1 Lárigiñe aba lanügünina wügüri ligía turageirugun ténpulu, aba lamisurahani wagabu: Ǘrüwa méturu ligaranan kada aban. 2 Séingüñein méturu lidabuberen bena; bián méturu dimí lidabuberen kada aban lágüdaha. Lárigiñe aba lamisurahani lasali le amidanibei, wein méturu limigifen diisi lidabuberen. 3 Lárigiñe aba lidin lidoun lasali le múnadagiñebei, aba lamisurahani luagaburi ebelaagülei, aban méturu ligaranan kada aban. Ǘrüwañein méturu lidabuberen ebelaagülei, ǘrüwa méturu dimí ligaranan wagabu le luágubei kada oubaü. 4 Lárigiñe aba lamisurahani lasali le múnadagiñebei, diisi méturu luéigiñe kada louba. Ábati lariñagun nun:

—Anihán fulasu le sándutimabei.

5 Lárigiñe aba lamisurahani touba ténpulu le bóugudigiñebei, ǘrüwa méturu liduru. Geyegua tau ténpulu, badüleñu tuagu, ñeinñoun burí rumu to bianti méturu tilulin. 6 Rumu burí to, ábanñoun tigibuagu aban, adügeina ítara ǘrüwa fuló, lidan kada fuló, ñeinñoun darandi rumu. Bürüraüguati tubarieirun ténpulu lidan kada fuló, luagu buriti lacharúa líndanute rumu, mama luagu baríeiru. 7 Bóugudigiñe tibiti rumu burí to geyeguboun tau ténpulu, ñeinñoun aban ebu chülǘ iñu tibiti, gayaraatiti lamudeirúniwa lúmagiñe lídangiñe furumiñeti rumu lidoun le amidanibei luma lidoun le íñubei. 8 Aba narihin luagu luáguñoun lan aban ebu íñuti ténpulu luéigiñe sun touba, luagu burí ebu ligía tábunawagua rumu, ǘrüwañein méturu liñun ebu ligía, 9,10 bián méturu dimí liduru touba rumu le bóugudigiñebei, geyegua tau ténpulu, tabadinagua burí rumu to geyeguboun tau ténpulu luma burí harumun fádirigu, ñeinñein aban ubaraü málati, diisi méturu lidabuberen. 11 Arihúati burí tídangiñe rumu lidoun fulasu málati lídangiñe aban bena luagun nórute luma aban luagun suru. Luagu sun limigifen fulasu málati ligía ñeinñein aban baríeiru bián méturu dimí liduru.

12 Luéigiñe oubaü le ñeinhin lubéi lálüda weyu, gagibugu luma bürürü le darugubei, ñeinñoun aban muna darandi seingü méturu tidabuberen, bián-wein-seingü timigifen, lau aban baríeiru bián méturu dimí liduru.

13 Aba lamisurahanu wügüri ligía ténpulu, dimí-san méturu timigifen. Lítulen bürürü le darugubei, tuma muna lau burí tubarieirun, dimí-sanñein giñe méturu luagu. 14 Tigibugiñe ténpulu, lumoun líbiri bürürü le darugubei le luéigiñebei labouchagüle weyu, dimí-sanñein méturu luagu. 15 Lárigiñe, aba lamisurahani timigifen muna to tanagangiñeboun ténpulu, ligibugiñe bürürü le darugubei, luma burí baríeiru le luéigiñebei kada oubaü, dimí-san méturu limigifen.

Lasali burí luma tebelaagüle ténpulu 16,17 afurarúati lau fulansu. Ñeinñein ayarawaguni luagu burí funedera, liabin burí máruku le geyegubei lau, afurarúati lau fulansu luéigiñe ǘrüwagubei oubaü. Ubaraü le labadinaguabei turageirugu muna luma burí funedera, luma le íñugiñebei libiti bena, afurarúati giñe. Touba ténpulu, dandu múnadagiñe kei bóugudigiñe, 18 ñéinñanu burí hayawa kátaña garünatiña luma burí liyawa tídibu yaraüwa luagu. Biámañein ligibu kada aban hádangiñe kátaña garünatiña hagía; 19 luéigiñe aban oubaü, aban ligibu wügüri larihin tuagun aban tiyawa tídibu yaraüwa, luéigiñe le aban oubaü, aban ligibu liñún larihin tuagun ábanya tiyawa tídibu yaraüwa. Ítara liña, geyegu tau sun ténpulu. 20 Ñeinñoun hayawa kátaña garünatiña luma tiyawa tídibu yaraüwa, lúmagiñe múarugugiñe, darí íñugiñe libiti burí bena. Luagu louba lasali le amidaniguabei, 21 ñeinñein bián wagabu aban labu gádürügubei louba luagu lani bena máruku.

Ligibugiñe lebelaagüle Fulasu le Sándutimabei, ñeinñein aban katei lenege 22 aban latarü lauti fulansu, aban méturu luéigiñe kada louba luma aban méturu dimí liñun. Garigeiruguti, lauti fulansu lebu. Aba lariñagun wügüri ligía nun:

—Anihán dábula le ligibugiñebei Aburemei.

23,24 Dandu lasali le amidanibei, kei Fulasu le Sándutimabei, biánguati lubenari. Kada bena biánguañein lidan, ladaara luagun touba muna. 25 Ñeinñoun hayawa kátaña garünatiña luma burí liyawa tídibu yaraüwa luagu tubenari rumu to amidaniboun libe burí le luágubei baríeiru. Ñeinñein aban baríeiru lauti fulansu bóugudigiñe libiti ebelaagülei. 26 Luéigiñe kada louba ebelaagülei, ñeinñein burí ayarawaguni luagu funedera luma burí liyawa tídibu yaraüwa, rumu burí to badüleñuboun tuagu ténpulu, anihein giñe burí baríeiru tuagu.