1 Lidoun dan ligía, aba hóundaruniña Filistéana hasudaranigu lun hageindagun hama Ísüraelina, ábati lariñagun Akisü lun Dawidi:

—Kei basubudiruni, buguya hama buwügüriñanigu, gasu hidin numa wuriburugu.

2 Lariñaga Dawidi lun:

—Magadiñeti. Guentó harihaali urúei le niyaraabei adüga.

Lariñaga Akisü lun Dawidi:

—Kei ítara liña lubéi, buguyaba hábuti núnirigu súnwandan.

3 Lumoun bugati dan le, hilá meha Samueli, aba buga hayahuahani sun lílana Ísüraeli, lárigiñe aba hábununi uburugu Ramá le ñein lubéi lágurahoua. Bugagualáti buga Saulu sun garíaahatiña hama agúahatiña houn hilaguaaña fulasurugugiñe.

4 Aba hóundaragun Filistéana, aba houdin íchigoun hakianpun-agei Sunemü, aba lóundaruniña Saulu sun lílana Ísüraeli, aba híchugunu hakianpun-agei Gilübóa. 5 Gama lumoun dan larihinbarun Saulu hani Filistéana, kianpu-agei, aba lanufudedagun aba gamanihari lan anufudei lau. 6 Ábati lálügüdahan luma Wabureme, gama lumoun móunabun lumuti Wabureme ni lau uénedü, ni lau Urimü, ni hámagiñe profetagu. 7 Ábati lariñagun houn lani úfisigu:

—Áluaha humá aban würi to gayanuhaditu hama hilaaña, lun nidin álügüdoun.

Hariñaga lani úfisigu lun:

—Anuhein aban würi gayanuhaditu hama hilaaña uburugu Endoru.

8 Aba ladaüragun tau amu daüguaü lun ibidiñewa lan, aba lidin tumoun würi tuguya áriebu barüina bián wügüriña lúmagua. Lariñaga tun:

—Ayumuraguatina bun lun baríaahani nubunurun, luma bagúarun tun luani gürigia le níridun bun.

9 Tariñaga würi tuguya lun:

—Subudi bumutitia katei le ladügübei Saulu, luagu lasagaruniña garíaahatiña hama gayanuhaditiña hama hilaaña fulasurugugiñe. Kagia uagu bádahana lidoun katei le gayaraati nafarún hilagubei luéigiñe?

10 Gama lumoun aba láfiñurun Saulu lidan liri Wabureme, lariñaga tun:

—Fiñutina bun lidan liri Wabureme luagu masuseredunbei lan ni kata wuribati bun luéigiñe lira.

11 Tariñaga lun:

—Ka un babusenra nagúarun?

Lariñaga Saulu tun:

—Waba lun Samueli nun.

12 Sódini aba tarihini würi tuguya Samueli, aba taguaragun; aba tariñagun lun Saulu:

—Ka uagu beyeedana? Saulu buguya!

13 Gama lumoun lariñaga urúei tun:

—Manufudedabá. Ka barihubei?

Tariñaga lun:

—Arihatina aban bungiu amudeira múarugugiñe.

14 Lariñaga tun:

—Ida liñagia ligaburi?

Tariñaga lun:

—Aban wéiriyaali mutu, tau aban kapa luougua.

Aba gunfuranda lani Saulu furese luagu Samueli lan, aba labuluchagun darí ladagarun lerebe múarugu. 15 Ábati lariñagun Samueli lun:

—Kagia uagu bananiha nun anaagüdana ñahoun?

Lariñaga Saulu lun:

—Ladüga wéiriti nidiheri lugundun hageindaguña Filistéana numa, ani ígira láadina Wabungiute. Móunabun láadina ni hádangiñe profetagu ni lau uénedü. Ligía nagúarunbei buagu lun bariñaguni nun kaba lan nadüga.

16 Lariñaga Samueli lun:

—Kati uagu bálügüdana anhein ígira laadibu lubéi Wabureme ani báganihali? 17 Adüga laali Wabureme le uágubei lariñaga bun nídangiñe. Gidala arúeihani buéi, deregelá lun Dawidi, 18 lugundun magunfuliruntibu lau lugumadin Wabureme, magunfulirunbei lererun bun lun bagumuchun hau Amaléküna.

Ligía ladügünbalin Wabureme katei le bun guentó. 19 Ani lederegeraadibu Wabureme hau sun Ísüraelina labun habafu Filistéana, haruga yáabadibu numa hau sun birahüñü.

Lábürügüdüboun giñe Wabureme hakianpun-agei Ísüraelina labun habafu Filistéana.

20 Sódini aba lábürühan Saulu múarugu. Wéiriti lalouchun lau lererun Samueli, darí lun lóunweegun. Bóugudin luéi lira méigingili buga ni kata sun weyu ligía, sun áriebu. 21 Dan tarihini würi tuguya Saulu ítara, aba tiabin lubadun, tariñaga lun:

—Adüga naali le bamuriahabei numa. Ru naali nibagari lidoun denchaü lun nadügüni le bubeibei. 22 Amuriahatina lubeiti buma lun badügün gasu nau: Neseriwida murusun éigini bun, lun bárügüdagun bungua gayara láamuga bidin bubaruaguóun.

23 Máhati yebe Saulu, gama lumoun aba héredun lani úfisigu tuma würi tuguya luagu, aba lánharun leigin. Lárigiñe aba lásaarun múarugugiñe, aba lañuurun tuagu aban gabana. 24 Ábati táfarun würi tuguya aban mudún ñǘraügili, aba tañoundagun fulúaru lun tásürahan durudia maganatu lébini. 25 Aba tanügüni éigini lun Saulu hau lani úfisigu, lásurun heigin, aba hayouragun tun, aba houdin áriebumeme ligía.