1 Ábaya lanügünina wügüri ligía luagun tebelaagüle ténpulu le bóugudigiñebei, le ñéingiñe lubéi laboucha weyu, le darugubei.

2 Ñein lariñaga Aburemei nun:

—Darugu luba lerederun ebelaagülei le; madaarúnwabei. Siñabei lebelurun ni aban ñéingiñe, lugundun ñéingiñe lebelura Aburemei le Lubungiute Ísüraeli. Darugu luba lubeiti. 3 Gumadimatirügüba gayara lebelurun, lun lañuurun eigei éigini le sagüráubei ligibugiñe Aburemei. Lunti lebelurun luéigiñe lebelaagüle bena, furí ligíame ñéingiñememe.

4 Lárigiñe aba lanügünina luéigiñe ebelaagülei le luéigiñebei nórute, tigibugiñe ténpulu. Aba narihin luagu buinha lan ténpulu lau luéirigun Aburemei, aba nabuluchagun darí ladagarun nerebe múarugu. 5 Ábati lariñagun Aburemei nun:

—Liráü wügüri, fegebei bagu buidu, aganbabéi teni buguyame lun le lunbei nariñaguni bun libügürü tilurudun ténpulu. Arihabéi buidu kátaña lan gayaraabei hebelurun ténpulurugun luma háfuridun tídangiñe.

6 Ariñagabá houn gürigia mabuchahatiña ha lánigu Ísüraeli:

—Lariñahare Aburemei: "Hebé hadaagun katei le magundantina lau, lumutuniña Ísüraeli. 7 Huguya wíyeda humutu nitenpulun lau hígirun lun hebelurun terencha tidoun, gürigia ha úabei lumakün nidaradun ni hachügüwagu, ni luagu hágubu; wíyeda humutu lau hadagaragüdün hagüle animaalu luma hata, adüraaguei nidaradun lau burí lagübüri katei le hadügübei. 8 Magunfulirun humuti burí nilurudun le sagüráubei, rúrügü humuti háhaburugun terencha".

9 Ligía nariñagunbei au le Aburemei:

—Mebelubei ni aban terencha nitenpulunrugun le úati lisenin nidaradun tidan lanigi o luagu lan lúgubu; ni íbini aban terencha le aganóuti haganagua Ísüraelina.

10 —Lewitagu ha buga adisedubaña nuéi dan le hígirunbalin Ísüraelina némeri lun hafalarun guáriua, hafayeiruba luagu hafigoun. 11 Gayaraabei heseriwidun nitenpulunrugu keisi óunigirutiña bena, luma burí amu luwuyeri fisiu ténpulurugu; hagíaba áfarahaña animaalu ha águdahoubaña lidan adagaragüdüni le gudawarügüti, hama ha hanügübaña gürigia ténpulurugun keisi idewesei; gasu giñe aranseñu hamá lun heseriwidun houn gürigia. 12 Seriwitiña meha keisi ábutigu houn Ísüraelina lidan ladügǘn kultu houn guáriua, aba hafigougüdüniña. Ligía hafayeiruba lubéi luagu hafigoun. Au, le Aburemei ariñagubalin. 13 Siñabei heseriwidun nun keisi fádirigu, ni lun hayarafadun lun burí numegen le sagüráuti. Gasu háfaguni hafayeiruaha luagu burí katei wuribati le hadügübei. 14 Níchugubaña lun hadügün furumiñeguarügü wadagimanu ténpulurugu.

15 —Fádirigu Lewitagu ha ladügawagun Sadoku, ha asigirubaña eseriwida nitenpulunrugu dan le hígirunbalin Ísüraelina némeri, gayaraabei hayarafadun nun lun heseriwidunina. Gayaraabei hayabin nigibugiñoun lau lagüle luma lita adagaragüdüni. Au, le Aburemei ariñagubalin. 16 Gayaraabei giñe hebelurun nitenpulunrugun, luma lun hayarafadun luagun latarü lun heseriwidun nun. 17 Danme hebelurun luéigiñe lubenari bürürü le múnadagiñebei, gasu táubaña lan daüguaü lautu linu. Danme heseriwiduña lan lidan bürürü le múnadagiñebei o ténpulurugu lan, madaübaña daüguaü lautu lura mudún. 18 Ñeinbei aban búnedu hábulugu lauti linu, tuma giñe hagalasunsiyu tautu linu, magüragunbaña ni kata luagu haranaagua le íchuguti lárouga houn. 19 Lubaragiñe háfuridun lidoun bürürü le bóugudibei, le ñein habéi gürigia, gasu haragachunu daüguaü to buga hayusuruboun lun heseriwidun ténpulurugu, ábame hadaürün amu daüguaü, lun másügürün lan arumani le tuágubei hawagun gürigia.

20 —Masarúnbei hábulugu heluñu, mígirun hagíame lun lamiginagudun hádiburi. Sáwarügübei lídangiñe. 21 Moun lumuti latun ni aban fádiri diwéin dan le lebelurun lidoun bürürü le múnadagiñebei. 22 Moun lumuti lamarieidun tuma aban würi to hilaaru úmari ni tuma würi to ígiragutu luma túmari, luéidigia tuma aban Ísüraelina to irahügiru o tuma lan aban würi to meha lúmari aban fádiri aba lounwen tuéi.

23 —Lunti harufudahan fádirigu houn numutuniña ka lan katei harumabei lumoun le wíyebei. 24 Hagíaba aguseragüda dan le anihein lan wuribu, haguseragüdüba según nilurudun. Hagunfulirubei sun nilurudun luma narufudahan libügürü burí sun nufedun, inebe ligíame luéyuri emeraaguni houn kei burí weyu le sagüráuti.

25 —Moun lumuti haguurun luagu hilaali luéi hawiyedun, ánheingubeirügü háguchi lubéi, o háguchu, o haráü, o hábiri, o aban lan hatu to mamarieidungiru. 26 Anhein hadüga, gasu harumadaguagüdün houngua, lárigiñeme ábame hagurabahan sedü weyu. 27 Danme hebelurunya lidoun bürürü le múnadagiñebei tibiti ténpulu lun hadügüni heseriwidun, híchuguba aban adagaragüdüni luagu figóu. Au, le Aburemei ariñagubalin.

28 —Áurügüba halagante fádirigu. Michugúnbei umegeni houn uburugu Ísüraeli. Au hamegenbei. 29 Gayaraabei héigini idewesei le fulúaruauti le híchugubei Ísüraelina nun, hama animaalugu ha adagarawagüdübaña luagu figóu luma luagu duru. Sun giñe le hadireirun Ísüraelina nun, hánibei fádirigu. 30 Heresibirubei giñe fádirigu lubuidun-agei furumiñeti alubahani luma sun idewesei. Ani huguya, danme hañoundagunu fulúaru tubá fein, híchugubei le lubuidun-agei houn. Ítara luba nabinirunu huban. 31 Méiginbaña fádirigu dunuru o animaalu le hilarügüti, o le lan láfarun animaalu áraabuna.