1-7 Anihán burí hiri türibu. Lúmagiñe luéigiñe fadaguaü nórute, le luéigiñebei Mediteraniu, lásügüra Elütóngiñe, le lebelaagüle Amatü luma Asarü-enán, luagun suru libiti lumúan Damasüku luma Amatü, libihuba kada türibu aban murusun fulasu lúmagiñe luéigiñe fadaguaü le luágunbei labouchagüle weyu darí lumoun le luágunbei lálüdagüle lidan igaburi le:

Dan

Aserü

Nefütalí

Manasési

Éfürain

Rubén

Hudá

8 Lárigiñe, múa le lunbei hareiduni, le giñe luéigiñebei labouchagüle weyu luagun lálüdagüle. Dúusubei kilometuru dimí lítulen, ánheinti limigifen, ítara luba kei líbiri burí fulasu le luéigiñebei labouchagüle weyu luagun lálüdagüle. Tamidanguaboun ténpulu.

9 Múa le adireirúabei lun Aburemei lídangiñe fulasu ligía, dúusubei kilometuru dimí limigifen, diisi kilometuru lidabuberen. 10 Lurageirugu murusun fulasu ligía ñeinbei aban murusun le hóunrügüti fádirigu; dúusubei kilometuru dimí luagu luéigiñe nórute luma luéigiñe suru, seingü kilometuru luéigiñe labouchagüle weyu luma luéigiñe lálüdagüle. Lamidangua lúmagua ñeinboun litenpulun Aburemei. 11 Hafulasunbei fádirigu ha deregeguabaña houngua lun Aburemei fulasu ligía, ha ladügawagun Sadoku, ha adügübalin eseriwiduni, ha meha mafalarunbaliña híbiri Ísüraelina, dan le hígirunbalin némeri, kei hadüga Lewitagu. 12 Ligía gafulasun habéi lubéi fádirigu fulasu le sagüráutimabei lurageirugu fulasu le adireirúabei lun Aburemei, lurugabu hafulasun Lewitagu. 13 Lurugabubei hafulasun fádirigu hafulasun Lewitagu dúusubei kilometuru dimí limigifen, seingü luagu lidabuberen. Le lubeiti murusun le adireirúabei lun Aburemei dúusubei kilometuru dimí luagu limigifen, diisi luagu lidabuberen. 14 Malugurúnbei ni murusun lídangiñe, masansirun, maduregerun ladüga díreiwati lun Aburemei.

15 Le líbiri, le dúusubei kilometuru dimí limigifen luagu biama lidabuberen, madireirúnwati. Gayaraabei haganóun gürigia ñein, ñeinbei giñe sagadi lun heigin bágasu. Lamidan lúmagua, ñeinbei uburugu, 16 uburugu ligía bianbei-milu-bián-san-dimí méturu luéigiñe kada louba. 17 Geyegu lau uburugu ñeinbei heigan bágasu, sanbei-wein-seingü méturu luéigiñe gádürügubei louba. 18 Anihein aban fulasu lóubawagu uburugu lurugabu fulasu le díreiwabei lun Aburemei, séingüñein kilometuru limigifen luéigiñe labouchagüle weyu, seingü luéigiñe lálüdagüle. Lábunawaguba nadü lidan fulasu ligía lun heigin gürigia ha nadagimeinbaña uburugu. 19 Furumiñeguarügü hádangiñe hani Ísüraelina türibu nadagimeintiña uburugu, hábunaguba nadü lidan fulasu ligía. 20 Dúusubei kilometuru dimí luéigiñe kada aban lídangiñe gádürügubei louba fulasu ligía lumoun murusun le lani Aburemei.

21,22 Le líbiri laru fulasu le labadinaguabei lufulasun Hudá luma lufulasun Benhamín, ligíaba lufulasun gumadimati; lememe fulasu burí le luéigiñebei biángubei louba fulasu le areidúbei lun Aburemei, luma lufulasun uburugu. Dúusubei kilometuru dimí lidabuberen. Luéigiñe labouchagüle weyu lachülürüba darí luagun fadaguaü le luéigiñebei oubaü ligía, luéigiñe lálüdagüle weyu lachülürüba darí luagun barana. Lamidangua ñeinba leredera murusun le areidubei lun Aburemei, tau ténpulu, luma hafanran Lewitagu luma lumúan uburugu.

23-27 Le hamúan ha híbiri türibu luágunmemeñein suru. Kada türibu heresibiruba murusun fulasu lúmagiñe luéigiñe fadaguaü le luéigiñebei labouchagüle weyu chülǘ lumoun le luéigiñebei lálüdagüle, lidan igaburi le:

Benhamín

Simeón

Isakárü

Sabulón

Gadü.

28 Luéigiñe suru libiti lumúan Gadü, lagumeseruba fadaguaü lúmagiñe Tamarügiñe, lásügürüba luéigiñe lísensen duna le Meribá-kadesibei luma liraüraü lidunari Ehiptu, darí lumoun barana Mediteraniu.

29 —Ligía ageiraü le lunbei habihini hani Ísüraelina türibu keisi halagante, ani huguya, lunti ítara luba lan hafanreinhani. Au le Aburemei ariñagubalin.

30-34 Geyegu luba uburugu lau aban baríeiru le bián-milu-bián-san-dimí méturu luagu kada aban lídangiñe gádürügubei louba. Luagu kada louba baríeiru ñeinbei ǘrüwa bena, aban lau hiri kada türibu lani Ísüraeli lidan igaburi le: Bena le burí luéigiñebei nórute, lau liri Rubén, Hudá luma Lewí. Le luéigiñebei labouchagüle weyu, lau liri Hosé, Benhamín luma Dan. Le luéigiñebei suru: Simeón, Isakárü, Sabulón; le luéigiñebei lálüdagüle weyu: Gadü, Aserü, Nefütalí. 35 Néfubei milu méturu limigifen baríeiru ligía lidan súngubei. «Anihein Aburemei ya ligíaba liri uburugu lúmagiñe guentó».