1 Aba lariñagun Aburemei nun:

2 —Liráü wügüri, arufudabá aban hénpulu houn Ísüraelina, 3 lun hasubudiruni le lariñagubei Bungiu:

"Aba tachülürün aban ágila wéiritu luagun luwübüri Líwanu;

wéinamuti tarüna, daraguati, gíbeti koloru luagu.

Aba tárügüdüni lígirugu aban lídibu hibúari,

4 aba táhalachuni limu le íñutimabei,

aba tidin ábunei lidan aban hageira adaagutiña marasun

le ñein lumuti saragu marasun.

5 Lárigiñe aba tanügün aban ilaü múarugugiñe,

aba tábununi lidan aban fulasu bunawaguaali,

laru aban liraüraü duna.

6 Aba láhüchün aba liabin lun ábanbei lan tídibu beibei hilumati;

ani lau sun maweirin lan liñun,

aba larabachun lilimun tuagun ágila tuguya,

sun aniha lan lílagüle árügüda múarugu.

Aba liabin lun ábanbei lan lídibu beibei,

aba láhüchagun, aba laweinamudun lilimun.

7 Gama lumoun ñeinñoun amu ágila wéiritu,

wéinamuti tarüna, gíbeti tiyu.

Ábati labalachun lílagüle luma lilimun lídibu beibei le

luagun oubaü le ñein tubéi ágila tuguya

lun tíchuguntima duna lun,

dise luéi fulasu le ñein lubéi tabunúa.

8 Gama lumoun lurugabuñein saragu duna, lidan múa buiti,

le ñein lubéi gayaraabei lan láhüchagun lilimun,

gin ligíame le buiti,

ñübuin ligíame lun ábanbei lan lídibu beibei le buiti".

9 "Ariñagabá lubeiti houn luéigiñe nóubadina,

luagu nariñahare lan au, le Aburemei,

luagu mawanserúnbei lan lídibu beibei ligía.

To furumiñetu ágila, táhulubei lílagüle,

ábame lachagarun lin;

táhulubei lílagüle lau murusun erei,

hama bianraü gürigia,

ábame lásaürün sun iseri láhüchagun.

10 Íbinime labunúnya, máhüchagunhalime;

lásaürüba danme láfurun suedi tuagun;

lásaürüba lidan fulasu le hamuga ñeinba lubéi láhüchagua".

11 Aba lariñagun Aburemei nun:

12 —Álügüdabaña gürigia mabuchahatiña ha anhein subudi habalin ka lan mini lan katei le. Ariñagabá houn: Aba liabin lurúeite Babilónia Herusaléun, aba ladaürüni lurúeite Hudá hau sun lánigu, aba lanügüniña lúmagua Babilónioun. 13 Lárigiñe aba lanügün aban wügüri hádangiñe liduheñu urúei, aba ladügün aban daradu luma, aba lafosuruni lun láfiñurun úarani, aba lanügüniña gürigia ha íñugubaña fulasurugu 14 lun ábanbei lan arúeihani débiliti Hudá, le mabafuti lun lásaarun gama lumoun aranseñu lun lagunfulirun luma daradu. 15 Lau sun lira aba liñuragun lurúeite Hudá lungua luagun lurúeite Babilónia, aba lóunahan amuriaha gabayu, hama saragu súdaragu Ehiptu. Haritaguatün funagia luagu lárigiñeme lan lira, lagañeiruba lan ani sefu ligíame wínwanñu? Gayaraati funagia lesefurun aban gürigia le magunfulirunti luma daradu? 16 Au le Aburemei, fiñutina luagu nibagari luagu lóunweba lan le adüraagubalin daradu le uágubei láfiñura lun urúei le íchugubalin luagu lálana arúeihani. 17 Danme le lageindagun lurúeite Babilónia luma, bunagua ligíame wáyelesi luma baríeiru geyegua lau uburugu, áfaragua ligíame saragu gürigia, móunahanbei urúei Ehiptuna súdaragu gabafutiña ni saragu gürigia lun híderaguni, 18 ladüga magunfulirunti lau daradu le uágubei láfiñura; dáguaali buga lungua lidoun katei le, gama lumoun magunfulirunti. Ligía siñabei lubéi lesefurun wínwanñu.

19 —Au le Aburemei, fiñú numuti luagu nibagari: Adügati bula lau áfiñuruni le ladügübei nun, ani magunfulirunti lau daradu le ladügübei numa, ligía naguseragüdübei lubéi. 20 Náguruba seni lau, ábame nárügüdüni tidan; ábame nanügüni Babilónioun, ábame naguseragüdüni ñein ladüga magunfulirun lan numa. 21 Hóunweguba habuidun-agei lisudaranigu wuriburugu, ha erederutiña wínwanñu, herederuba chagagu. Ligíameti hasubudiruni, luagu adimurehaadina lan, au, le Aburemei.

22 —Nariñahare au le Aburemei: "Nárügüdübei giñe ígirugu le íñutimabei luagu hibúari; náhuluba aban láhüchagun le ñǘraügili luéigiñe limu le íñutimabei, ábame nábununi luagu wübü le íñutimabei, 23 luagu luwübüri Ísüraeli le íñutimabei.

Láhüchüba lilimun, laginduba,

liábinba lun ábanbei lan hibúari buiti.

Haganóuba sun hawuyeri animaalugu lábugiñe,

hadügüba sun hawuyeri dunuru hádibu lábugiñe lamuñadina lilimun.

24 Ábame lasubudiruni sun tídibu wewe le áraabubei luagu Au lan Aburemeibei. Fui numuti tídibu wewe le pántabei, aba naweiridagüdüni le ñǘraübei, sáügüda numuti tídibu wewe le hilumabei, hilumagüdanei le mábeibei. Au, le Aburemei ariñagubalin ani gúnfuli numuti".