1 Ábati lariñagun nun:

—Liráü wügüri, houboun líburu to, lárigiñe ábame bidin adimureha lun néchani Ísüraeli.

2 Aba náwagachun, aba léigagüdünu líburu tuguya nun. 3 Lárigiñe aba lariñagun nun:

—Huluboun líburu to, buíngüdabei buragei tau.

Aba néiginu, ani bímetu nasandirunu kamá sírudu. 4 Ábati lariñagun nun:

—Beiba asubudiragüdei le lunbei nariñaguni houn Ísüraelina. 5 Mama nóunahañadibu hamoun gürigia ha cháguati hererun, le hénrenguti gunfurandawa lan, nóunahañadibu hamoun Ísüraelina. 6 Mama nóunahañadibu hamoun gürigia gíbetiña ha cháguati hererun o hénrengu lan, darí lun hamuga básiñaruni gunfuranda. Gama lumoun lun hamuga hamoun lan hibe gürigia hagía nóunahabu, hadügüña hamuga gasu bau. 7 Ánhañati lumutuniña Ísüraeli, madügünbaña gasu bau, lugundun máhatiña hadügün gasu nau. Deretiña sun hagía ani maganbadi. 8 Gama lumoun nedereragüdaadibu ani maganbadigüda nábume kei hagía. 9 Nedereragüdaadibu kei déimaani, deré sügǘ lau dübü. Manufudedabá hawéi, máhüchürün buguyame luagu ligaburi harihin buagun, íbini weiri lan mabuchaha hamá.

10 Lárigiñe aba lariñagun nun:

—Liráü wügüri, tenibá lun baganbuni le lunbei nariñaguni bun buidu, dabei bichügüwagun. 11 Beiba arihaña bupaisanungu ha anügǘbaña hageiragiñe keisi adaürǘtiña, adüga hagía yebe gasu bau madügün, bariñagame houn: "Anihán lariñagun Aburemei".

12 Ábati liñuragunina lubafu Bungiu, aba naganbun aban areinchuni héreti nanagangiñe kamá liréin aban hárabaganali, dan le liñuragun luéirigun Aburemei lungua lídangiñe lubara. 13 Areinchuni ligía, harüna kátaña gabagaritiña hagía adügübalin dan le ladagahan luougua, luma ubalabaü le habadubei; ítara liña areinchuni ligía kamá liréin aban óunwenbu hárabaganali. 14 Aba liñuragunina lubafu Bungiu aba lasagarunina ñéingiñe, aba nidin lau íruni luma magundani sun aningira lan Aburemei nau ragüinalei núhabu here. 15 Aba nachülürün Teli Abibü, laru duna Kebarü, le ñein lubéi haganawa Ísüraelina ha asagarúbaña hageiragiñe, aba nerederun sedü weyu hama ñein, ibidiñounga nun kaba lan nadüga ni kaba lan nariñaga.

16 Luagu lisedün weyu, aba ladimurehan Aburemei nun, lariñaga:

17 —Liráü wügüri, níchuguñadibu lun bóunigiruniña lumutuniña Ísüraelina. Danme le níchugun aban uganu bun, lunti basubudiragüdüni houn, gefén hamaamuga luagu. 18 Kei burí hamuga ánhana asiadira aban gürigia wuribati lun lounwen; ánhabu mariñagun lun gürigia wuribati ligía, lun lígiruni luriban lóuserun gayara láamuga lasigirun abagarida, lóunweba ladüga lifigoun, gama lumoun naguseragüdübadibu luagu lounwen. 19 Gama lumoun anhein beweridira, ani mígirun lumuti luriban lóuserun, lóunweba luagu lifigoun, anhein buguya besefurubei bibagari. 20 Kei burí hamuga giñe, aban wügüri le úaraguati labagaridun, aba lígiruni lubuidun lóuserun lun ladügüni le wuribabei, aba hamuga níchuguni lidoun denchaü lun lábürühan; anhein meweridirun ban, lóunweba. Mabahüdün nubéi buiti le buga ladügübei, lóunweba luagu lifigoun, gama lumoun naguseragüdübadibu luagu lounwen. 21 Gama lumoun anhein beweridira wügüri ligía lun mafigouhan lan, aba lígiruni lafigouhan, lasigiruba abagarida, ladüga ladügün gasu lau beweridihan, ani ábame besefuruni bibagari.

22 Aba líchuguni Aburemei lúhabu nuagu ñeinmeme, aba lariñagun nun:

—Saraba, beiba lidoun fulasu mawübüriti, ñeinba nadimureha bun.

23 Aba násaarun aba nidin luagun fulasu mawübüriti, aba narihini luéirigun Aburemei ñein kei buga narihini laru duna Kebarü. Aba nabuluchagun darí ladagarun nerebe múarugu; 24 gama lumoun aba lebelurun lubafu Bungiu nidoun aba lararamagüdünina. Ábati ladimurehan Bungiu nun ítara:

—Beiba, ábame badouragunu buban baugua. 25 Hagüragubadibu lau gúrudu lun lásiñarun báfuridun lun bidin hamoun lílana bageira. 26 Nadügüba giñe lun tabadülerun biñeñe luagu bisielun luma lun berederun mererunga. Siñabei badeinhan houn, lau sun gürigia lan mabuchahatiña hagía. 27 Gama lumoun danme le nabusenrun nariñagun somu katei bun, nadügüba lun gayaraaya lan badimurehan, ábameti bariñagun houn: "Anihán le lariñagubei Aburemei". Le busenti laganbun, laganbuba, anhein le mabusenrunti laganbun, maganbunbei. Lugundun gürigia mabuchatiña hagía.