1 Ñǘbuintiña saragu ábutigu Ísüraelina numoun lun hálügüdahan luma Aburemei. 2 Ábati lariñagun Aburemei nun:

3 —Liráü wügüri, gürigia ha, deregeguaaña houngua sunsuinagubei lun láhudurawagun houn guáriuagu, ani ru hamaali harihin luagun burí katei le afigougüdübaliña. Saminatiña funagia nóunabubaña lan? 4 Bariñagame houn: "Anihán lariñagubei Aburemei: Sun Ísüraelina ha abusenrutiña tidan hanigi lun háhuduragun houn guáriuagu, hafigoungüdüñanu lau lira, ánhañameti ñübuin álügüdaha luma profeta, heresibirubei nóunabagüle. Ani óunabagüleiba le hadünabei haguariuan". 5 Naguuruboun hanigi sun Ísüraelina ha adisedubaña nuéi hadüga haguariuangu.

6 —Ariñagabá lubeiti houn Ísüraelina: "Lariñahare Aburemei: Giribu humá nun, dise humá hawéi guáriuagu, ígira humeime sun lagübüri katei le".

7 —Anhein adiseda aban Ísüraelina o aban lan terencha le aganóuti Ísüraeli nuéi, lederegeragua lungua sunsuinagubei lun láhuduragun houn guáriuagu, líchigei lagu luagun burí katei le afigougüdüti, lárigiñe aba lidin lumoun profeta lun lálügüdahan numa, au guánarüba óunabei: 8 Nagagibudaguba luma gürigia ligía, ábame níchugun aban abeichúni luagu lun harihin híbiri gürigia, aban abeichúni le lunti hadimurehan sun gürigia luagu, ábame nagumuchaguagüdüni gürigia ligía hádangiñe lumutuniña. Ábameti hasubudiruni luagu au lan Aburemeibei.

9 —Anhein íchiga aban profeta aban uganu le mama inarüniti, ladügarügüme yéedagua naali lan profeta ligia; ábameti nabeichuni, ábame nagumuchaguagüdüni hádangiñe numutuniña ha Ísüraelina. 10 Dandu gürigia le álügüdahabei, keisi profeta, habeichúba luagu hafigoun, 11 lun mígirundigia hamanina lílana Ísüraeli, madaseiragun hagíame houngua lau burí áfarahani le. Hagíaba numutuniña, aume Habungiute. Au le Aburemei ariñagubalin.

12 Lariñaga Aburemei nun:

13 —Liráü wügüri, ánhaña afigouha lílana aban fulasu nigibugiñe, magunfulirun hagía numa, nabeichubaña, gidanéime heigin hawéi; nóunahaba ilamaü hawagun, lun hóunwegun gürigia hama animaalugu. 14 Anhein lidan lubéi ageiraü ligía laganawa Noé, Danieli luma Hobu, hagíarügübaña esefura ladüga richagua hamá. Au, le Aburemei ariñagubalin.

15 —Ánhana óunaha animaalugu gáñitiña lidoun aban ageiraü lun háfaraguniña animaalugu hagía lílana fulasu, ábame hadügüni lun aban lan fulasu mageirawati, le ñéingiñe lumuti másügürün hamá ni aban ladüga hanufude, 16 ánhaña hamuga aganawa ǘrüwa wügüriña hagía ñein, siñabei hamuga hesefuruniña hasaanigu; hagíarügüñanu hamuga esefura, aba hamuga lerederun ageiraü fulasume mageirawati. Fiñú numuti luagu nibagari, au, le Aburemei.

17 —Ánhana ñǘbuingüda wuribu luagun ageiraü le, aba hamuga nariñagun lun hóunwegun gürigia hama animaalugu, 18 ánhaña hamuga aganawa ǘrüwa wügüriña hagía ñein, mesefurun hamutiña hamuga hasaanigu; hagíarügüñanu hamuga esefura. Au, le Aburemei ariñagubalin.

19 —Ánhana óunaha sandi luagun ageiraü ligía, lidan nigañi aba nadügün lun hóunwegun gürigia hama animaalugu, 20 anhein hamuga anihein lubéi Noé, Danieli luma Hobu aganawa ñein, mesefurun hamutiña hamuga hasaanigu, hagíarügüñanu hamuga esefura ladüga richagua hamá ligibugiñe Aburemei. Fiñú numuti luagu nibagari au le Aburemei.

21 —Nariñahare au, le Aburemei: Wuribatimabei danme le nóunahani gádürü lanarime abeichúni luagun Herusalén: Wuribu, ilamaü, animaalu gáñitiña luma sandi, lun láfaragun gürigia hama animaalugu. 22 Fiúrügübaña erederutiña wínwanñu, gayaraabei háfuridun ñéingiñe hau hasaanigu. Danme hayabin humoun, hasubudirubei ida liña lan buga hagaburi, luma burí katei le hadügübei, ábame hárügüdagun houngua luagu abeichúni le níchugubei luagu Herusalén. 23 Hárügüdaguba hungua lau harihini ida liña lan hagaburi, luma burí katei le hadügübei. Ábameti hasubudiruni luagu gébuna lan buga sun le nadügübei lun Herusalén. Au, le Aburemei ariñagubalin.