1 «Liráü wügüri, badimureha lun luwübüri Ísüraeli lidan niri, bariñagame lun, lun laganbuni nererun. 2 Nariñahare au le Aburemei: "Haritaguatiña láganiñu Ísüraeli luagu laburiñahaña lan burí wübü magumuchaditi". 3 Badimureha lubeiti houn lidan niri, bariñagame houn: "Lariñahare Aburemei: Ábürühatiña huagun lídangiñe sun oubaü, günringua hamutün; ragǘ hamaadün sun terencha, ani ouserúatün lau bula barüwa huguya kei ni kata. 4 Aganba humá lubeiti luwübüri burí Ísüraeli, aganba huméi luganute Aburemei lun burí wübü, duna éibaaguati luma burí fulasu wayati; lun burí luburugute Ísüraeli le málaalibei, le asagaraha hamaalibei habesinanigu, adüga hagía burí bula hau". 5 Lariñahare Aburemei: "Durungu liña burí nererun lau igañi, lun líbiri burí fulasu, lúntima Edomu, ladüga lau óunwenbu ugundani hanügei numúan, asagaraha haméi lau óunwenbu meberesenhabuni" ».

6 «Badimureha lidan niri libügürü lumúan Ísüraeli, bariñagame: Lariñahare Aburemei lun burí wübü, duna éibaaguati luma lun burí fulasu wayati: "Anihein burí dimurei lauti igañi numa luagu burí anabúni le súfuri humaalibei hámagiñe néchanigu terencha. 7 Fiñutina lubeiti au, le Aburemei luagu hanügüba lan hubesinanigu busiganu. 8 Ánheinti bidan, buguya luwübüri Ísüraeli, ñeinbei burí lídibu wewe wéinamuti le ginti saragu lun heigin Ísüraelina ha numutuniña, ha madiseelibei hagiribudun. 9 Nóunigirubei, adüga aume lun lábunawaguniwa. 10 Nadügüba lun hagibedagun lánigu Ísüraeli ha aganóubaña ñein. Labuinchuba burí uburugu hau gürigia aganóutiña ñein, ráramagüdawa ligíame le günrinwaguaalibei. 11 Nadügüba lun hagibedagun gürigia hama animaalugu. Gíbebaña lílana fulasu kei meha furumiñe ani buídubei dan hun sügǘ lau meha furumiñe. Ábameti hasubudiruni luagu au lan Aburemeibei. 12 Nadügüba lun héibugun numutuniña higibuagu, huguya luwübüri burí Ísüraeli, luma lun hanügünün keisi hamegen, ani mígirundigia humaañame marahüñüga" ».

13 «Nariñahare au, le Aburemei: «Ariñawagúati huagu, huguya wübü, luagu hou humaniña gürigia, luagu ígira humaniña lílana fulasu marahüñüga. 14 Méigindigia humaaña gürigia, mígirun humañame lílana fulasu marahüñüga. Au, le Aburemei ariñagubalin. 15 Mígirunbadina lunya haganbuni hanabahan néchanigu ha terencha; manabagun hamaadünme gürigia hagía, lugundun mígirundigia humaaña Ísüraelina marahüñüga. Au le Aburemei ariñagubalin».

16 Aba ladimurehan Aburemei nun, lariñaga:

17 —Liráü wügüri, dan buga le haganóunbei Ísüraelina hamúanrugu, wíyeda hamuti lau luriban hóuserun. Wíyeti meha ligaburi habagaridun nun. 18 Aba nóunahani nigañi hawagun luagu burí áfarahani le buga hadügübei fulasurugu, luma luagu ligaburi hawiyeduni fulasu lau háhuduragun houn guáriua, 19 lunti nabeichuniña luagu luriban hóuserun, aba nachagaraguniña haganaguóun híbiri néchanigu. 20 Gama lumoun lidan sun fulasu le ñein lumuti hachülüra, anabagua hamuti niri le sándubei, ladüga aba burí hariñagun gürigia: "Lumutuniña Aburemei ha, gama lumoun furihaña hageiragiñe". 21 Ábati lagaridun nun narihin luagu wíyedawa lan niri le sándubei lidan kada fulasu le ñein lumuti houdin Ísüraelina.

22 «Ligía ariñagabá lubéi houn Ísüraelina: «Lariñahare Aburemei: "Le lunbei nadügüni, mama huagu huguya Ísüraelina, luagu niri le sándubei, le anabagua humaalibei haganagua néchani burí le ñein lubéi hidin. 23 Narufudaali hagibugiñe néchanigu luagu haruma lan óunwenbu niri le hanabagubei haganagua néchanigu hagía, ábame hasubudiruni luagu Aburemei lan au. Au le Aburemei ariñagubalin. 24 Nasagarubadün haganaguagiñe sun néchanigu ha; nóundaragubadün, ábame nagiribudagüdünün hageiroun. 25 Nachibubadün lau duna, narumadagüdübadün lídangiñe sun hiwiye luma lídangiñe heseriwidun houn guáriuagu; 26 níchuguba aban anigi iseri hidoun luma aban sífiri iseri. Nagidaruboun anigi deretu kei dübü to huáguboun huéi, ábame níchugun aban anigi ñulutu hidoun. 27 Níchugubei nani sífiri hidoun, nadügüba lun hagunfuliruni nilurudun luma nererun; 28 haganóuba lidan ageiraü le níchugubei houn hagübürigu, huguyaba numutuniña, aume Hubungiute. 29 Nesefurubadün luéi sun le adaseirutün. Nadügüba lun ñein tan gíbetu türigu, móunahandigiaadiname ilamaü huagun. 30 Nadügüba giñe lúntima tagindun tídibu burí wewe, lun manügündigia humá busiganu hagibugiñe híbiri néchanigu ladüga ilamaü. 31 Danme haritagun luagu luriban hóuserun, hanügüba busiganu haugua guánarügü luagu hifigoun luma burí wuribati le hadügübei. 32 Au, le Aburemei ariñagubalin. Subudi huméi huguya Ísüraelina luagu mama lan ladüga gadüna humani nadügünbalin le; sandí huma busiganu luagu luriban hóuserun" ».

33 —Nariñahare au le Aburemei: "Danme narumadagüdünün lídangiñe sun hifigoun, nadügüba lun haganóun lidan burí huburugute, luma lun hararamagüdüniya le günringuaalibei. 34 Múa meha le erederubei málouga, lábunawagubaya ñein ligibugiñe harihin sun ha ásügürütiña".

35 —Ábame lariñawagún: "Múa le meha erederubei málouga, guentó, lenegehali fuluri-agei le Edén; uburugu burí le meha rédeihalibei málouga, lidan günringuaü, guentó héreeli, ani añaheinhaña gürigia aganawa ñein. 36 Ábame hasubudiruni fulasu besinaguti le erederuti wínwanñu, luagu au lan le Aburemei araramagüdübalin le günrinwaguaalibei, bunaguayanei le hulawaguaalibei. Au le Aburemei ariñagubalin ani nadügübei".

37 —Nariñahare au le Aburemei: "Nadügayaba amu katei. Nadügübei le hamuriahan lánigu Ísüraeli numa lun nadügüni houn; nagibedaguagüdübaña kei mudún. 38 Uburugu burí le günrinwaguaalibei, labuinchuba hau saragu gürigia, darime lun henege hamá mudún ha anügǘbaña lun hadagarawagüdün lidan burí fedu Herusalén. Ábameti hasubudiruni luagu au lan Aburemeibei".