1-3 Au, fádiri Esekiéli, le liráü Busí, luagu meha aban weyu láruñadina duna Kebarü, Babilónia, haganagua ha asagarúbaña hageiragiñe keisi adaürǘtiña. Ligía ladaaragun sielu, aba narihini Bungiu lidan aban uénedü. Weyu ligía, seingü lidan gádürü hati, irumu darandi, seingü irumu lárigiñe lasagarúniwa urúei Wakín lageiragiñe: Aba líchuguni Aburemei lúhabu nuagu. 4 Ábati narihin liabin aban luriban dan luéigiñe nórute, aba láfuridun watu gemeti lídangiñe aban dúeri kamá hamuga labirihaniga, ñeinñein aban larugounga héreti geyegu lau. Lamidanguati watu ñeinñein aban katei ámirihati, lenege buronse. 5 Aba narihin gádürü kátaña gabagaritiña laganagua luriban dan ligía, gama lumoun henegeyuma gürigia gádürü kátaña hagía. 6 Kada aban hádangiñe kátaña hagía gádürüñein ligibu, gádürü giñe larüna; 7 suruti hayada, gábarati kei lúbara bágasu, miriti kei buronse le írichawaguaali buidu. 8,9 Bóugudin luéi gádürü hagibu luma gádürü harüna, gáhabutiña libe háhabu gürigia luagu gádürü houba, lábugiñe harüna. Dúnguati harüna luougua. Dan le héibugun, madigiragúntiña, magiribudún, sun héibugun habaruaguóun. 10 Ítara liña hagibu gádürü kátaña hagía: Hagibugiñe, ítara liña hagibu kei gürigia; luéigiñe hóunwenren, kei ligibu liñún; luéigiñe habaünan, kei ligibu bulu bágasu; hanagangiñe, kei ligibu ágila. 11 Iñun látuleragua harüna. Biama lídangiñe harüna, dagati luougua, lau le aban biama hadouragua lau hágubu. 12 Sun hagía hagibugiñoun héibuga, magararagúntiña dan le héibugun. Sun houdin le ñeinhin lubéi lanügaña lubafu Bungiu. 13 Ítara liña hagaburi kátaña hagía kamá garubun durungu umuti, o kamá tochi éibugañahati haganagua, harugoungadagüdati watu gemeti ligía, furiti labirihaniga lídangiñe. 14 Kátaña hagía, ñǘdünhañaha, ñübuin hagía furese furese, kamá hamuga labirihaniga.

15 Danbei naríaguniña gádürü kátaña hagía, aba narihin gádürü ubalabaü múarugu, aban lóubagiñe kada aban. 16 Aban labu gádürügubei ubalabaü ligía, miriti kei topasiu. Laganóun hamuga kamá anihein aban ubalabaü lurageirugu kada ubalabaü. 17 Gayaraati burí hawanserun luagun furumiñeguarügü lídangiñe gádürügubei oubaü magararagúnga. 18 Aba narihin luagu gádürügubei lan ubalabaü ligía gáruti, durunguati geyegua lau. 19 Dan le hawanserun kátaña hagía, aba giñe lawanserun ubalabaü ligía hama, dan le hiñuragun houngua múarugugiñe, aba giñe liñuragun ubalabaü lungua. 20 Le ñeinhin lumuti labuguraña lubafu Bungiu kátaña hagía, ñeinhin houdin, aba giñe liñuragun ubalabaü lungua hama, ladüga ábanmeme úgubu kátaña hagía luma ubalabaü ligía. 21 Dan le hánhingichun kátaña hagía, aba giñe lánhingichun ubalabaü, dan le hararamagun, aba giñe lararamagun ubalabaü; dan le hiñuragun houngua múarugugiñe, aba giñe liñuragun ubalabaü lungua hama, ladüga ábanmeme úgubu kátaña hagía luma ubalabaü ligía.

22 Lóugiñe hachügü kátaña hagía, ñeinñein aban katei adouraguti hachügü ámirihati kei bídiriu. 23 Tuleguati harüna suruñu lábugiñe katei le adouragubei lau hachügü, aba ladunragun luougua. Lau le aban bián harüna hadouragua haugua. 24 Aba giñe naganbuni liréin harüna dan le hawanserun: Ítara liña kamá liréin duna le éibaaguati dan liñurun, kei lumalali Suntigabafu, kei haréin saragu súdaragu. Danha le hararamagun aba harariragüdüni harüna. 25 Aba láfuridun aban ireini íñugiñe libiti katei le adouragubei lau hachügü. 26 Aba narihin aban lálana arúeihani kamá hamuga lauti safiru lóugiñe katei le adouragubei lau hachügü, ñeinñein aban henege gürigia luagu lálana arúeihani ligía. 27 Luéigiñe liranaagua lun iñun, miriti kei buronse laganagua watu gemeti, luéigiñe liranaagua lun ǘnabun, aba narihin aban katei lenege watu gemeti. Ñeinñein aban larugounga geyegu lau,

28 tenege heremuru dan le tasaliragun lidan dúeri lidan láhuyun huya. Ítara liña ligaburi larufudagun luéirigun Aburemei lungua nun. Dan narihinbalin, aba nabuluchagun dagá nerebe múarugu.