1 Dan le lagiribudunbei Saulu lárigiñe léibaahaniña Filistéana, aba lariñawagún lun luagu anihein lan Dawidi lidan fulasu mageirawati En-gadü. 2 Ábati lanúadirun Saulu ǘrüwa-milu wügüriña lídangiñe sun Ísüraeli aba lidin áluahei Dawidi hau luwügüriñanigu luagu burí wübü le hénrenguti lamudeirúniwa. 3 Luagu léibuguniwagu, aba lachülürün lidoun aban fulasu le ñein habéi saragu mudún lurugabu aban lagadábugiñe wübü le ñein lubéi Dawidi hama lánigu aramudagu. Aba lebelurun Saulu ñeinhin lun lidin lábugua, 4 ábati hariñagun lánigu Dawidi lun:

—Uguñe lagunfulira le lariñagubei Wabureme bun luagu líchugubei lan bágani búhaburugun. Adügabéi le babusenrun lau.

Ábati lásaarun Dawidi, lau saragu duari aba líbugun murusun luéigiñe taru ladaüragun Saulu; 5 gama lumoun lárigiñe ladügüni, aba lagaridagun lun, 6 aba lariñagun houn luwügüriñanigu:

—Miñurun nubéi núhabu luagun urúei! Anhein urúei lubéi, ladüga lanúadirun lan Wabureme!

7 Ítara liña lararamuniña Dawidi luwügüriñanigu luéi háfaruni Saulu, aba láfuridun Saulu lagadábugiñe wübü, aba lasigiruni lémeri. 8 Lárigiñe aba láfuridun Dawidi lárigi, aba lagúaragun lun:

—Uruei, urúei!

Aba ladigiragun Saulu lárigoun, aba lélemuchun Dawidi chülǘ múarugun arufudei linebenehabu, 9 lariñaga lun:

—Ka san uagu ladüga urúei gasu hau ha ariñagubaña lun luagu náluahañein lan luriban? 10 Ariha laali urúei luagu lau sun lan ru laali lan Wabureme núhaburugun uguñe yágüta lagadábugiñe wübü, máfarun numuti urúei, ferudunarügü numuti libagari, ladüga nariñagun núnguarügü luagu anhein lan urúei lubéi urúei, ladüga lanúadirun lan Wabureme.

11 —Arihaléi urúei le núhaburugubei: Murusun luéigiñe taru ladaüragun ani gayaraati hamuga áfaranani hilagubei. Lau lira gayaraati lasubudiruni urúei luagu maritagun nan nadügün wuribati lun, ani madügünñahagidina somu mégeiti lun. Lau sun lira léibaahañadina lun láfarunina hilagubei. 12 Aguseragüdalawa Wabureme wagía biángubei, ladügame wuribati nun luéigiñe urúei! Ánheinti au, miñurun nubéi núhabu luagu urúei. 13 Lariñahare aban binadu dimurei: "Hádangiñe wuribatiña liabin wuribani; ligíati miñurun nubéi lubéi núhabu luagun urúei". 14 Katei giñeti léibaahabei lurúeite Ísüraeli? Béibaahañadina au le ítarabei kei aban ounli hilaali o kei aban hayaba! 15 Wabureme lubeiti lun larihin wadan wagía biángubei ligialá ariha luagu katei le, sefu láamugana buéi urúei.

16 Dan lásurunbei ladimurehan Dawidi, aba lariñagun Saulu:

—Buguyagu le ayanuhabei nun niráü Dawidi!

Aba layahun, 17 lariñaga:

—Richatibu, lugundun águyugüdaadibu buiti nun luagu wuribati le nadügübei bun. 18 Arufuda baali nun uguñe luagu buiti lan bálugubei nun, lugundun ru lumutina Wabureme búhaburugun, máfarun bumutina. 19 Úati adariruti lágani, aba lígiruni madügünga ni kata lau. Fáyeilabu Wabureme lau buiti luagu le badügübei nun! 20 Ariha naali buidu guentó luagu urúeibadibu lan, ani lawanseruba lan Ísüraeli lábugiñe bagumadihan. 21 Fiñuba lubeiti nun lidan liri Wabureme, luagu magumuchun bubaña lan nadügawagun, magumuchaguagüdünbeime niri hádangiñe niduheñu.

22 Aba láfiñurun Dawidi lun Saulu, lárigiñe aba lagiribudun Saulu tidoun lani palasiu, aba lidin Dawidi hau lánigu tidoun aramudaguagülei.