1 Lárigiñe aba lasagarunina wügüri ligía lidoun bürürü le bóugudigiñebei, luagun nórute, aba lebelaagüdünina tidoun burí rumu to ñeinboun, ligibugiñe bürürü le darugubei tuma muna to tanagangiñeboun ténpulu. 2 Dimiñein-san méturu timigifen, wein-seingü méturu títulen. 3 Aban oubaü, luágunñein bürürü le múnadagiñebei, diisi méturu lítulen, luéigiñe le aban oubaü, luágunñein dübü-agei le lani bürürü le bóugudigiñebei. Ǘrüwañein tani fuló. 4 Ñeinñein aban üma tigibugiñe rumu, seingü méturu lítulen, dimí-san limigifen, le anügǘbei múnadoun. Luágunñein nórute tubenari gádürügubei. 5 Rumu burí to lídanboun fuló le íñugiñebei ñǘbüriti sügǘ tau to lídanboun fuló le amidanibei tuma to ǘnabuboun, kada fuló muruguatimati luéi le ǘnabubei. 6 Rumu burí tuguya ǘrüwaguañein tani fuló, gama lumoun mawagaburitu kei burí rumu to lídanboun bürürü, muruguatimatu rumu to luáguboun fuló le íñubei sügǘ tau to burí luáguboun le amidanibei tuma burí to luáguboun le ǘnabugiñebei.

7,8 Rumu burí to lídanboun bürürü le bóugudigiñebei weinñein-seingü méturu timigifen. Ñeinñein aban baríeiru tigibugiñe rumu burí tuguya wein-seingü méturu limigifen, chülüti luagun bürürü le bóugudigiñebei. Lidan súngubei, dimí-sanñein méturu luagu üma. 9 Lídangiñe bürürü le bóugudigiñebei lebelurúa lidoun fuló le ǘnabubei tibiti burí rumu to luágunboun oubaü le ñéingiñebei laboucha weyu, 10 luéigiñe fulasu le ñein lubéi lébeda lubarieirun bürürü le bóugudigiñebei.

Ñeinñoun giñe burí rumu, luéigiñe suru, ligibugiñe bürürü le darugubei luma tigibugiñe muna to luéigiñeboun lálüdagüle weyu tibiti ténpulu 11 aban labu tuma to tíbiri, lau ebelaagülei luma áfuridagülei kei burí rumu to luéigiñeboun nórute, lau aban üma tigibugiñe. 12 Lun lachülürǘn tuagun burí rumu to luéigiñeboun suru, ñeinñein aban bena le ñein lubéi lagumesera üma le ligibugiñebei baríeiru le ágüdahabei, luéigiñe oubaü le ñéingiñe lubéi laboucha weyu.

13 Aba lariñagun wügüri ligía nun:

—Dandu rumu burí to luéigiñeboun nórute kei to luéigiñeboun suru, to ligibugiñeboun bürürü le darugubei, rumu sagüráutu. Ñein heigei fádirigu ha ayarafadubaña lun Aburemei idewesei burí le sagüráutimabei. Ñein giñe híchigei idewesei sagüráuti kei idewesei le fulúaruauti, idewesei luagu figóu luma idewesei luagu duru, ladüga sagüráuti fulasu ligía. 14 Beluhaña ligía fádirigu ténpulurugun, siñaali háfuridun lidoun bürürü le bóugudibei, mígirunga hamóun hadaüragun to buga auboun heseriwida, ladüga sagüráutu daüguaü tuguya. Lun háfuridun le ñeinhin habéi gürigia, gasu hadaürün amu daüguaü.

15 Dan lásurunbei lamisurahanu wügüri ligía ténpulu múnadagiñe, aba lanügünina bóugudin luéigiñe bena le luágunbei oubaü le ñeinhin lubéi laboucha weyu, aba lamisurahanu bóugudigiñe. 16 Aba lanügüni amisuraagülei, aba lamisurahani oubaü le ñéingiñe lubéi laboucha weyu: Bián-san-dimí méturu. 17 Lárigiñe aba lamisurahani oubaü nórute, bián-giñe-san-dimí méturu; 18 oubaü suru; bián-san-dimí méturu; 19 agumuhóuni, oubaü le ñeinhin lubéi lálüda weyu, ábanya bián san dimí méturu limigifen. 20 Amisuraha lumuti gádürügubei oubaü. Fulasu le ñein tubéi ténpulu ñeinñein aban baríeiru geyegua lau bián-san-méturu-dimí luéigiñe kada louba, ligía afanreinragubalin le sagüráubei luéi le wíyebei.