1 «Liráü wügüri, badimureha lidan niri kóntüra Gogu, ábuti le íñugutimabei Mesekü luma Tubali, bariñagame lun: Lariñahare Aburemei: "Báganihadina guentó. 2 Nagiribudagüdübadibu; hámaru hámaruba nasagarabu lídangiñe lidise-agei nórute ábame nanügünibu luagun burí luwübüri Ísüraeli. 3 Lárigiñeme ábame náhalachagunu gimara to lídanboun bubaünan, ábürügüdanounme to burí lídanboun bóunwenren. 4 Ábame bábürühan hilagubei luagu burí luwübüri Ísüraeli hau sun bisudaranigu hama gürigia ha úarabaña buma. Nederegerubadün ñein houn sun hawuyeri dunuru géigaditiña úi luma houn animaalugu áraabuna lun héiginün. 5 Herederuba riwagu lidan áraabu wásati. Au le Aburemei adimurehabei, ru naali nererun. 6 Nóunahaba watu gemeti luagun Magogu luma hawagun ha aganóubaña darangilu luagu burí ubouhu. Ábameti hasubudiruni luagu au lan Aburemeibei. 7 Nadügüba lun lasubudiruni Ísüraeli niri le sándubei, mígirunhadiname lun lasigirúniwa awiyeda. Ábameti hasubudiruni néchanigu terenchatiña luagu au lan Aburemeibei, arufuda numuti luagu sandu nan Ísüraeli. 8 Lachülürüba weyu le uágubei nadimureha. Au, le Aburemei ariñagubalin" ».

9 —Háfuriduba lílana luburugute burí Ísüraeli, ábame hágudunu burí hárumate, ámuñegueinarügü luwuyeri hadaüdina lauti gürabu, hagimaran, hani habalina, tuma hefeinte, gélemebaña saragu lun háfuragun watu luagu sedü irumu. 10 Memegeirúnbaña houdin áraabu anüga watu, ni lun háhinun dabíararugu, ladüga sun burí áruma to, teseriwiduba houn hélememe. Hasagarahabaña ha buga asagarahabaliña, hagidarubei hamegen ha meha agidarubalin hamegen hawéi. Au le Aburemei ariñagubalin.

11 —Lídanme dan ligía, níchuguba aban ubaraü lun Gogu Ísüraeli, lidan fulasu wayati le gíribei Gaweiyasuntiña, ligibugiñe barana lun hábununi ñein. Másügürünwaalime lídangiñe fulasu ligía, ñeinba labunúa Gogu hau sun lisudaranigu, ábame hagúaruni liri fulasu ligía: Fulasu wayati le lisudaranigu Gogu. 12 Sédübei hati hanügün Ísüraelina ábunaña lun harumadagüdüni fulasu. 13 Beresegubaña sun gürigia ábunahaña, ani ábanbei inebesei lira houn. Lídanme weyu ligía, narufudaguba nungua lau nuéirigun. Au, le Aburemei ariñagubalin. 14 Lárigiñeme sedü hati ligía, hounahóuba gürigia éibugei fulasu, lun hábununiña ha erederubaña múarugu lun lerederun fulasu harumañu. 15 Danme larihin aban hádangiñe gürigia ha éibugubalin fulasu aban labu gürigia, lunti líchugun aban seini lóubagiñe darime hábununi ábunahatiña lidan fulasu wayati le gíribei lisudaranigu Gogu. 16 (Anihein giñe aban uburugu gíriti Súdaragu). Ítara luba harumadagüdüni fulasu.

17 Aba lariñagun Aburemei nun:

—Liráü wügüri, ariñagabá houn sun dunuru, luma houn sun animaalugu gáñitiña lun hóundaragun, ñübuin hamaamuga luagun burí luwübüri Ísüraeli, lidoun adagaragüdüni le lunbei nadügüni houn ñein. Héigiba úi, gurá hagíame hitaü; 18 héigibei hágürügü súdara, gurá hameime hata gumadimatiña ha ubouagubaña kamá hamuga hágürügü luma hata gábara, mudún, harahüñü gábara, o bágasu dibunetiña ha Basanna. 19 Lidan adagaragüdüni le lunbei nadügüni houn, héigiba agülei darí hasandirun, gurá hagíame hitaü darí habacharuadun. 20 Naranseruba aban adineruni houn lau hágürügü gabayu hama ha agalufehabaña gabayu, súdaragu hama sun hawuyeri wuriburuguna, lun heigin darí hakimuledun. Au le Aburemei ariñagubalin.

21 —Ítara luba narufuduni nuéirigun houn néchanigu terencha. Harihubei sun néchanigu ida liña lan naguseragüdüniña luma nabeichuniña. 22 Lúmagiñe weyu ligía lasubudirubei Ísüraeli luagu au lan Aburemeibei le Lubungiute. 23 Hasubudirubei giñe néchanigu terencha luagu ladüga lan hafigoun Ísüraelina hanaawagunbei hageiragiñe; luagu giñe ru nani nanagan hawagun, aba nígirun lun háfaraguniña áganiñu sun hagía wuriburugu. 24 Óusera numutiña keisi le ladünabei hawiye luma mabuchaha hamá, aba níchuguni nanagan hawagun.

25 —Ligía nariñagunbei au le Aburemei: "Guentó, gudemehabubadina houn sun lánigu Ísüraeli, ladügawagun Hakobu. Nadügüba lun lasansiragun habunurun, lun gayara lan lichugún uéiriguni lun niri le sándubei. 26,27 Nóundaraguayabaña haganaguagiñe néchanigu terencha luma lídangiñe burí fulasu ágani; ábameti haganóun darangilu hageira úouga alouchagüdütiña. Ítara luba narufuduni luagu sandu nan, ani gayaraabei harihini saragu néchanigu. Hawandubei Ísüraelina hanügün ǘnabugu ladüga múaradun hamá numa. 28 Óunaha numutiña lidoun adaürǘni haganaguóun amu néchanigu terencha, ani nóundaragubañaya hageira. Mígirunbadina ni aban hádangiñe bóugudi luéi lageira. Ábameti hasubudiruni luagu au lan Aburemeibei le Habungiute. 29 Míchugundigia náalime nanagan hawagun, ladüga óunaha naali nubafu hawagun lumutuniña Ísüraeli. Au, le Aburemei ariñagubalin".