1 Aba lounwen Samueli, aba hóundaragun Ísüraelina lun hayahuahani. Aba hábununi lúbiñe, uburugu Ramá. Lárigiñe aba lidin Dawidi lidoun fulasu mageirawati Parán.

2 Ñeinñein aban wügüri rísiti uburugu Maón, habureme ǘrüwa-milu mudún hama milu gábara, uburuguñein Karüméli lumarasun, ñéinhati lásahaña lilügüniña mudún. 3 Nawali líribei wügüri ligía, ladügawagun Kalebü; aban wügüri rófuti, ani wuribati giñe lóuserun. Ánhounti Awigaili to lúmari, magadiñetu, ani chuti tau.

4,5 Dan laganbunbei Dawidi lidan fulasu mageirawati luagu anihein lan Nawali uburugu Karüméli ásaraña lilügüniña mudún, aba lóunahan diisi hádangiñe lubúeingu lun houdin abusura lun Nawali lidan liri Dawidi 6 luma lun hariñagun lun:

«Níbiri, resibibéi lubuidun-agei nayumahan bun luma houn biduheñu hama sun bánigu. 7 Aganbaadina luagu básaruñanu lan bilügüniña mudún. Subudi bumuti giñe luagu ñéinñahañanu lan hóuniri bilügüniña mudún wama uburugu Karüméli, ani sun lan dan le wama habéi, mañawarihounti houn, magidarun ligía ni kata hawéi. 8 Gayaraati bálügüdüniña bubueingu, hariñagubei bun. Ligía lébubei nayumuragun bun lun gudeme hamá wügüriña ha, ha lídanbei buiti dan hachülüra, lun bedewehan lídangiñe le búmati houn luma nun, au, ítara niña kei biráü».

9 Aba houdin lubúeingu Dawidi, aba hariñaguni le lariñagubei Dawidi houn lun Nawali, aba herederun agurabei lóunabagüle. 10 Lariñaga Nawali houn:

—Káteigia Dawidibei? Katei liráü Hesé le? Lidan dan le, saragu haña idamuni hanurahaña hawéi haburiña. 11 Nanügeimeti éigini, uniñein luma úi le naranserubei habá ha ásahabaliña nilügüniña mudún lun níchuguni houn mutu ha ibidiñeti nun halíana hamá?

12 Aba hagiribudun lubúeingu Dawidi, danti le hachülürün lumoun Dawidi, aba habahüdaguni sun le lariñagubei Nawali lun. 13 Ábati lariñagun Dawidi houn luwügüriñanigu:

—Ragǘ hamoun sun gürigia hárumate!

Aba hadahirunu hefeinte luagu habelitin, Dawidi giñe sun; ábati houdin gádürü-san wügüriña luma aba herederun híbiri óunigirei heigin. 14 Gama lumoun aba lidin aban hádangiñe lubúeingu Nawali ariñaga tun Awigaili to lúmari Nawali:

—Óunahati Dawidi wügüriña lídangiñe fulasu mageirawati abusura lun wayubudiri, gama lumoun wuribati leresibiruniña. 15 Ani wügüriña hagía, buiti meha hóuseruniwa. Sun dan le waubei hama áraabu, mañawarihantiña woun, magida hagía ni kata wawéi. 16 Lubaragiñe lira tóunigirügü hamutiwa wéyuagu áriebu, dandu wagía keisi mudún ha wóunigirubaña. 17 Gama lumoun kei luribanbei lumene búmari ani siñati ladimurehoun lun, saminabá, ariha buguyame kaba lan badüga, lugundun chóuruti lasuseredun katei wuribati lun, luma houn sun liduheñu.

18 Furese furese aba tanügün Awigaili bián-san fein, bián sagü lautu gueru buin tau diwéin seingü mudún ásürahouaaña, liyara bián-wein líturu ilaü le sarawaali, san durudia tautu beibei tuma bián-san durudia tautu igu mábeiharu; aba tíchuguni sun le luagu aban burigü, 19 aba tariñagun houn tubúeingu:

—Heiba nubá, aguñeedina hárigi.

Mariñagunga ni kata lun túmari, 20 aba tawarirun Awigaili aban burigü, aba tagumeserun ararirei wübü aramudaguarügü. Sódini aba tarihin anitén lan Dawidi hama lánigu tubaroun, aba tidin eresibiraña.

21 Liábinti Dawidi asaminaréina luagu mala lan buga lóunigiruni sun le lúmabei Nawali lidan fulasu mageirawati, magidarunga ni kata luéi, lugundun lau wuribani lafayeirei Nawali buiti le ladügübei Dawidi lun. 22 Aba lubeiti láfiñurun Dawidi, lariñaga: «Béilana Wabungiute hanarime ánhana magumuchun hau liduheñu Nawali ha wügüriña yáagiñe lumoun haruga!»

23 Kei tarihini Awigaili Dawidi, aba tararirun luéigiñe burigü, aba tabuluchagun darí múarugun arufudei tinebenehabu. 24 Lárigiñe aba tañuurun lubadu lugudi, aba tariñagun lun:

—Nuágunla lábürüha duru! Ayumuraguatina hun lun hígirun lun nadimurehan hun, lun haganbuni le lunbei nariñaguni. 25 Madüga humá gasu lau Nawali, eyeri rófuti le, lugundun ibidiouguati lau kei liri. Lau libidiounigan aau ladügei sun katei súnwandan. Nuguya, marihin numutiña hubúeingu ha hóunahabaña. 26 Gama lumoun chóuruti luagu mígirun lan Wabureme lun hiabin áwiyura hitaü luma afayeiragüda luagu le adügǘbei hun. Anha láamuga Wabureme lun lasuseredun houn sun háganiñu luma houn sun ha abusenrubaña hadügün wuribani hun kei lasuseredun lun Nawali! 27 Guenleti, ayumuraguatina hun, lun hafanreinhani idewesei le nanügübei hun haganagua hubúeingu ha úarabaña huma, 28 lun giñe feruduna humanina. Lágüdahabadün Wabureme lidan harúeihan dandu hadügawagun, lugundun luwuribun Wabureme hageindagubei, ani masufurirunbadün ni murusun wuribani lidan sun hibagari. 29 Anhaün léibaaha somu gürigia lun láfarunün hilagubei, lágüdahabei Wabureme le Wabungiute hibagari. Lachüüragubaña Wabureme háganiñu kei lachüürawagun dübü tau chilinchádi. 30 Ítara liña lubeiti, danme ladügüni Wabureme sun buiti le uágubei lariñaga hibügürü, danme líchugunün lábutime Ísüraeli, 31 úabei luriban aritaguni huagu luagu háfarun gürigia maduruntiña luma luagu hafayeiragüdün luagu wuribani le adügübei hun lau guánarügü húhabu. Dánmeti líchugun Wabureme lubuidun dan hun, haritaguame nuagun.

32 Lariñaga Dawidi tun:

—Biniwati Wabureme le Lubungiute Ísüraeli, ladüga lóunahanibu nubaroun, 33 biniwatibu giñe luagu lubuidun baritagun, lugundun rédeibaadina uguñe luéi náfarahan, luma luéi nafayeiragüdün luagu wuribani le adügǘbei nun lau núhabu guánarügü. 34 Gama lumoun fiñutina bun luagu liri Wabureme le Lubungiute Ísüraeli le araramubalina luéi nadügün wuribani bun, luagu lun lan hamuga móufudahan ban ñübuin nubaroun, meredeti hamuga ni aban wügüri hádangiñe liduheñu Nawali wínwanñu haruga.

35 Ábati leresibiruni Dawidi le tanügübei túmagiñe, aba lariñagun tun:

—Gayaraati bidin búbiñoun darangilu. Aganba náadibu, ani nadügübei le bamuriahabei numa.

36 Dan le tagiribudunbei Awigaili le ñeinhin lubéi Nawali, aba tarihin ladügüña lan aban adineruni le ladüna aban urúei. Gúndaañein saragu ani bacharuaali buidu. Ligía mariñagun tubei ni kata lun, darí larugan. 37 Larugan binaafin, dan le súruaali Nawali lídangiñe liwidinun, aba tabahüdaguni Awigaili sun le asuseredubei lun, aba ladagarun aban sandi luagu Nawali, aba lerederun lúgubu deregüdañu. 38 Diisi weyu lárigiñe, ábaya lagayuahan Wabureme luagu, aba lounwen. 39 Dan laganbunbei Dawidi luagu hilá lan Nawali, aba lariñagun:

—Biniwalá Wabureme le afayeiragüdübalin Nawali luagu le ladügübei nun! Sefu láadina luéi nadügün wuribani, lau lábürügüdüni luriban Nawali luouguoun guánarügü!

Lárigiñe aba lóunahan Dawidi ariñaga tun Awigaili luagu busén lan lamarieidun tuma. 40 Aba houdin lubúeingu Dawidi uburugu Karüméli adimureha tuma, hariñaga tun:

—Lóunahañadiwa Dawidi anügabu, ladüga busén lumutibu lun lúmarime.

41 Aba tabuluchagun Awigaili chülǘ múarugun arufudei tinebenehabu, aba tariñagun:

—Aban eseriwidutu lun Dawidi nuguya, aransetina lun nachibuni hagudi lidamun, anhein ariñaga nun lun nadügüni.

42 Lárigiñe tariñagun ítara, aba taranserun furese, aba tidin hárigi lóunagüle Dawidi, wariñu luagu aban burigü, barüina seingü tubúeingu würiña, aba tamarieidun luma Dawidi. 43 Maríeiti giñe Dawidi tuma Ainoamü to Hesüreelina, aba laganóun hama biángubei hagía. 44 Deregelá buga Saulu Mikali to lúmari Dawidi lun Palütí, le liráü Laisü le Galimüna.