1 Aba lanurahan Dawidi ñéingiñe, aba lidin lagadábugiñoun dübü Adulámü. Dan hasubudirunbalin líbirigu hama liduheñu katei le, aba houdin óundaragua lumoun ñein. 2 Aba giñe hóundarun ha burí nidiheribaña lau, ha burí gadúeihanbaña, ha burí magundanbaña le ñein habéi, aba liabin Dawidi lun ligíaba lan hábuti. Hawarañanu gádürü-san wügüriña ha lúmabaña.

3 Ñéingiñe, aba lidin Dawidi uburugu Misüpá le lani Moabü, aba lariñagun lun lurúeite Moabü:

—Ayumuraguatina bun lun lerederun núguchi tuma núguchu huma ya darí nasubudiruni le lunbei ladügüni Wabungiute nau.

4 Ítara liñati lanügüniña Dawidi lagübürigu lumoun lurúeite Moabü, aba herederun luma ñein, sun dan le aramudaguñu lubéi Dawidi. 5 Ábati lariñagun Gadü le profeta lun Dawidi:

—Merederabá aramudaguñu. Saraba, beiba lóubawagun Hudá.

Aba lubeiti lidin Dawidi, aba lachülürün luagun áraabu le Éretü.

6 Anihati buga Saulu uburugu Gibeá ñun tábugiñe aban tídibu wewe, lau larufunte lúhaburugu, geyegu lánigu lau. Danti le lasubudirunbalin luagu arihúaali lan Dawidi hau luwügüriñanigu, 7 aba lariñagun houn úfisigu ha geyegubaña lau:

—Wügüriña ladügawagun Benhamín, aganba humana: Haritaguatün san luagu líchuguba lan liráü Hesé múa luma fulasu ñein tumuti burí tídibu beibei hun, ani líchugubadün lan gumadanme o ábutigume? 8 Sun huguya mámañadün númagiñe ladüga mariñagun lumuti ni aban hídangiñe nun luagu adügaali lan niráü aban daradu luma liráü Hesé; meberesegúnti ni aban hídangiñe nau; mariñagun lumuti ni aban hídangiñe nun luagu ru laali lan niráü Dawidi lun líchugun sádara nubá.

9 Ábati lóunabun Duegü le Edomuna le hádanbei lánigu Saulu, lariñaga:

—Ariha numuti liráü Hesé dan le lídinbei Nobu, ayanuha luma Aimelekü le liráü Aitubu. 10 Aba lálügüdahan Aimelekü luma Wabureme libügürü Dawidi, aba líchugun éigini lun, lun luéiyasun, tuma lefeinte Goliadi le Filistéana.

11 Ábati lóunahan urúei luagu fádiri Aimelekü hama sun fádirigu ha uburugubaña Nobu, ha liduheñu. Danti hachülürün ligibugiñoun urúei Saulu, 12 aba lariñagun Saulu lun Aimelekü:

—Aganba bana buidu liráü Aitubu.

Lariñaga Aimelekü lun:

—Naganbuñadün urúei.

13 Lariñaga Saulu lun:

—Ka uagu búaradunbei luma liráü Hesé kóntüra nuguya? Rútibu fein lun, tuma aban eféin, álügüdabei Wabungiute libügürü Dawidi, lun lagarabaagun nuagun, lun lesetirun sádara nubá kei ladügüni guentó.

14 Ábati lariñagun Aimelekü lun urúei:

—Kagia hádangiñe lánigu urúei úaraguabei kei Dawidi, ani libarimu giñe urúei ligía, ani hábuti lúnirigu urúei, ani wéiriguti palasiurugu? 15 Anihán funagia furumiñeti wéiyaasu nálügüdüni Bungiu libügürü Dawidi? Mítaranti, mariñagalá lubeiti urúei luagu kóntürañadina lan luagu o hawagu tílana luban, ladüga au kei aban bubuein ibidiñeti ni kata nun libügürü katei le.

16 Gama lumoun ábaya lariñagun urúei:

—Aimelekü, chourubéi luagu bounwe lan hau sun tílana buban.

17 Lárigiñe aba lariñagun urúei houn lisudaranigu:

—Áfaragua humaña lufadirinigu Aburemei, ladüga lúmagiñeñanu giñe Dawidi. Lugundun subudiñu haméi luagu lanurahaña lan buga masubudiragüdün hamuti nun.

Gama lumoun miñurun hamuti lisudaranigu urúei háhabu kóntüra lufadirinigu Wabureme. 18 Ábati lariñagun urúei lun Duegü le Edomuna:

—Áfaraguabaña!

Ábati lábürühan Duegü hawagun fádirigu, aba láfarun gádürü-wein-seingü hádangiñe. 19 Lárigiñe aba lebelurun uburugun Nobu, le haburugute fádirigu, aba láfaragun wügüriña, würiña, irahüñü hama figigiña. Áfaraguati giñe bágasu wügüriña, burigü hama mudún. 20 Gama lumoun ñeinñein aban hádangiñe lirahüñü Aimelekü gíriti Abiatárü esefuruti, aba lanurahan, aba lidin chülǘ le ñein lubéi Dawidi. 21 Aba labahüdaguni lun luagu láfaraguniña Saulu lufadirinigu Wabureme, 22 lariñaga Dawidi lun:

—Subudigubei numuti luagu kei lan ñeinñein lubéi Duegü luagu weyu ligía, labahüdagubei lan buga lun Saulu. Nidurun hóunwegunbei sun biduheñu. 23 Gama lumoun rédeiba numa, manufudedabá lugundun le busenbei láfarunibu, busenti giñe láfarunina. Gama lumoun chóurubadibu numa.