1 Aba lidin Dawidi Nobu, arihei Aimelekü le fádiri, wéiritu lanigi Aimelekü dan larihinbalin, aba láfuridun lubaroun, lariñaga lun:

—Ida liñagia bábugua lubéi biabin úouga ni aban úara buma?

2 Lariñaga Dawidi lun:

—Anihein aban katei uáguti lóunahana urúei, lariñahare nun luagu moun lan lun lasubudiruni ni aban katei le uágubei lóunahana, ni ka lan dimurei le lariñagubei nun. Ariñaga naali houn wügüriña ha númabaña halíaba lan wadunragua. 3 Ka éigini búmabei ya? Ruba seingü fein nun o furumiñeguarügü lan katei le badarirun.

4 Lariñaga fádiri lun:

—Fein to númaboun ya, mama furumiñeguarügü fein, fein to anuadirúatu. Gama lumoun níchuguboun bun anhein lüha lubéi marounrun hamá buwügüriñanigu hama würiña.

5 Lariñaga Dawidi lun:

—Kei súnwandan dan le wáfuridun ageindagua, díseñu waña hawéi würiña. Lau sun aban lan wéiyaasu le furumiñeguarügü le, según échuni harumañuhaña buga nuwügüriñanigu dan le wáfuridunbei, gúbutimati guentó, harumatimahaña.

6 Ábati lederegerunu fádiri fein anuadirúatu tuguya lun, ladüga úatu amu fein ñein tuéidigia to fein to anuadirúaaru lun Bungiu, ani weyuméme ligía, ligía tagidarún luéigiñe latarü lun tichugún iseri fein teweñegua. 7 Lidan Dan ligía, ñeinñein aban hádangiñe lani Saulu úfisigu tidan sanduariu. Duegü líribei, Edomuna, hábuti hóuniri lilügüniña Saulu mudún.

8 Aba lariñagun Dawidi lun Aimelekü:

—Anihein san aban arufun o aban lan eféin buma ya? Ladüga lau aban furesei niabin, madaanihadina lun nanügünu nefeinte ni tíbiri nárumate.

9 Lariñaga fádiri lun:

—Anuhein lefeinte Goliadi numa ya, le Filistéana le báfarubei luagu fulasu wayati Elá. Anuhán ñein lanagangiñe tidáü dúnigu, hóuburagu tidan aban idáü. Gayaraati banügünu ánhabu busén; úaaru amu áruma numa.

Lariñaga Dawidi lun:

—Úaboun hamuga buitu tuéi. Ruboun nun.

10 Weyuméme ligía aba lasigiruni Dawidi léibugun anuraha luéi Saulu, aba lidin arufudagua lungua lun Akisü le lurúeite Gatü. 11 Aba hariñagun lani Akisü úfisigu lun:

—Mama san Dawidi le, le lubúein Saulu le lurúeite fulasu le! Ligía le uágubei heremuha dan le habinahan:

«Milu wügüriña láfarun Saulu,

diisi-milu láfarun Dawidi!»

12 Dan laganbuni Dawidi le hariñagubei, aba lanufudedun luéi Akisü le lurúeite Gatü. 13 Ligía lasansirunbalin lóuserun hagibugiñe, aba lafamurun kei lǘlühali lau, ábaha labürühan katei le málati touba muna, láwiyuha larüre luagun lídiuma. 14 Ábati lariñagun Akisü houn lánigu:

—Aríagu hiña lun lǘlühali lan lau gürigia le, kame san hanügei nun ñahoun? 15 Mégeitina funagia lülü tau, hanügünbalin le nun lun ladaaguni lílülün lau núbiñe guánarügü?