1 Weyu diisi lidan liseingün hati, lidan lisedün irumu, aba hayabin fiu wéiyaaña mutu Ísüraelina lun hálügüdahan luma Aburemei, aba hañuurun nigibugiñe. 2 Aba lariñagun Aburemei nun:

3 —Liráü wügüri, ariñagabá houn wéiyaaña mutu Ísüraelina, anihán lariñagubei Aburemei: Hiábiña san álügüdana? Au, le Aburemei, fiñutina luagu nibagari luagu maganbunbadün lan ni kata númagiñe.

4 —Liráü wügüri, buguyalá aguseragüdaña, liráü wügüri; aguseragüdabaña, subudigüdabaña luagu katei wuribati le buga hadügübei hagübürigu. 5 Ariñagabá houn luagu nariñahare lan au le Aburemei: Dan le nanúadirunbalin Ísüraeli, fiñutina houn ladügawagun arufudagua au nungua houn Ehiptu. Fiñurügütina houn luagu au lan Aburemeibei le Habungiute. 6 Lidan weyu ligía, aba níchaagun nungua lun nasagaruniña Ehiptugiñe, lun nanügüniña lidoun ageiraü le naranserubei habá, aban ageiraü le rísibei ani buidu ligía lun ábunaguni, ageiraü létima wéndebei lídangiñe súngubei! 7 Aba nariñagun houn sun hagía lun hachagaruniña hagübüri habungiutegu, lun madaseiragun hamá houngua hau liguariuan Ehiptu, ladüga au lan Aburemeibei le Habungiute.

8 —Gama lumoun aba hiñuragun houngua nuagun, máhatiña haganbunina, máhatiña hígiruniña hagübüri habungiutegu, mígirun hamaña liguariuan Ehiptu. Aba nasaminarun nóunahani nigañi hawagun luma lun nabeichaguniña uburugu Ehiptu darí lagufurumadun nigañi. 9 Gama lumoun madügün numuti ítara luéi nerederun wuriba hagibugiñe néchanigu ha aganaguabaña haganawa, lugundun hagibugiñe buga néchanigu hagía narufudagua nungua houn, füramase au luagu nasagarubaña lan Ehiptugiñe. 10 Sagá numutiña Ehiptugiñe aba nanügüniña lidoun fulasu mageirawati; 11 ñein nasubudiragüdei nilurudun luma nugumadin houn, le íchugubei ibagari houn ha adügübalin. 12 Subudigüda numuti giñe burí luéyuri emeraaguni houn, le hamuga lunbei ábanbei lan seini hadan numa, luma aban aritaguagülei luagu anúadira naaña lan lun nánigume. 13 Gama lumoun iñuraguatiña houngua nuagun lidan fulasu mageirawati, madügün hamuti le lubeibei nilurudun; máhatiña lun gumadi le níchugubei houn lun hamuga gabagaribaña lan anhein hagunfulira. Adüga hagía burí katei le moun lumuti ladügǘn lidan luéyuri emeraaguni. Aba yebeti nasaminarun nóunahani nigañi hawagun lun hamuga nagumuchaguagüdüniña lidan fulasu mageirawati, 14 gama lumoun madügün numuti ítara luéi nerederun wuriba hagibugiñe néchanigu ha arihubalin nasagaruniña Ehiptugiñe.

15 —Fiñutina giñe houn lidan fulasu mageirawati luagu mebelubaña lan lidoun ageiraü le níchugubei houn, le buídutimabei lídangiñe súngubei, le rísibei ani buidu ligía lun ábunaguni, 16 ladüga hamahan lun nugumadin, madügün haméi le lubeibei nilurudun, adüga haméi le moun lubéi ladügǘn lidan luéyuri emeraaguni, ladüga houdin hárigi guáriuagu. 17 Gama lumoun gudemetiña nun lun nagünrinchaguniña, aba magumuchaguagüdün nániña lidan fulasu mageirawati. 18 Ábati nariñagun houn hasaanigu lun madügün hamani le hariñagubei hagübürigu houn, lun madaseiragun hamá houngua hau guáriuagu. 19 Aba nariñagun houn: Au, Aburemeibei le Hubungiute. Gúnfuli huméi nilurudun lidan lubudubu, 20 inebelá luéyuri emeraaguni hun, aban láamuga seini lira hidan numa, ítara luba lasubudirúniwa luagu au lan Aburemeibei le Hubungiute.

21 —Gama lumoun iñuraguatiña giñe hasaanigu houngua nuagun. Madügün hamuti le lubeibei nilurudun, magunfulirun haméi nugumadin, le íchugubei ibagari houn ha adügübalin, adaaguatiña le moun lubéi ladügǘn lidan luéyuri emeraaguni. Aba yebe nasaminarun nóunahani nigañi hawagun, 22 gama lumoun madügün numuti luéi nerederun wuriba hagibugiñe néchanigu ha arihubalin ida liña lan nasagaruniña Ehiptugiñe. 23 Fiñutina houn lidan fulasu mageirawati luagu nachagaragubaña lan haganaguóun sun néchanigu ha ubouagubaña, 24 lugundun magunfulirun hamani nugumadin, maha hagía lun nilurudun, adüga haméi le moun lubéi ladügǘn lidan luéyuri emeraaguni, hetenira hóunrügü haguariuan hagübürigu. 25 Darí lun níchugun gumadi le mabuidunti houn, le auti siñabei lan hadariruni ibagari. 26 Ígira numutiña lun hadaseiragun houngua, anaaha idewesei houn guáriuagu, águdahaña hasaanigu ha íbugañanu houn habungiutegu. Nadügünbalin le, lun yebe hanufudedun, lun hamuga hasubudiruni luagu au lan Aburemeibei.

27 —Ariñagabá houn Ísüraelina luagu nariñahare lan au le Aburemei: "Anabagua hamaadina giñe hagübürigu; magunfuliruntiña numa. 28 Dan le nebelaagüdünbaliña lidoun múa le uágubei náfiñura houn luagu níchugubei lan houn, harihin aban wübü íñuti o aban lan tídibu wewe hilumati, aba burí hadügüni hadagaragüdün ñein, luma hadewese le iyereegubei nun, dagagüdatiña katei hémeti luma hadewese le tauti diwéin. 29 Aba nálügüdüniña, nariñaga houn: Ka san "fulasu íñuti" le, le ñein lubéi hidin? Aba lerederun iri le "fulasu íñuti" luagu, chülǘ lumoun dan le".

30 —Ariñagabá houn lílana Ísüraeli: "Anihán lariñagubei Aburemei: Ka uagu habusenra hadaseirun kei meha hagüchagu? Ka uagu háhuduragunbei houn hagübüri guáriuagu ha? 31 Lau burí híchuguni idewesei le luma hágudahaniña hisaanigu keisi adagaragüdüni. Hadaseiraguñamémeña hungua hau higuariuan. Ítara liña san habusenrun hiabin álügüdaguana? Au le Aburemei, fiñutina luagu nibagari luagu mígirunbadina lan lun hálügüdünina. 32 Beluhali hábulugun lun ítara huba lan kei híbiri néchanigu ha ubouagubaña, ha áhuduragubaña lun wewe luma lun dübü, gama lumoun mama luba. 33 Au le Aburemei, fiñutina luagu nibagari luagu narúeihaba lan huagu lau óunwenbu nubafu luma lau nabeichunün lau nigañi. 34 Nóundarubadün haganaguagiñe néchanigu ha ñein hubéi chagagu, lau óunwenbu nubafu luma lau nabeichunün lau nigañi. 35,36 Nanügübadün lidoun burí fulasu mageirawati, ábame nagagibudagun huma lun naguseragüdünün ítara kei naguseragüdüniña hagübürigu lidan fulasu mageirawati Ehiptu. Au, le Aburemei ariñagubalin".

37 —Naríaahabadün kei aban hóuniri mudún le abahüdübaliña lilügüniña mudún, ábame nadügün lun hagunfulirun lau daradu. 38 Nafanreinrubaña ha wuribabaña haganaguagiñe, ábame nasagaruniña lídangiñe fulasu terenchati le ñein lubéi haganawa guentó, gama lumoun mebelubaña lumúanrugun Ísüraeli. Ábameti hasubudiruni luagu au lan Aburemeibei.

39 —Lílana Ísüraeli, anihán lariñagubei Aburemei: Heiba áhuduragua houn higuariuan...! Gama lumoun lárigiñeme, hadügübei le nubeibei, mawiyedun humaalime niri le sándubei adaaguei burí idewesei le luma áhuduragua houn higuariuan. 40 Sun Ísüraelina, háhuduraguba nun luagu nuwübüri le sándubei, luagu wübü le íñubei Ísüraeli, le nageirabei. Au, le Aburemei ariñagubalin. Neresibirubadün ñein lau ugundani, ñeinba namuriaha huma lun hadügüni hidewese luma lun hanügüni furumiñeti tin hinadürigu nun luma sun le lunbei hanúadiruni nun. 41 Danme nóundaragunün haganaguagiñe néchanigu ha ñein hubéi chagagu guentó, danme narufuduni haganagua luagu sandu nan hagibugiñe sun gürigia, ligíaba nánharun lun burí hidewese le buídubei íhemen.

42 —Dánmeti nebelaagüdünün uburugun Ísüraeli, lidoun ageiraü le buga uágubei náfiñura houn hagüchagu luagu níchugubei lan hun, ligíaalime hasubudiruni luagu au lan Aburemeibei. 43 Ñeinba haritagua luagu sun luriban igaburi le aubei hadaseiragua hungua, ábame hahahünedun húniwagua guánarügü luagu saragu wuribani le adüga humaalibei. 44 Lílana Ísüraeli, danme le nóuserunün mama según ligaburi luriban husan, gama lumoun íchiga uéiriguni lun niri, ligíame hasubudiruni luagu au lan Aburemeibei. Au, le Aburemei ariñagubalin.

45 Aba lariñagun Aburemei nun:

46 —Liráü wügüri, gararaguabá luagun suru, ábame badimurehan lidan niri kóntüra dabíara le lóubawagubei suru, 47 bariñagame lun: "Lariñahare Aburemei: Nébeduba aban watu le lunbei lagumuchaguagüdüni sun tídibu wewe le bídanbei dǘdüti luma mábeiti, watu ligía, laduranguba, méñeguchunbei, lachurarubei hagibu sun gürigia ha bídanbaña, luéigiñe nórute lun luagun suru. 48 Ábame larihini sun ubóu luagu au lan le Aburemei ébedubalin. Ani méñeguchunbei watu ligía".

49 Aba nóunabuni, nariñaga lun:

—Nabureme, hariñaharetia gürigia luagu káteigubeirügü lan le úati gunfurandawa lan nadimurehabei.