1 Aba ladimurehan Aburemei numa, lariñaga nun:

2 —Liráü wügüri, arihabá luagun burí luwübüri Ísüraeli, badimurehame lun lidan niri 3 ítara: "Aganba huméi le lariñagubei Aburemei, luwübüri Ísüraeli, le lariñagubei Bungiu lun burí wübü, duna éibaaguati luma fulasu wayati: Nanügaali wuribu huagun, günringuaneime burí fulasu le ñein lubéi hadaagua kultu houn guáriua. 4 Nagünrinchagubei burí latarü le ñein lubéi hadagaragüda, águdaha huguya kupali, nadügüba lun hóunwegun hagibugiñe higuariuan. 5 Nachagarubaña Ísüraelina ha hilaguaaña hagibugiñoun haguariuan, nachagaragubei habu geyegua lau burí hani latarü. 6 Lidan sun fulasu le ñein lumuti haganawa, lagünrinchawaguba burí uburugu luma hani latarü le lánina hadügün kultu houn guáriua. Lagünrinchawaguba burí hani latarü hama huguariuan sunsuinagubei; lagurúba burí hani latarü le ñein lubéi hágudaha kupali. Lagumuchaguba sun burí katei le hadügübei. 7 Dánmeti harihin hóunwegun saragu gürigia, ligíame hasubudiruni luagu Au lan Aburemeibei. 8 Gama lumoun nadügüba lun hesefurun fiu hídangiñe lídangiñe óunweni, lun herederun chagagu hadan néchanigu. 9 Ha lúnbaña herederun, haritaguba nuagun; haritaguba luagu ligaburi nasufuriragüdüniña ladüga magunfulirun hamá numa luma ladüga hígirunina lun heseriwidun houn amu búngiugu. Háhüneduba hóuniwagua ladüga sun wuribani le hadügübei luma lagübüri ligaburi hóuserun. 10 Ábameti hasubudiruni luagu au lan Aburemeibei, luagu giñe adüga nani sun le nariñagubei".

11 Aba lariñagun Aburemei nun:

—Apouhabei búhabu, badügüha lau bugudi; bagúaraha lau igarigu luagu sun hariban lílana Ísüraeli, lugundun hóunweguba ladüga wuribu, ilamaü luma sandi. 12 Ha dísebaña láfaragubaña sandi, ha yarafabaña hóunweguba wuriburugu, ha erederutiña wínwanñu, láfaragubaña ilamaü. Ítara luba narariragüdüni nigañi hawagun sunsuinagubei. 13 Danme harihiniña hilaguaaña ha haganagua haguariuan luma geyegu burí lau hani latarü luagu sun wübü íñuti, lábulugu burí wübü, lábugiñe sun tídibu wewe hilumati, luma burí lidan fulasu le ñein lubéi hadagaragüda ibiñein houn haguariuan, ligíame hasubudiruni luagu au lan Aburemeibei. 14 Niñurubei núhabu lun nabeichuniña, nadügübei hageira ábanme fulasu mageirawati le hanufunati, lúmagiñe fulasu mageirawati le lani suru darí Ribülá luagun nórute. Ábameti hasubudiruni luagu au lan Aburemeibei.