1 Lárigiñe, aba naganbun lariñagun aban umalali nun:

—Liráü wügüri, ráramaba, nadimureha buma.

2 Sun aniha lan umalali le adimureha nun aba lebelurun lubafu Aburemei nidoun, aba lararamagüdünina. Ábati naganbun lariñagun umalali le buga adimurehabei:

3 —Liráü wügüri, nóunahaadibu hamoun Ísüraelina, houn gürigia maganbaditiña, ha agarabaagubaña nuagun. Hagía hau sun hagübürigu, garabaguaaña nuagun chülǘ lumoun weyu le uguñe. 4 Dereti giñe haganbun hasaanigu, deré ligía hachügü. Nóunahaadibu lubeiti hamoun lun bariñagun houn: "Anihán lariñagun Aburemei". 5 Adüga hagía gasu bau madügün, kei gürigia habéi mabuchahatiña hagía, gama lumoun hasubudirubei luagu anihein lan aban profeta haganagua. 6 Buguya, manufudedabá hawéi, ni luéi le hariñagun bun, íbini basandiragun bungua kamá hamuga geyegu liña hiiyu bau, ani haganaguañadibu lan águru. Manufudedabá luéi le hariñagun bun, máhüchürün buguyame luagu igibu le harufudubei, íbini yebe weiri lan mabuchaha hamá. 7 Apurichihabei nererun houn, aganba hamabu maganbun, lugundun deretiña. 8 Tenibá buidu lun le nariñagubei bun ani medererabá kei hagía. Wagaba, houbei le lunbei níchuguni bun.

9 Ábati narihin liabin aban úhabu tuleñu nuagun tau aban líburu hóuburagu lidan úhabu ligía. 10 Aba látuleragunu úhabu ligía nigibugiñe, aba narihin bürüwañutiña lan tanagangiñe luma tigibugiñe. Ani agúarahani lánina ayahuni, igarigu luma áünhani bürüwañubei tidan.