1 Lidoun dan ligía, aba hóundaragun Filistéana lun hageindagun hama Ísüraelina, ábati háfuridun Ísüraelina lun hageindagun hama Filistéana, aba híchugunu hakianpun-agei lubadu fulasu Ebenesérü. Ábati híchugunu Filistéana hakianpun-agei Afekü, 2 aba hawaraüdagun lun hageindagun hama Ísüraelina, lárigiñe wuribu, aba hagañeiruniña Filistéana Ísüraelina aba háfarun gádürü-milu hádangiñe. 3 Dan hagiribudun Ísüraelina tidoun kianpu-agei, aba hariñagun hábutigu Ísüraelina:

—Ka uagu lígira Wabureme lun hagañeiruniwa Filistéana uguñe? Wanügaaru lubagüsina lidaradun Wabureme Silogiñe lun lidin Bungiu waganagua gayara láamuga lesefuruniwa hawéi wáganiñu!

4 Ábati hóunahan Ísüraelina wügüriña Siló, aba hanügünu lubagüsina lidaradun Wabureme Sunti gabafu ñéingiñe, le gámabalin lálana larúeihan hagibuagu kátaña garünatiña. Ñǘbuintiña giñe Ofuní luma Fineesi ha lirahüñü Elí úara tuma lubagüsina lidaradun Wabureme. 5 Dan tachülürünbei bágüsi tidoun kianpu-agei, aba hagúaragun Ísüraelina lau saragu ugundani darí lun lánhingichun múa.

6 Dan haganbunbalin Filistéana agúaraguni ligía aba hariñagun:

—Ka san lébubei saragu chagaguaü le tídanbei hakianpun-agei Ebüréana?

Gama lumoun dan hasubudirunbalin luagu chülüharu lan lubagüsina lidaradun Wabureme tidoun kianpu-agei 7 aba hanufudedagun aba hariñagun:

—Chülüha Habungiute tidoun kianpu-agei! Fugiabugu wagía lugundun mítaranñahati! 8 Fugiabugu wagía! Kaba esefurawa luéi wábürühan lúhaburugun Bungiu le wéiribei ubafu? Ligía le agünrinchagubaliña Ehiptuna lidan fulasu mageirawati hau sun hawuyeri igei! 9 Ragǘ humá lubeiti anigi súdara Filistéana, hageindagua here, miabin humaamuga lun hadamunme Ebüréana kei buga herederun wadamunme!

10 Ábati hábürühan Filistéana hawagun Ísüraelina, aba heferidiruni Ísüraelina wuribu, aba héibaagun tidoun hakianpun-agei. Hilatiña darandi-milu wügüriña ha eibu umutiña hádangiñe Ísüraelina. 11 Ragǘ hamutu giñe Filistéana lubagüsina lidaradun Wabungiute, áfara haméi Ofuní luma Fineesi ha lirahüñü Elí. 12 Gama lumoun ñeinñein aban súdara hádangiñeti lani Benhamín türibu anuruti wuriburugugiñe, aba lachülürün éibaagueina Siló weyuméme ligía. Héiriguaaru ladaüragun lachülürünbei, buin liña giñe múa lábulugu. 13 Dan lachülürünbei, ñeinñein Elí ñun bénabu luagu aban sesi, larihin ǘmadarugun, lugundun wéiriti lidiheri tuagu lubagüsina lidaradun Wabungiute. Aba lebelurun wügüri ligía uburugun, aba líchuguni uganu; lárigiñe aba hagumeserun sun lílana uburugu agúaraha. 14 Dan laganbuni Elí agúarahani, aba lálügüdahan, lariñaga:

—Ka san lébubei sun chagaguaü le?

Ábati lóufudahan wügüri ligía íchigei uganu lun Elí, 15 dan ligía gádürü-wein-disiwídü irumu lau Elí ani marihinhali buga sunsuinagubei. 16 Lariñaga lun:

—Chülǘ niña wuriburugugiñe, anuraharügütina ñéingiñe.

Lariñaga Elí lun:

—Kagia suserebei niráü?

17 Lariñaga lun:

—Anuraha Ísüraelina hawéi Filistéana. Áfaraguatiña giñe Filistéana saragu hádangiñe Ísüraelina, hilaguatiña giñe Ofuní luma Fineesi ha birahüñü hadan ha áfarawagubaña, barǘ hamá giñe Filistéana lubagüsina lidaradun Wabungiute.

18 Keiti lariñagun lun Elí tuagu lubagüsina lidaradun Wabungiute, aba lábürühan Elí lau lanagan lubadu bena, keiti aban lan wügüri wéiyaali ligía, ani hǘrüti, aba láhalachun ligiina, aba lounwen. Bianñein-wein irumu lau eseriwida kei ábuti houn Ísüraelina. 19 Tiábinti lídiñu, to lúmari Fineesi, dageinañoun, madiseeli lun tágurahan, dan taganbunbei luagu barǘ hamá lan Filistéana lubagüsina lidaradun Wabungiute, afarúa ligía tímedamuru lau sun túmari, aba tágurahan lau saragu igarigu. 20 Keiti harihin ha ágüdahabarun luagu tounwe lan, aba hariñagun tun:

—Manufudedabá, águrahaadibu aban eyeri irahü.

Gama lumoun móunabuntu, madügün tuguya gasu hau; 21,22 aba tíchuguni Ikawódu lírime irahü ligía, tariñaga:

—Féridila Ísüraeli luéirigun, ladüga barüwa lubagüsina lidaradun Bungiu hawéi.

Lau lira tadimurehaña tuagu bágüsi luma luagu lounwen tímedamuru luma túmari.