1 Weyu furumiñe lidan liduusun hati, lidan irumu duusu, aba ladimurehan Aburemei nun, lariñaga:

2 —Liráü wügüri, eremuhabei uremu lánina ábunahani le lun urúei Ehiptuna:

Ítara biña kei aban halügün gürigia liñún;

ítara biña kei aban mónsturu:

abounhatibu bidunarirugu,

dagumegüda bumuti duna lau bugudi,

adaagua buguya ébeini.

3 Lariñahare Aburemei:

—Íbini haganaguañadibu lan saragu gürigia, náguruboun nisenin bau, ábame nañugunibu tau. 4 Nadurugudubadibu múarugun, ábame nígirunibu riwagu ñein. Nadügüba lun hararamun sun dunuru ha siélubaña buagu, luma lun hakimuledun sun animaalu áraabuna lau bǘgürügü. 5 Nabuinchagüdübei burí wübü luma fulasu wayati lau bǘgürügü le ñalaali. 6 Nadüdüragüdübei múa lau bita, lachülürüba chülǘ áraabu, labuinchuba burí lirahüñü duna lau. 7 Danme nagünrinchagunibu, nadügüba lun laburigadun sielu, luma lun héñeguchun waruguma; nadaüragubei weyu lau dúeri, marunidunhaalime hati. 8 Néñeguchubei sun lanpu le adurangubei sielu, ani naburigadagüdübei bageira. Au, le Aburemei ariñagubalin.

9 —Danme lachülürün uganu luáguti bagünrinchawagun lidoun burí fulasu le buga ibidiñeti bun, nadügüba lun hahirudagun saragu gürigia. 10 Nádaruba anufudei hadoun saragu gürigia, ani habuinchuba harúeitegu lau anufudei danme nasagarunu nefeinte hagibugiñe. Danme bábürühan, hadadagaruba lau anufudei luagu habagari guánarügü.

11 —Lariñahare Bungiu: "Tábürühaba lefeinte lurúeite Babilónia buagun. 12 Nadügüba lun hábürühan bumutuniña ha gíbebaña tau hefeinte wuriburuguna ha fásitimabaña. Hagumuchaguagüdübei luéirigun Ehiptu, gumú hagíame hau lumutuniña ha gíbebaña. 13 Nagünrinchagubaña sun bibiñanigu ha átubaña lídangiñe bidunari, madagumedagüdündigia hamaalime ni gürigia ni animaalugu lau hagudi. 14 Ábameti narumadagüdüni duna, éibaagua ligíame duna éibaaguati darangilu kei garaba. Au le Aburemei ariñagubalin. 15 Danme nadügüni Ehiptu fulasume mageirawati, ábame hasubudiruni luagu au lan Aburemeibei".

16 —Aban uremu híruti le, ani lunti ítara lan heremuhani würiña ha lílana ámuñegueinarügü néchani danme hayahuahani Ehiptu hama lumutuniña ha gíbebaña. Au, le Aburemei ariñagubalin.

17 Weyu keinsi lidan liduusun hati, lidan irumu duusu, aba ladimurehan Aburemei nun; lariñaga: 18 —Liráü wügüri, beremuha úara hama saragu würiña ha lílana ámuñegueinarügü néchani aban uremu lánina ábunahani hawagu lílana Ehiptu ha gíbebaña luma hawagu lábutigu:

«Ábürühatiña ha gabafubaña lidoun

umúahaü hamoun ha ñǘdünhañabaña habá.

19 Magadiñetibu funagia hawéi ha híbiri?

Rariba, rounba giñe hama gibe tubungiutegu».

20 —Hábürühaba hama ha óunwegutiña wuriburugu. Aranseru eféin. Hóudiba hánigu ha gíbebaña hama. 21 Heresibirubaña ábutigu ha gabafutimabaña hau sun hamadagu Ehiptuna lidan larúeihan óunweni, ariñageina: "Ñǘbuinhaña! Rédeihaña gibe tubungiutegu ha óunwegubaña wuriburugu riwagu!"

22 —Anihán Asiria, hau sun lisudaranigu geyegua lau umúahaü. Sun hagía, wuriburugu hóunwegua. 23 Bunawañu haña lidan lilulin-agei huyu. Dátiña meha hasudaranigu anufudei hadoun ha wínwangiñabaña, gama lumoun hilaguatiña wuriburugu, ani guentó geyeguhaña lau lumuaha Asiria.

24 —Anihein Elamü ñein hau sun lisudaranigu geyegu lau lumuaha. Sun gibe tubungiutegu hagía hilaguatiña wuriburugu, ábürühatiña labun múa. Dan meha wínwangiña hanufudeguagüda hamutiñaha gürigia, gama lumoun guentó, añahein lidan umúahaü buin lau busiganu. 25 Riwagu liña Elamü haganagua sun lisudaranigu ha hilaguaañabaña, sun gibe tubungiutegu hagía wuriburugu hóunwegua. Dan meha wínwangiña hanufudeguagüda hamutiñaha gürigia, gama lumoun guentó, añahein lidan umúahaü buin lau busiganu. Rédeihaña hadan gürigia áfarawagutiña hilagubei.

26 —Anihein Mesekü luma Tubali ñein, hau sun hasudaranigu geyegu lau hamúaha, sun gibe tubungiutegu hagía wuriburugu hóunwegua, ha buga anufudedaguagüdübaliña ha wínwangiñabaña. 27 Mábunahountiña kei binadu wügüriña ganigitiña, ha abunúbaña tau hárumate, tau hefeinte lábugiñe hachügü luma hadaüdina ligibuagu hágubu. Gabafutiña buga wügüriña hagía lun hanufudedaguagüdüniña wínwangiña ha ubouagubaña.

28 —Ñéinbadibu, buguya Ehiptu, haganagua gibe tubungiutegu, ha ábunahoubaña hama óunwegutiña wuriburugu.

29 —Anihein Edomu ñein hama lurúeitegu luma hama lani agumadihatiña. Lau sun meha lueirin lubafu, hádanñein óunwegutiña wuriburugu, bunawañu haganagua gibe tubungiutegu, haganagua ha ararirubaña lidoun umúahaü.

30 —Añahein sun lábutigu nórute lidan larúeihan óunweni, kéigubeirügü lábutigu Sidón. Gabafutiña bugaha saragu, hanufudeguagüda hamaña ha wínwangiñabaña. Gama lumoun guentó, rarihaña hama ha óunwegubaña wuriburugu, buin lau busiganu. Gíbetiña habungiutegu ani bunawañuhaña mibihinga uéiriguni haganagua ha óunwegubaña wuriburugu, haganagua ha ararirubaña lidoun umúahaü.

31 —Danme larihiniña urúei Ehiptuna, lárügüdüba gurasu luagu hóunwegun sun lumutuniña, ladüga, ligía hau sun lisudaranigu, wuriburugu hóunwegua. Au, le Aburemei ariñagubalin.

32 —Ádahati buga urúei Ehiptuna anufudei haganagua ha wínwangiñabaña; ligía labunúnbei hadoun gibe tubungiutegu, haganagua ha óunwegubaña wuriburugu, ítara kei lisudaranigu ha gíbebaña. Au, le Aburemei ariñagubalin.