1 Aba hóundaruniña Filistéana sun hasudaranigu uburugu Afekü, ánhañati Ísüraelina aba híchugunu hakianpun-agei lubadu lísensen duna le Hesüreelibei. 2 Dántiha le hawanserun ábutigu Filistéana habu hánigu hama hasudaranigu, ábaha lidin Dawidi hau lánigu luma Akisü árigi. 3 Ábati hariñagun ábutigu Filistéana lun Akisü:

—Ka san hadügübei Ebüréana ha ya?

Lariñaga Akisü houn:

—Dawidi le, le meha lani Saulu le lurúeite Ísüraeli úfisi. Gama lumoun barühali átiri dan numa ya, ani lúmagiñe weyu le lásügürünbei numoun, chülǘ lumoun dan le, madarigidina mégeiti luagu.

4 Aba hagañidun ábutigu Filistéana lun Akisü, aba hariñagun lun:

—Ariñagabá lun lun lidin lidoun fulasu le bíchugubei lun, lun midin lan wama wuriburugu, garabaguadügüliñein wawagun lun wáganime lamidangua wuribu. Lubuidun-ágeime igaburi lun lerederun buidu luma Saulu, lun líchuguni hábulugu súdaragu ha lun! 5 Anihánmeme Dawidi le, le uágubei heremuha lidan habinahan: «Milu wügüriña láfarun Saulu, diisi-milu láfarun Dawidi!»

6 Ábati lagúarun Akisü lun Dawidi, aba lariñagun lun:

—Chóuruti luagu aban lan wügüri úaraguati buguya! Ani gúndaatina lau ligaburi bóuserun tidan kianpu-agei. Madarigidina ni kata wuribati buagu lúmagiñe weyu le biábinbei arihana. Gama lumoun mínsiñetibu houn ábutigu Filistéana, 7 giribubá lubeiti guentó darangilu, lun madügün ban ni kata le auti magundan hamá.

8 Lariñaga Dawidi lun:

—Kagia wuribati nadügübei? Kagia larihubei urúei nuagu lidan sun dan le, le ásiñaragüdübei lun nageindagun kóntüra láganiñu?

9 Lariñaga Akisü lun:

—Au, chouru numuti luagu buidu ban kei aban lóunagüle Bungiu, gama lumoun mabusenrúntiña ábutigu Filistéana lun bidin wama wuriburugu. 10 Ítara liña lubeiti, buguya hama lubúeingu babureme ha búmabaña, ábame hásaarun haruga binaafingiua, ábame hidin hárigoun.

11 Ábati lásaarun Dawidi hama luwügüriñan larugan binaafin, aba hagiribudun hárigoun, aba hawanserun Filistéana uburugun Hesüreeli.