1 Wéiriyaali Saulu dan le lagumeserunbei arúeiha Ísüraeli; dan barühali átiri irumu arúeiha, 2 aba lanúadirun ǘrüwa-milu súdaragu hádangiñe Ísüraelina. Aba herederun bián-milu hádangiñe luma uburugu Mikümási luma luagu burí wübü le lani Beteli, ha híbiri milu, aba herederun luma Yónatan uburugu Gibeá le lani Benhamín. Ánheinti ha híbiri gürigia aba hagiribudun hábiñoun. 3 Aba lagumuchun Yónatan hau súdara Filistéana ha uburugubaña Gibeá, aba hasubudiruni Filistéana. Ábati lóunahan Saulu ínwinroun fidu lidan sun uburugu lun haranserun Ebüréana.

4 Aba hasubudiruni sun Ísüraelina luagu áfaraguala lan Saulu súdaragu Filistéana ani ligía lan heyereegunbei Ísüraelina houn Filistéana. Aba lubeiti hóundarun súdaragu Ísüraelina luma Saulu uburugu Gilügáli. 5 Aba giñe hóundaragun Filistéana lun hageindagun hama Ísüraelina. Ñeinñoun darandi-milu karü to lánina wuribu hama, sisi-milu súdara ha hawagutiña gabayu, hama saragu ha éibutiña gíbetiña kei sagoun laru beya. Aba houdin uburugun Mikümási, aba híchugunu hakianpun ñein, luéigiñe oubaü le ñéingiñe lubéi laboucha weyu libiti Betü-awén.

6 Aba hadariragun Ísüraelina houngua lidan lénrengunga ladüga lanarime hábürühan Filistéana hawagun darí lun haramudagun lidan burí huyu, labadinagua burí dübü, lagadábugiñe dübü luma burí fúsurugu. 7 Saragu hádangiñe aba hánhiñuraguni Hordán, aba houdin lóubawagun Gadü luma Galaadü; ánheinti Saulu aba lerederun Gilügáli, añahati sun lisudaranigu afalarei lau saragu anufudei. 8 Aba lagurabahan Saulu sedü weyu ñein kei buga lariñaguni Samueli lun; gama lumoun machülüti Samueli Gilügáli, ábati hagumeserun lánigu Saulu ñǘdüngua. 9 Ábati lariñagun Saulu:

—Barǘ huma animaalugu nun lun adagaragüdüni gudawarügüti luma lun adagaragüdüni le lánina arandaruni.

Ligía guánarügü aba líchuguni adagaragüdüni gudawarügüti. 10 Lidan oura le lásurunbei líchuguni Saulu adagaragüdüni gudawarügüti, ligía lachülürün Samueli. Ábati liabin Saulu lubaroun lun labusurun lun, 11 gama lumoun lariñaga Samueli lun:

—Ka uagu badügei katei le?

Lariñaga Saulu lun:

—Dan narihinbei luagu hóudinguña lan gürigia ha númabaña, ani miábintibu lidan dan le bariñagubei nun, ani añaha Filistéana óundaragu Mikümási, 12 aba naritagun luagu haragachuba lan ageindagua numa Gilügáli lubaragiñe níchaagun nungua lúhaburugun Wabureme; ligía lébubei níchuguni adagaragüdüni gudawarügüti.

13 Lariñaga Samueli lun:

—Aban lílülün aau le badügübei! Lun hamuga ñüdün ban lau le lubeibei Wabureme bun, chóurugüda lumuti hamuga barúeihan Ísüraeli lun súnwandan. 14 Ánheinti guentó, madurabei barúeihan. Láluguba Wabureme aban wügüri le auti lagundaara, ábame líchuguni hábutime lumutuniña, ladüga buguya, dürügua baali le lubeibei.

15 Lárigiñe aba lidin Samueli Gilügáligiñe lun lasigiruni luéiyasun. Ha híbiri súdaragu aba hafalaruni Saulu wuriburugun, Gilügáligiñe aba hachülürün uburugun Gibeá le lani Benhamín. Ñein labahüdaña Saulu súdaragu ha lúmabaña, ani kei burí sisi-sánñanu wügüriña. 16 Aba lerederun Saulu luma Yónatan le liráü hama súdaragu ha hámabaña uburugu Gibeá le lani Benhamín, ánhañati Filistéana aba híchugunu hakianpun-agei Mikümási, 17 lau sun furí hamá ǘrüwa sétanu wuriburuguna Filistéana tídangiñe hakianpun-agei; aban sétanu aba houdin luagun Ofürá, lóubawagun Suali, 18 aban luagun Betü-orón, le háürüwan, luagun wübü le lóugiñebei lani Seboimü fulasu wayati luagun fulasu mageirawati.

19 Úati ni aban nadagimeinti gürabu lidan sun lumúan Ísüraeli, ladüga haritagun Filistéana luagu ítara luba lan lásiñarun hadaagun Ebüréana eféin tuma gimara. 20 Sun Ísüraelina, gásuha houdin hamoun Filistéana lun hayarahanu hawouhagüle, hahuute, harawan. 21 Gasu hafayeihan lun tayarahóun luma lun taransehóun hamegegun. 22 Úati lubeiti ni aban tauti eféin o arufun hádangiñe ha lúmabaña Saulu labu Yónatan lidan luéyuri wuribu. Biánrügüñanu hagía tau. 23 Ábati hawanserun aban sétanu súdara luagun üma lun Mikümásün.