1 Aba hóundaruniña Filistéana hamutuniña lun wuribu, aba hóundaragun uburugu Sokó, le lani Hudá, aba híchugunu hakianpun-agei Efesi-damimü, labadinagua Sokó luma Aseká. 2 Aba giñe lóundaragun Saulu hama Ísüraelina aba híchugunu hakianpun lidan fulasu wayati Elá, aransera lun hageindagun hama Filistéana. 3 Luéigiñe aban oubaü hararama Filistéana, hararama Ísüraelina luéigiñe le aban oubaü, lerederati fulasu wayati hamidan hámagua. 4 Sódini aba lachülaagun aban wuriburuguna hádangiñe Filistéana gíriti Goliadi lídangiñeti uburugu Gatü. Wéiriti Filistéana ligía, ǘrüwa méturu liñun. 5 Ñeinñein aban habunidin wuriburuguna lauti buronse lábulugu, ñeinñoun giñe aban simisi luagu lautu giñe buronse, kei burí san-wein-aban líburu tihürü. 6 Lauti giñe buronse lidáü lúruna, tuma gimara to légewaguboun. 7 Garanati lebu larufunte, lauti gürabu lígiri, hǘrüti sügǘ lau tareisi líburu. Lubúeintiha éibuga lubá lubá. 8 Aba lararamagun Goliadi, aba lariñagun houn súdaragu Ísüraelina:

—Ka uagu hiabin awuribuha? Ma funagia aban Filistéana au, ani huguya eseriwidutiña lun Saulu? Anúadaha humá aban hídangiñe lun laragachun ageindagua numa. 9 Anhein lagañeira wuribu, ábame werederun hidamunme; gama lumoun ánhana agañeira, wadamunbadün. 10 Agunbiraha numutiña súdaragu Ísüraelina uguñe weyu Ru humá aban wügüri lun lageindagun numa!

11 Dan laganbunbalin Saulu hama sun Ísüraelina lererun Filistéana ligía, aba hadiheridun, hanufudegua hagía.

12 Ñeinñein bugaha aban wügüri Belenna gíriti Hesé, wéiyaali wügüri ligía lidaaniwagu Saulu. Wídüñanu meha lirahüñü wügüri ligía, Dawidi aban hádangiñe. 13,14 Ǘrüwa lirahüñü ha íbugañanu, Eliabü, Abinadábü luma Samá, ñǘdüngua buga luma Saulu wuriburugu. Dawidi le amuleñein, 15 ábaha lidin tidan likianpun-agei Saulu, lárigiñe ábaha lagiribudun óunigiraña lilügüniña lúguchi mudún Belén.

16 Anihánmemetiha Filistéana ligía añawariha houn Ísüraelina binaafin luma rábounweyu, ítara liña ladügüni luagu bián-wein weyu.

17 Luagu aban weyu aba lariñagun Hesé lun Dawidi:

—Barüba kei burí wein líturu tídangiñe türigu ásarahouaaru to, tuma diisi fein to, beiba tau houn bíbugañanu tidoun kianpu-agei. 18 Barübei giñe diisi furumasu le lun hábuti súdaragu. Arihabéime anhein magadiñe habéi bíbugañanu, banügame somu katei nun le arufuduti luagu magadiñe hamá.

19 Sunti buga dan le, anihán buga Saulu, líbugañanu Dawidi hama sun Ísüraelina ageindagua hama Filistéana lidan fulasu wayati Elá.

20 Larugan binaafin, saragiati Dawidi, aba lígiruniña mudún lábugiñe laríaahan amu, aba lidin barüina éigini le aubei lóunahei Hesé. Dan lachülürünbei tidoun kianpu-agei ligía oura háfurida lan súdaragu lun houdin wuriburugu, hagúarahati le lánina wuribu. 21 Aba hafileirun Filistéana hama Ísüraelina gagibugu. 22 Aba lígiruni Dawidi le buga lanügübei lábugiñe laríaahan le óunigirubarun áruma luma éigini, aba léibaagun le ñeinhin habéi líbugañanu lun lálügüdüniña ida haña lan. 23 Sunti aniha lan adimureha hama, aba láfuridun Goliadi hádangiñe Filistéana agúaraha houn Ísüraelina kéiñaha ladügüni. Aba laganbuni Dawidi.

24 Dan harihinbalin Ísüraelina wügüri ligía, aba hanufudedun saragu aba héibaagunga luéi, 25 hariñaga:

—Ariha humaali san wügüri le achülaagubei? Liábiña amisurahei Ísüraeli lun wuribu! Líchuguba urúei saragu irisini lun wügüri le áfaruti hilagubei, líchuguboun giñe urúei liráü lun lúmarime, sefu láñame tílana luban luéi hafayeihan liseinsuna gumadi.

26 Ábati lálügüdüniña Dawidi ha lóubagiñebaña, lariñaga houn:

—Kaba adügǘwa lun wügüri le áfaruti Filistéana le hilagubei; gidaléime anabawaguni le luéi Ísüraeli? Lugundun, káteiñein san Filistéana gibe tubungiute le lun lañawarihaba lan houn lisudaranigu Wabungiute le wínwanbei ítara?

27 Ábaya hariñaguni le hariñagubei furumiñe luagu le lunbei libihini le áfaruti Goliadi hilagubei. 28 Gama lumoun keiti laganbuni Eliabü le líbugaña Dawidi ladimurehan Dawidi hama wügüriña hagía, aba lagañidun luma, aba lariñagun lun:

—Ka biábinbei adüga ya? Ka uma bígiraña mudún ha lídanbaña fulasu mageirawati.

Subudi numuti ka lan baritagubei, biábiña lúnrügü barihini wuribu. 29 Aba lariñagun Dawidi:

—Kagia nadügübei? Ma nadimureharügüña?

30 Aba ladireirun luéi líbugaña, ábaya lálügüdün ábanya wügüri, ligiaméme lóunabagüle lun. 31 Añahein hádangiñe ha aganbubalin lálügüdahan Dawidi, aba houdin abahüdaguei lun Saulu, aba lóunahan Saulu luagu Dawidi. 32 Ábati lariñagun Dawidi lun Saulu:

—Moun lumuti leferidiruni ni aban luguraasun ladüga Filistéana le, lugundun, au, le lubúein urúei, néibuga ageindagua luma.

33 Lariñaga Saulu lun:

—Siñati bidin ageindagua luma Filistéana le bábugua, ladüga buguya, ñǘraügidibu, anhein ligía, awuribuhañahaali lúmagiñe ñǘgili.

34 Lariñaga Dawidi lun:

—Au, le hubúein, dan le nóunigiruniña lilügüniña núguchi mudún, lun liabin aban liñún o aban lan osu aba lanügün aban hádangiñe mudún, 35 ábaha nidin lárigi, aba nagidarunu liyumulugugiñe; ánheinha agararaagúa lun lachubarun nuagun, ábaha nárügüdüni luéigiñe láribugu aba níchaagun agufudein luagu darí náfaruni hilagubei. 36 Gayaraatiha liñún lan, gayaraati osu lan, áfara lumutiha lubúein urúei. Ani ítara luba giñe nadüga lun Filistéana gibe tubungiute le, ladüga anabagua laaña lisudaranigu Wabungiute le wínwanbei. 37 Wabureme le esefurubalina luéi liñún luma luéi osu, lesefurubadina giñe luéi Filistéana le.

Ábati lariñagun Saulu lun:

—So beiba, bumalá Wabureme.

38 Aba lóunahan Saulu ariñaga lun hadaüraguagüdüni Dawidi tau daüguaü to layusurañahaboun Saulu, lau aban habunidin súdara le buronse lábulugu, hóubura haméi tau aban daüguaü lautu buronse. 39 Agumuhóuni aba ladibiragüdünu Dawidi eféin luéigiñe lubelitin tigibuagu ladaüragun, aba lóuchagun éibuga tau lugundun méchunti luagu sun lira.

Aba lariñagun lun Saulu:

—Siñati néibugun tau sun katoun to nuougua, méchuntina tuagu.

Aba laragachunu súngubei luáriua, 40 aba lanügüni lubadun, aba labudun seingü dübü guyeti dúnarugugiñe, aba ládaruni tidoun lisagüte, tau lani chilinchádi lúhaburugu aba lagagibudagun luma Filistéana ligía. 41 Liábinti Filistéana ayarafahóueina lun Dawidi murusun murusun luma lubúein lubá lubá. 42 Dan larihinbalin Filistéana ligía Dawidi, dan larihinbei luagu nibureingili lan, funá lura ani magadiñe ligía, aba lanügüni katei kei huraraü, 43 lariñaga lun:

—Ounli funagia au lun biábinba lan ageindagua numa lau wewe?

Lárigiñe aba líñaraguni Goliadi Dawidi lidan hiri lubungiutegu. 44 Ariñagati giñe lun:

—Higabu, níchigaali bǘgürügü houn dunuru luma houn animaalu áraabuna lun héigini.

45 Lariñaga Dawidi lun:

—Buguya biabin nuagun tau eféin tuma gimara, ánheinti au nidin buagun lidan liri Nabureme Suntigabafu le Habungiute lisudaranigu Ísüraeli ha únbaña bawügürihóua. 46 Lederegeraadibu Nabureme núhaburugun, ani náfaraadibu hilagubei uguñe uguñe, ábame nadürürüni bichügü, ábame níchuguni hágubu súdaragu Filistéana houn dunuru hama animaalugu áraabuna lun héigini. Subudi hamaamugei sun gürigia luagu anihein lan Bungiu Ísüraeli; 47 sun ha óundaragubaña ya, hasubudirubei luagu mama lan tau eféin tuma gimara lesefuha Wabureme. Luwuribun Wabureme wuribu le, ani lederegerubadün wáhaburugun.

48 Aba lásaarun Goliadi, aba lidin lubaroun Dawidi, aba laranserun Dawidi furese lun lageindagun luma Goliadi; 49 aba ládarun Dawidi lúhabu tidoun lisagüte, aba lasagarun aban dübü tídangiñe aba lachüürüni luagun Goliadi tau lani chilinchádi, ladagara lereberugun. Aba lábürühan Goliadi lau ligibu múarugun. 50 Ítara liña lagañeiruni Dawidi wuribu luma Goliadi. Táurügü aban chilinchádi luma aban dübü, aba láfaruni Dawidi Goliadi. Keiti mefeinte lubéi Dawidi, 51 aba léibaagun le ñeinhin lubéi Goliadi, aba lanügünu lefeinte guánarügü, aba lagumuchun lau tau.

Lárigiñe aba ladürürüni lichügü. Dan harihinbei Filistéana luagu hilá lan hawügürin le buídutimabei lun wuribu, aba hanurahan. 52 Ábati hagúarahan lánigu Ísüraeli hama lánigu Hudá agúarahani le lánina wuribu, aba héibaahaniña darí lubenari Gatü luma lubenari Ekürón. Lidan sun üma le Saraimügiñebei lun uburugun Gatü luma Ekürón, ñéinñanu súdaragu Filistéana riwaguñu.

53 Lárigiñe héibaahaniña Ísüraelina Filistéana, aba hasagarahanu hakianpun-agei. 54 Ábati lanügüni Dawidi lábulugu Goliadi uburugun Herusalén, ánhounti lárumate aba líchugunu tidoun likianpun.

55 Lubaramegiua, álügüda laali buga Saulu Ábünerü le hábuti lisudaranigu dan larihinbei lidin Dawidi lun lageindagun luma Goliadi, lariñaga lun:

—Ábünerü, ka san lúguchibei irahü le?

56 Lariñaga Ábünerü lun:

—Ibidiñeti nun nurúeite.

Lariñaga urúei lun:

—Áfaaguaba basubudiruni.

57 Danti le liabin Dawidi lárigiñe láfaruni Goliadi, barüinaléi lábulugu Goliadi lúhaburugu, aba lanügüni Ábünerü ligibugiñoun Saulu, 58 lariñaga Saulu lun:

—Ka iráü buguya?

Lariñaga Dawidi lun:

—Liráü au Hesé, le Belenna, le lubúein urúei.