1 Aba ladimurehan Aburemei nun, lariñaga:

2 —Liráü wügüri, badimureha houn lílana bageira, bariñagame houn: "Dan le nóunahani wuribu lidoun aban ageiraü, anúadahatiña lílana fulasu aban hádangiñe lun lóunigirun. 3 Dan larihin óunigiruti hayarafadun áganiñu, aba línwinrunu fidu awisaraña gürigia. 4 Le aganbuti tínwinrun fidu ani madügünti gasu, aba hayabin áganiñu aba háfaruni, ligía guánarügüba gadurun luagu lounwen, 5 lugundun aganba lumuti tínwinrun fidu gama lumoun madügünti gasu; ligía gadurunbei lidan lounwen, lugundun lun hamuga adüga lan gasu, lesefuruñein hamuga libagari. 6 Gama lumoun ánhaña lariha óunigiruti áganiñu ani mínwinrun lumutu fidu lun lawisaruniña gürigia, aba hayabin áganiñu, aba háfarun somu gürigia, lóunweba gürigia ligía luagu lifigoun, gama lumoun nafayeiragüdübei óunigiruti luagu".

7 —Liráü wügüri, ítara liña lubeiti, buguya ru naadibu keisi óunigiruti hawagu lánigu Ísüraeli. Lunti beresibiruni nuganute, subudigüdabeime neweridihan houn. 8 Kei hamuga guentó, aba nasiadirun aban gürigia salufuriti lun lounwen; ánhabu madimurehan luma lun lasansiruni ligaburi lun labagaridun, anhein madügün lan, lóunweba gürigia salufuriti ligía luagu lifigoun, gama lumoun nafayeiragüdübadibu luagu lounwen. 9 Gama lumoun anhein beweridira gürigia salufuriti ligía lun lasansiruni libagari, anhein madügün gasu, lóunweba luagu lifigoun, gama lumoun buguya, besefurubei bibagari.

10 —Ariñagabá houn lánigu Ísüraeli: "Liráü wügüri, huguya hariñahare: Buinñu waña lau figóu. Ligía wañaladuña lubéi wínwanñu. Ida luba gayara lan wabagaridun? 11 Gama lumoun au le Aburemei, fiñutina luagu nibagari luagu mabusenrun nani lounwen le salufuribei, le nabusenrubei lun lasansiruni ligaburi lun lawinwandun. Ísüraelina, ígira huméi lagübüri ibagari le gádanbalün móunwegun humaamuga".

12 —Liráü wügüri, ariñagabá houn lílana bageira: "Anhein afigouha aban wügüri, mesefu lubéi binadu lubuidun ligaburi, anhein lígira aban wügüri salufuriti luriban, móunwenbei ladüga binadu luriban. Anhein afigouha wügüri le buídubei, meseriwínbei binadu lubuidun ligaburi lun, lun lasigirun abagarida. 13 Ánhana füramase ibagari lun aban wügüri buiti, aba ladügüni gürigia ligía le wuribabei, meberesegúnbadina lau ni kata buiti le ladügübei, lóunweba ladüga wuribati le ladügübei. 14 Anhein nasiadira aban gürigia wuribati lun lounwen, aba lígiruni gürigia ligía figóu, abagarida ligía buidu, lau irichaü, 15 águyugüdalei le buga líweruhabei, gúnfulileime lúrudu le íchugubei ibagari, ígiraleime ladügüni le wuribabei, labagariduba gürigia ligía, móunwenbei. 16 Kei buíduhali lubéi lóuserun guentó, ani richagua ligía, labagariduba, maritagun nuguyame luagu ni aban lídangiñe figóu le buga ladügübei".

17 —Hariñaga hamuga funa lílana bageira luagu múaran nan lidan le nadaagubei, gama lumoun hagía madügünbalin katei lidan lúaran. 18 Anhein lígira gürigia buiti ladügüni le buídubei lun ladügüni le wuribabei, lóunweba luéigiñe lira. 19 Anhein giñe lígira gürigia wuribati ladügüni le wuribabei lun ladügüni le buídubei, luma le úaraguabei, labagariduba, luéigiñe ladügüni ítara. 20 Huguya águyuguagüdatün ariñaga: "Múaranti Aburemei lidan le ladügübei". Gama lumoun naguseragüdübei kada aban hídangiñe huguya Ísüraelina según ligaburi hóuserun.

21 Lídanbei liseingün weyu lidan lidiisin hati le irumu duusu lúmagiñe wasagarún wageiragiñe, aba liabin aban wügüri anurahati Herusaléngiñe aba labahüdagun nun luagu ábürüha lan uburugu háhaburugun áganiñu. 22 Áriebu le lubaragiñebei lachülürün wügüri ligía, ru laali buga Aburemei lúhabu nuagun; binaafinti dan le liábinbei wügüri ligía, aba ladaaruni Aburemei niyuma aba lagidarun mereruni nuéi.

23 Aba ladimurehan Aburemei nun, lariñaga:

24 —Liráü wügüri, hariñahare gürigia ha aganóubaña lidan luburugute Ísüraeli, ha lídanbaña günringuaü: "Abüraámü, ábanrügüñein meha, lau sun lira, ñǘbuinti lun laburemebei lan aban ageiraü; gúbumeti wagía le gíbebei, wayabinba giñe lun labureme wamá ageiraü".

25 Ariñagabá lubeiti houn: «Lariñahare Aburemei: "Huguya houtün úi lau hitaü, huduguatün houn guáriua, áfarahatün, ani haritaguatün luagu laburiñabadün lan ageiraü? 26 Ageindaguatün tau áruma lau anarimeni, adügatün burí katei le mínsiñeti nun, sun huguya agabarahatün, ani haritaguatün luagu laburiñabadün lan ageiraü?" »

27 Ariñagabá giñe houn: «Lariñahare Aburemei: "Fiñutina luagu nibagari luagu ha lan aganóubaña lidan burí uburugu günrinwaguaali, háfarawaguba lan giñe, ha aganóubaña áraabu, nadügüba lun héiginiña animaalugu gáñitiña, ha aganóubaña lidan burí lilulin-agei dübü láfaragubaña sandi. 28 Nígirubei ageiraü málouga, günrinwaguañu, nagünrinchagubei erei le aubei hapantaha. Lerederuba burí luwübüri Ísüraeli málouga; úabaña ásügürütiña ñéingiñe. 29 Danme nígiruni ageiraü málouga luma lidan günringuaü ladüga figóu burí le hadügübei lílana, ligíame hasubudiruni luagu au lan Aburemeibei" ».

30 —Liráü wügüri, adimurehatiña lílana bageira buagu lubadu burí baríeiru, hariñaga hámagua: "Keimoun waganbei uganu le ñǘbuinbei luéigiñe lóubadina Aburemei". 31 Ábati hayabin numutuniña, aba hañuurun bigibugiñe kei hadüga súnwandan, lun haganbuni bererun. Gama lumoun madügün hamuti. Águyuguagüdatiña ariñagei kamá hamuga uremu, gama lumoun ánhounti hanigi luagu seinsu taritagua. 32 Ítara liña hanügünibu kei aban eremuhati uremu lánina adarihani, le buiti lumalali, gáfaradi ligía árüpa. Aganba hamuti bererun gama lumoun madügün hamuti. 33 Lau sun lira, lagunfuliruba sun le bariñagubei; danme lagunfulirun, hasubudirubei luagu inarüni lan luagu ñeinñein lan buga aban profeta haganagua.