1 Lárigiñe ábaya lagiribudagüdünina luagun tebelaagüle ténpulu. Ábati narihin luagu áwiyuhati lan duna lábugiñegiñe bena, léibaagua luagun oubaü le ñéingiñe lubéi laboucha weyu, tuagun ténpulu. Lararira duna ligía luéigiñe tóunwenren ténpulu luagun suru libiti latarü. 2 Aba láfuridagüdünina lídangiñe fulasu le ñein tubei ténpulu, luéigiñe bena le luágunbei nórute, aba legeyedaguagüdünina bóugudigiñe darí lumoun ebelaagülei le bóugudigiñebei le laubei ligibu luagun oubaü le ñeinhin lubéi laboucha weyu, ñeinñein duna áwiyuha luéigiñe suru libiti ebelaagülei. 3 Aba láfuridun wügüri ligía luagun oubaü le ñeinhin lubéi laboucha weyu, lau aban gúrudu lúhaburugu, aba lamisurahan seingü-san méturu aba lánhiñuraguagüdüni léibaagun duna, chülǘ luagu numurugute lébeda duna nun. 4 Lárigiñe ábaya lamisurahan seingü-san méturu, aba lánhiñuraguagüdüni duna nun; chülǘ luagu niranaagua lébeda duna nun. 5 Ábaya lamisurahan seingü-san méturu, aba liabin lun ábanbei lan duna éibaaguati le siñati lánhiñurawagun luéidigia áfuliharügü. 6 Ábati lariñagun nun:

—Liráü wügüri, tenibátia buidu lun le barihubei.

Lárigiñe aba lagiribudagüdünina larun duna, 7 aba narihin luagu ñeinñoun lan saragu tídibu wewe luéigiñe biángubei louba. 8 Ábati lariñagun nun:

—Lóubawagun oubaü le ñeinhin lubéi laboucha weyu léibaagua duna ligía, chülüti darí lumoun fulasu le ñéingiñe lubéi laboucha duna Hordán, ñéingiñeba lubéi lebelura lidoun Barana Hilaali. Danme lachülürün ñein, labimeduba lidunari barana. 9 Furumiñeguarügü fulasu le ñein lumuti lachülüra duna le, gayaraabei haganóun sun hawuyeri animaalugu ñein, hama saragu úduraü. Lugundun labimedagüdübei duna gífiti ligía, ani sun le aganóuti ñein, gabagaribei. 10 Ñéinbaña óuchahatiña lúmagiñe Engadügiñe darí En-egülaímü, hagumurahaboun hasenin ñein. Ñéinbaña saragu úduraü ñein, kei lidan barana Mediteraniu. 11 Ánheinti lidan burí baribarabu luma suanpu úabei duna bímeti; dúnaba básuati eredera ñein lun leseriwidun lun ladügǘn salu. 12 Labouchuba sun luwuyeri tídibu wewe ginti luéigiñe biángubei laru duna ligía. Mábürühanbei lubana mabagachun ligíame. Ginbei sagü hati lugundun ladüdürawagüdüba lau duna le áfuridubei ténpulurugugiñe. Leseriwiduba lin lun leigín, seriwi ligíame lubana lun áranime.

13 —Nariñahare au le Aburemei: "Anihán burí leben fulasu le lunbei habihini duusu lani Ísüraeli türibu keisi halagante (bianbei murusun yuuti lun Hosé). 14 Fiñutina meha luagu níchugubei lan fulasu le houn hagüchagu. Fánreingua huméi húmagua. Fulasuba le halagante".

15 —Anihán láfadaragun luéigiñe nórute, lagumesera lúmagiñe barana le Mediteraniu, lásügürüba uburugugiñe Etülón luma burí uburugu Sedadü, 16 Berotá luma Sibüraímü uburugu burí le, labadinaguañein lumúan Damasüku luma Amatü, luma Asarü-atikón le fadagubei luma Aurán. 17 Ítara liña lubeiti, lagumeseruba fadaguaü luéigiñe nórute lúmagiñe luéigiñe Mediteraniu darí Asarü-enán, lerederame lumúan Damasüku luma lumúan Amatü luéigiñe nórute.

18 —Fadaguaü burí luéigiñe labouchagüle weyu: Lúmagiñe oubaü le labadinaguabei Aurán luma Damasüku, darí uburugun Tamarü, lubadu Barana Hilaali, luagu limigifen duna Hordán, le lunbei leseriwidun keisi fadaguaü lun lumúan Galaadü luma lumúan Ísüraeli.

19 —Fadaguaü burí luéigiñe suru: Lagumeseruba Tamarügiñe, lásügürüba luéigiñe lísensen duna le Meribá-kadesibei luma luéigiñe liraüraü lidunari Ehiptu darí lachülürün luagun Mediteraniu.

20 —Fadaguaü luéigiñe lálüdagüle weyu: Luéigiñebei Mediteraniu, lúmagiñe fadaguaü luma Ehiptu darí kosu le ligibugiñebei lebelaagüle Amatü.

21 —Anihán fulasu ligía le lunbei lafanreinhóun hadan duusu lani Ísüraeli türibu. 22 Ligíaba alagan le yuubei hun luma giñe houn terencha ha aganóubaña huma ha garahüñübaña haganagua. Gasu hanügüniña kei hamuga Ísüraeli hagaraüdǘwa, yuubei giñe hafanran houn. 23 Ha terencha, habihubei hafanran lidan hamúan türibu ha úmabaña haganawa. Au le Aburemei ariñagubalin.