumu unsu, aba ladimurehan Bungiu nun, lariñaga nun:

21 —Liráü wügüri, halaguana larüna urúei Ehiptuna, ani úati agaranihati lun, lun libihiniya lere lárigoun lun gayara lan lárügüdünu lefeinte. 22 Ligía nariñagunbei au le Aburemei: "Láganihadina urúei Ehiptuna. Náhalachubei biángubei larüna, le buídugilibei luma le halaguaalibei, nadügüba lun téiguadun lefeinte lúhaburugugiñe. 23 Nachagaraguaaña Ehiptuna hadoun híbiri néchanigu, lidoun burí ámuñegueinarügü ageiraü. 24 Níchuguba erei lun larüna lurúeite Babilónia, runounme nefeinte lúhaburugun. Náhalachubei biángubei larüna urúei Ehiptuna, ábame layahun danme lasandiragun lungua méreuga ligibugiñe lágani. 25 Níchuguba erei lun larüna lurúeite Babilónia, ábame nagidaruni lere larüna urúei Ehiptuna. Danme níchugunu nefeinte lúhaburugun lurúeite Babilónia, danme liñurunu luagun Ehiptu, ábame hasubudiruni luagu au lan Aburemeibei. 26 Nachagaragubaña Ehiptuna hadoun híbiri gürigia, ábameti hasubudiruni luagu au lan Aburemeibei".