1 Danme hadügün ubunuruni luagu fulasu lun híchuguni hafanran kada türibu houn, gasu hígirun duusu kilometuru dimí limigifen múa luagu diisi luagu lidabuberen, lun lánime Aburemei. Sun múa ligía, sagüráubei. 2 Lanügüba aban murusun lídangiñe bián-san méturu dimí luéigiñe kada louba tun ténpulu geyegu lau sagadi le wein-séingüti méturu lidaburen. 3 Lidan murusun le lani Aburemei, ñeinbei murusun múa dúusuti kilometuru limigifen luagu seingü lidaburen, ligíaba murusun le sagüráutimabei: Ñeinboun ténpulu. 4 Múa ligía hounbei fádirigu ha eseriwidubaña litenpulunrugu Aburemei, ha ayarafadubaña lun lun heseriwidun lun. Ñeinboun haban. Ábanbei fulasu sagüráuti le areidúti tun ténpulu. 5 Ñeinbei giñe ábanya murusun múa duusu kilometuru dimí limigifen seingü kilometuru lidaburen, hánime Lewitagu ha eseriwidubaña ténpulurugu, gaburugute hamaamuga lun haganóun ñein. 6 Ñeinbei giñe murusun múa le dúusuti kilometuru dimí limigifen luagu bián kilometuru dimí lítulen adireirúti lun uburugu, lurugabu fulasu le sagüráubei. Hánibei sun lumutuniña Ísüraeli múa ligía.

7 Ñeinbei giñe murusun múa lun gumadimati. Murusun lídangiñe luagun oubaü le ñéingiñe lubéi laboucha weyu, le aban luéigiñe oubaü le ñeinhin lubéi lálüda weyu. Ábanbei labu limigifen luéigiñe oubaü le ñéingiñe lubéi laboucha weyu luagun le ñeinhin lubéi lálüda weyu kei limigifen hamúan kada türibu. 8 Lumúanbei gumadimati Ísüraelina múa ligia; ítara luba míchuhaña lanme gumadimatiña lidere dan houn numutuniña; ígirarügü habéi hamúan Ísüraelina según hani türibu.

9 Nariñahare au, le Aburemei:

—Huguya lábutigu Ísüraeli, buídurügaali! Gumula anarimeni luma amudirawaguni! Huadigimarida lau irichaü luma úarani! Hebé híweruhan múa hawéi numutuniña! Au, le Aburemei ariñagubalin!

10 —Yusu humá balansu luma amisuraagülei le richati. 11 Lamisuraagüle ilaü, lunti ítara lan kei lamisuraagüle katei le dunouti. Omerü le anügüti bián-san-wein líturu, ligíaba hamisuraagüle. Anhein lamisuraagüle ilaü gasu ábanbei lan diisi lídangiñe omerü, aban efa ilaü aban giñe diisi lídangiñe omerü.

12 —Lidan burí katei le amisurahóuarügüti: Wein herasi amisuraagülei létima ñǘraübei adügati aban sikulu le únsuti güramu; ǘrüwa wein sikulu adügati aban mina.

13 —Anihán burí idewesei le lunbei hadügüni: Hafanreinragubei halubahan le türigu luma sewada lidan ǘrüwa-wein murusun, ábame híchugun lídangiñe keisi idewesei. 14 Hafanreinragubei giñe garaba, lidan san murusun le ábanti labu, ábame híchugun aban lídangiñe keisi idewesei. 15 Hanügüba aban mudún hawagu kada bián san hádangiñe ha habuidun-agei, lun burí idewesei le ílaüauti, lun adagaragüdüni le gudawarügüti luma lun adagaragüdüni lánina arandaruni le adügǘbei lun ferudunawa lan figóu. Au, le Aburemei ariñagubalin.

16 —Sun lílana fulasu gasu híchuguni idewesei le lun ábuti, 17 ligíabati íchigaña animaalugu lun adagaragüdüni le gudawarügüti, luma sun le mégeiwabei lun burí idewesei le fulúaruauti, tuma diwéin lidan burí iseri hati luma burí lidan luéyuri emeraaguni luma lidan burí sun lufedun Ísüraeli. Lunti giñe ladagaragüdün luagu burí figóu ruleime burí idewesei le fulúaruauti, adagaragüdüni le gudawarügüti luma adagaragüdüni le lánina arandaruni, lun ferudunawa lan lifigoun Ísüraeli.

18 —Nariñahare au, le Aburemei: "Weyu furumiñe lidan furumiñeti hati, hadagaragüdüba aban bágasu wügüri le úati ni kata mégeiti luagu, lun tarumadun ténpulu lídangiñe figóu. 19 Lanügüba fádiri murusun lídangiñe lita animaalu le adagaragüdüwabei luagu figóu, ábame láhuruduni luagu burí tubenari ténpulu, luagu gádürü larigei latarü luma luagu burí lubenari bürürü le múnadagiñebei. 20 Ítara luba giñe ladügün weyu sedü lidan hati, luagu lufulesein furumiñeguarügü le adügüti figóu lau yebe lisubudin, o ibidiñounga lun. 21 Weyu katorusu lidan furumiñeti hati, ligíaba hagumeserun efeduhei weyu le háfuridagüle Ehiptugiñe; héigiba fein maganatu lébini luagu sedü weyu. 22 Weyu ligía, ladagaragüdüba gumadimati aban bágasu wügüri luagu lifigoun guánarügü luma luagu hafigoun lílana fulasu, 23 lídanme kada aban lídangiñe sedü weyu le ladurarun fedu, ladagaragüdüba sedü bágasu wügüriña hama sedü gábara lun Aburemei, ha úati ni kata mégeiti hawagu. Ságüme giñe weyu, ladagaragüdüba aban gábara ñǘraügili keisi adagaragüdüni luagu figóu. 24 Lanwoun kada bágasu luma kada gábara lichugúba aban idewesei le wein líburu fulúaruau luma ǘrüwa líturu dimí garaba".

25 —Lidan giñe tufedun dibasein, le efeduhóubei weyu keinsi lidan lisedün hati, gasu líchugun gumadimati sedü adagaragüdüni luagu figóu lidan sedü weyu, gudá ligíame sedü animaalugu ru ligíame sedü idewesei le fulúaruauti luma garaba.