1 Dan le laweiyadunbei Samueli, aba líchuguniña lirahüñü lun hagía lan aguseragüdaña Ísüraelina. 2 Le furumiñeti liráü le gíribei Hoeli luma le habiaman, le gíribei Awíasi, hagía agumadihabaña Bérüsewa. 3 Gama lumoun máyeihan hamuti lubuidun lóuserun háguchi, aba laweinamudun hagu luagu seinsu, madügün hamuti katei lau úarani. 4 Ábati hóundaragun sun ábutigu Ísüraelina, aba houdin uburugu Ramá, ayanuha luma Samueli, 5 hariñaga lun:

—Buguya wéiyaadibu, ani móuseruntiña birahüñü buidu kei buguya, ruba lubeiti aban urúei lun lagumadiruniwa kei igaburi lidan sun néchani.

6 Kei magundan lubéi Samueli lau hamuriahan luma lun líchugun harúeite, aba lafurieidun lun Wabureme, 7 gama lumoun lariñaga Wabureme lun:

—Adügabá gasu lau furumiñeguarügü katei le hamuriahan Ísüraelina buma, lugundun mama buguya hálugubei hágurun hawariua, au hálugubei hágurun lun mama lan au Harúeite. 8 Le hadügübei bun guentó, hadügüñein nun lúmagiñe weyu le nasagaruniña Ehiptugiñe chülǘ lumoun dan le, ígira hamaadina lun háhuduragun houn amu búngiugu. 9 Tenibá lubeiti lun le hamuriahabei, gama lumoun subudigüdabei houn ida luba lan ligaburi habagari lábugiñe lugumadin urúei le lunbei labuguruniña.

10 Ábati lasubudiragüdüni Samueli lóunabagüle Wabureme houn lílana fulasu ha amuriahabaña urúei. 11 Lariñaga houn:

—Anihán le lunbei ladügüni urúei le lunbei lagumadirunün: Lagúaruba hawagu hisaanigu, ábame líchugun hádangiñe ageindagua tidan karü to lánina wuribu, híbirime ageindagua hau gabayu híbirime óunigirei urúei. 12 Líchuguba hádangiñe hábutime milu súdaragu, híbiri hábutime dimí-san. Líchuguba hídangiñe awouhei lumúan, luma alubahei linadürigu o adaaguoun lárumate luma tubuñe burí likarün to lánina wuribu. 13 Lanügübaña giñe hisaanigu ha würiña lun heseriwidun lun, lun háhurudaguni lau ibiñein, lun hábougun luma lun hásürahan fein. 14 Lanügübei lubuidun-agei hichari huéi ábame líchuguni houn lánigu. 15 Lanügübei aban lídangiñe kada diisi luagu san lídangiñe humegen ábame líchuguni houn lánigu. 16 Lanügübaña giñe humusuniña huéi, hama habuidun-agei hilügüniña bágasu hama hilügüniña burigü, ábame luadigimaridagüdüniña lungua. 17 Lanügüba giñe aban hádangiñe kada diisi hilügüniña mudún, íbinime huguya heseriwiduba lun. 18 Ani wéyume hekeharun luagu le ladügübei urúei le hanúadirubei hun, madügünbei Wabureme gasu hau.

19 Gama lumoun meberesegúntiña lau le lariñagubei Samueli houn, hariñaga:

—Meberesegúntiwa. Busentiwa warúeite, 20 lun ítara wamá kei híbiri néchanigu, lun giñe lagumadiruniwa, luma lun ladundehaniwa wuriburugu.

21 Lárigiñe laganbuni Samueli le hariñagubei, aba láguyuguagüdüni lun Wabureme, 22 lariñaga Wabureme lun:

—Adügabéi le habusenrubei, ruba harúeite.

Ábati lariñagun Samueli houn Ísüraelina lun hagiribudun kada aban hárigoun lidoun uburugu le ñéingiñe lubéi hayabin.